ଅହମଦାବାଦ: ଅହମଦାବାଦରେ ଜୁନ୍ ୧୨ ତାରିଖରେ ଦୁର୍ଘଟଣାଗ୍ରସ୍ତ ହୋଇଥିବା ଏୟାର୍ ଇଣ୍ଡିଆର ବୋଇଂ ୭୮୭-୮ ଡ୍ରିମ୍ଲାଇନର୍ ବିମାନର ‘ବ୍ଲାକ୍ ବକ୍ସ’ ମିଳିଛି। କିନ୍ତୁ ଏହା କ୍ଷତିଗ୍ରସ୍ତ ହୋଇଥିବାରୁ ଏଥିରୁ ତଥ୍ୟ ବାହାର କରିବା ପାଇଁ ଏହାକୁ ଆମେରିକା ପଠାଇବାକୁ ପଡ଼ିପାରେ ବୋଲି ଜଣାପଡ଼ିଛି। ‘ବ୍ଲାକ୍ ବକ୍ସ’ ବାସ୍ତବରେ ଦୁଇଟି ଡିଭାଇସ୍ – କକ୍ପିଟ୍ ଭଏସ୍ ରେକର୍ଡର୍ ବା ସିଭିଆର୍ ଏବଂ ଫ୍ଲାଇଟ୍ ଡାଟା ରେକର୍ଡର୍ ବା ଏଫ୍ଡିଆର୍। ଦୁର୍ଘଟଣାଗ୍ରସ୍ତ ଏୟାର୍ ଇଣ୍ଡିଆ ବିମାନରୁ ମିଳିଥିବା ‘ବ୍ଲାକ୍ ବକ୍ସ’କୁ ଯାଞ୍ଚ କରିବା ପାଇଁ ୱାସିଂଟନ-ସ୍ଥିତ ନ୍ୟାସନାଲ ଟ୍ରାନ୍ସପୋର୍ଟ ସେଫ୍ଟି ବୋର୍ଡକୁ ପଠାଯାଇପାରେ। ଯଦି ‘ବ୍ଲାକ୍ ବକ୍ସ’କୁ ଆମେରିକା ପଠାଯାଏ, ତେବେ ପ୍ରୋଟୋକଲ୍ ଅନୁଯାୟୀ ଏହା ସହ ଭାରତୀୟ ଅଧିକାରୀଙ୍କ ଏକ ଦଳ ମଧ୍ୟ ଆମେରିକା ଯିବେ। ଏପ୍ରିଲ ୯ରେ ବିମାନ ଚଳାଚଳ ମନ୍ତ୍ରୀ ରାମମୋହନ ନାଇଡୁ ନୂଆଦିଲ୍ଲୀର ଉଡାନ ଭବନଠାରେ ବିମାନ ଦୁର୍ଘଟଣା ଅନୁସନ୍ଧାନ ବ୍ୟୁରୋ (ଏଏଆଇବି)ରେ ଅତ୍ୟାଧୁନିକ ଡିଜିଟାଲ ଫ୍ଲାଇଟ୍ ଡାଟା ରେକର୍ଡର ଏବଂ କକ୍ପିଟ୍ ଭଏସ୍ ରେକର୍ଡର (ଡିଏଫ୍ଡିଆର୍ ଓ ସିଭିଆର) ପରୀକ୍ଷାଗାରକୁ ଉଦ୍ଘାଟନ କରିଥିଲେ। ୯ କୋଟି ଟଙ୍କା ବିନିଯୋଗରେ ‘ବ୍ଲାକ୍ ବକ୍ସ ଲ୍ୟାବ୍’ ନାମରେ ପରିଚିତ ଏହି ଅତ୍ୟାଧୁନିକ ସୁବିଧା ପ୍ରତିଷ୍ଠା କରାଯାଇଥିଲା। ଏହି ଲାବ୍ରେ ଯଦି କ୍ଷତିଗ୍ରସ୍ତ ବ୍ଲାକ୍ ବକ୍ସକୁ ଯାଞ୍ଚ କରିବା ସମ୍ଭବ ନ ହୁଏ, ତେବେ ସରକାର ଅନୁମତି ଦେଲେ ଏହାକୁ ବିଦେଶ ପଠାଯିବ।
Comments are closed.