କୋରାପୁଟ : ଏଆଇ ଯୁଗରେ ବି ବଞ୍ଚି ରହିଛି ଅନ୍ଧବିଶ୍ୱାସ । ପରମ୍ପରା ନାଁରେ କେତେକ ସ୍ଥାନରେ କୁସଂସ୍କାର ହଟୁନାହିଁ । ଆଦିବାସୀ ପରମ୍ପରା ନାଁରେ କଟକଣା ର ଶିକାର ହୋଇଛନ୍ତି ୨ ଯୁବକ । କାଉ ମିଳନ ଦେଖି ଦେବାରୁ ତାଙ୍କୁ ମିଳିଛି ଅଜବ ଦଣ୍ଡ । ବଞ୍ଚି ଥାଉ ଥାଉ ତାଙ୍କୁ ଗାଁରୁ ବିଦା କରି ପ୍ରତୀକାତ୍ମକ ଭାବରେ ଶବଦାହ କରିଛନ୍ତି ପରବାର ଲୋକେ । ଏକ ଦୁର୍ଘଟଣାରେ ଉଭୟଙ୍କ ମୃତ୍ୟୁ ହୋଇଥିଲା ବୋଲି ପ୍ରଚାର କରାଯାଇଥିଲା । ଏଥିରେ ସାମିଲ ଥିଲେ ପୁରା ଗ୍ରାମବାସୀ । ଏପରିକି ଶୁଦ୍ଧିକ୍ରୀୟା ଦଶାହ ମଧ୍ୟ ପାଳନ ହୋଇଥିଲା । ଆଜିର ଡିଜିଟାଲ ଯୁଗରେ ଏପରି ଅବିଶ୍ୱାସନୀୟ ଘଟଣା ଘଟିଛି କୋରାପୁଟ ଜିଲ୍ଲା ରାଣ୍ଡାପାଲି ପଞ୍ଚାୟତ ଅନ୍ତର୍ଗତ ପାତ୍ରଗୁଡ଼ା ଗାଁରେ ।
ଘଟନାନୁସାରେ,ପାତ୍ରଗୁଡ଼ା ଗ୍ରାମର ଯୁବକ ମୀନା ଜାନି ଓ ଟାଙ୍କୁଗୁଡ଼ାର ଯୁବକ ଧବଳୁ ଜାନି ଗୁପ୍ତେଶ୍ବର ପୀଠକୁ ଜଳାଭିଷେକ ପାଇଁ ଯାଇଥିଲେ। ଜଳାଭିଷେକ ସାରି ଗାଁକୁ ଫେରୁଥିବା ସମୟରେ କାଉ ମିଳନ ଦେଖିଥିଲେ। ଆଦିବାସୀ ପରମ୍ପରାରେ କାଉ ମିଳନ ଦେଖିବା ଅଶୁଭ ଘଟଣା । ଏଥିରେ କାହାର ମୃତ୍ୟୁ ହୋଇଥାଏ ବୋଲି ବିଶ୍ୱାସ ରହିଛି । ତେଣୁ ଏହାକୁ ଖଣ୍ଡନ କରିବା ପାଇଁ ଉକ୍ତ ୨ ଯୁବକଙ୍କ ଦୁର୍ଘଟଣାରେ ମୃତ୍ୟୁ ହୋଇଛି ବୋଲି ପ୍ରଚାର କରାଯାଇଥିଲା । ଏହାପରେ ଘରେ କାନ୍ଦ ବୋବାଳି ପଡି ୨ ଜଣଙ୍କ ପ୍ରତୀକାତ୍ମକ କୋକେଇ ଘର ଦାଣ୍ଡରୁ ଉଠି ଶବ ଶୋଭାଯାତ୍ରାରେ ମସାଣି ପର୍ଯ୍ୟନ୍ତ ଯାଇଥିଲା । ସେଠାରେ ବିଧି ଅନୁଯାୟୀ ମୃତକଙ୍କ ସମସ୍ତ କ୍ରିୟାକର୍ମ ସମାପନ କରାଯାଇଥିଲା । ଏହାପରେ ଅନ୍ତିମ ସଂସ୍କାର ପରେ ପିତା ଖିଆ ଏବଂ ଦଶାହ କର୍ମ ଆଦି ପାଳନ କରିଥିଲେ । ଏହି ସମୟରେ ୨ ଯୁବକଙ୍କୁ ଗୋଟିଏ ଦିନ ପାଇଁ ଗାଁ ବାହାରକୁ ପଠାଇ ଦିଆଯାଇଥିଲା । ପିତା ଖିଆ ପରେ ପୁଣି ସେମାନେ ଗାଁକୁ ଫେରିଥିଲେ । ଘଟଣା ଏକେବଳ ଏତିକିରେ ସରି ନଥିଲା ଉଭୟ ମୃତକଙ୍କ ପାଇଁ ଦୁଇ ପରିବାର ମିଶି ୭ ହଜାର ଲେଖାଏଁ ଖର୍ଚ୍ଚ କରି ଗ୍ରାମବାସୀ ଙ୍କ ଉଦ୍ୟେଶରେ ମୃତ ଭୋଜି ମଧ୍ୟ କରିଥିଲେ । ପରଜା ସମ୍ପ୍ରଦାୟ ଲୋକଙ୍କ କହିବାନୁଯାୟୀ, ଏପରି ନ କଲେ ଗାଁକୁ ବିପଦ ଆସିବ। ଗାଁରେ କେହି ମଧ୍ୟ ମରିବେ। ଏହି ବିଶ୍ୱାସ ପୁରାତନ କାଳରୁ ଗାଁରେ ରହିଛି ।
Comments are closed.