ପୁରୀ : ଜନ୍ମବେଦୀରେ ମହାପ୍ରଭୁଙ୍କ ଲୀଳା ଖେଳ ସାରି ଆଉ ଦି’ଦିନ ପରେ ବାହୁଡ଼ିବେ ମହାପ୍ରଭୁ । ଗତକାଲି ମହାପ୍ରଭୁଙ୍କ ହେରାପଞ୍ଚମୀ ନୀତି ଶେଷ ହେବା ପରେ ବାହୁଡା ଯାତ୍ରା ପାଇଁ ପ୍ରସ୍ତୁତି ପର୍ବ ଆରମ୍ଭ ହୋଇଛି । ତିନି ରଥରେ ଆଜ୍ଞାମାଳ ଲାଗି ପରେ ଉତ୍ତରକୁ ମୁହଁକରି ରହିଥିବା ତିନିରଥକୁ ଆଜି ଦକ୍ଷିଣ ମୋଡ କରାଯିବ । ଗୁଣ୍ଡିଚା ଘର ସିଂହଦ୍ବାର ସମ୍ମୁଖରୁ ତିନି ରଥକୁ ଟଣାଯାଇ ଶରଧାବାଲିରେ ପହଞ୍ଚିବ। ଶ୍ରୀଗୁଣ୍ଡିଚା ମନ୍ଦିର ସିଂହଦ୍ୱାର ଆଗରେ ଥିବା ପ୍ରଭୁ ଶ୍ରୀବଳଭଦ୍ରଙ୍କ ତାଳଧ୍ୱଜ, ଶ୍ରୀଜଗନ୍ନାଥଙ୍କ ନନ୍ଦିଘୋଷ ଓ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଟଣାଯାଇ ନାକଚଣା ଦ୍ୱାର ନିକଟକୁ ନିଆଯିବ।
ପ୍ରଥମେ ଦର୍ପଦଳନ ରଥ ଦକ୍ଷିଣ ମୋଡ କରାଯିବା ବିଧି ରହିଛି। ସେଠାରେ ଦକ୍ଷିଣଙ୍କୁ ମୁହଁକରି ତିନିରଥ ରଖାଯିବ। ଶ୍ରୀଗୁଣ୍ଡିଚା ଓ ବାହୁଡା ପରେ ଘଣ୍ଟୁଆ ମାନେ ମିଳିତ ଘଣ୍ଟବାଦ୍ୟ ପରିବେଷଣ କରିବେ। ଆଗାମୀ ୫ ତାରିଖ ଦଶମୀ ତିଥିରେ ମହାପ୍ରଭୁ ରଥରେ ବସି ବାହୁଡା ବିଜେ କରିବେ।
ଆଡ଼ପ ମଣ୍ଡପରେ ପ୍ରଭୁଙ୍କ ସକାଳଧୂପ ପରେ ରଥ ଆଜ୍ଞାମାଳ ବିଜେ କରିବେ। ତିନିଜଣ ପୂଜାପଣ୍ଡା ସେବକ ପ୍ରଭୁ ଶ୍ରୀବଳଭଦ୍ର, ଶ୍ରୀଜଗନ୍ନାଥ ଓ ଦେବୀ ସୁଭଦ୍ରାଙ୍କ ଆଜ୍ଞାମାଳ ସହ ଶରଧାବାଲିରେ ଥିବା ରଥ ନିକଟକୁ ଯିବେ। ଏଥିପାଇଁ ମନ୍ଦିର ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି।
Comments are closed.