ଭୂବନେଶ୍ୱର : ରାଜ୍ୟରେ ଦିନକୁ ଦିନ ବ୍ୟାପି ଚାଲିଛି ଡାଇରିଆ । ଏପର୍ଯ୍ୟନ୍ତ ୮ ଟି ଜିଲ୍ଲାକୁ ସଂକ୍ରମଣ କରିଛି ଝାଡ଼ାବାନ୍ତି । ରାଜ୍ୟର ବିଭିନ୍ନ ଜିଲାରେ ଝାଡ଼ାବାନ୍ତି ଦେଖାଦେଇଥିବା ବେଳେ ଯାଜପୁରରେ ସର୍ବାଧିକ ଆକ୍ରାନ୍ତ ହୋଇଛନ୍ତି । ଏହାକୁ ନେଇ ଆଜି ଭୁବନେଶ୍ୱର ଲୋକସେବା ଭବନରେ ଅନୁଷ୍ଠିତ ହୋଇଛି ଗୁରୁତ୍ତ୍ୱପୂର୍ଣ୍ଣ ବୈଠକ । ବୈଠକରେ କେନ୍ଦ୍ରୀୟ ଟିମ ମଧ୍ୟ ଯୋଗ ଦେଇଥିବା ସୂଚନା ମିଳିଛି । ତେବେ ପାଣିରୁ ଡାଇରିଆ ବ୍ୟାପିଥିବା କେନ୍ଦ୍ରୀୟ ଟିମ ତଥ୍ୟ ଦେଇଛନ୍ତି । ଫିଲଡ ଭିଜିଟ ବେଳେ ବିଭିନ୍ନ ନମୁନା ସଂଗ୍ରହ କରି ପରୀକ୍ଷଣରୁ ବ୍ୟାକ୍ଟେରିଆ ଥିବା କଥା ସ୍ପଷ୍ଟ କରିଛି ଟିମ । ଏହା ସରକାରଙ୍କ ପାଇଁ ବର୍ତ୍ତମାନ ସବୁଠାରୁ ବଡ଼ ଚାଲେଞ୍ଜ ହୋଇଛି । ସ୍ବାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ଏହି ବୈଠକରେ ଉପସ୍ଥିତ ଅଛନ୍ତି । ଡ଼ାଇରିଆକୁ ନେଇ ସଂକ୍ରମିତ ଜିଲ୍ଲାକୁ ଆଲର୍ଟ କରିଛି ସ୍ୱାସ୍ଥ୍ୟ ବିଭାଗ ।
ସୂଚନା ଅନୁସାରେ,ଯାଜପୁର ପରେ ଏବେ ବାଲେଶ୍ବରକୁ ଡେଇଁଛି ଡାଇରିଆ । ବାଲେଶ୍ବର ଜିଲ୍ଲା ସୋରରେ କିଛି ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି । ଏପଟେ ଯାଜପୁରରେ ବଢିଲା ମୃତ୍ୟୁ ସଂଖ୍ୟା । ଯାଜପୁର ରୋଡ଼ ମେଡ଼ିକାଲରେ ଝାଡ଼ାବାନ୍ତିରେ ଆଉ ୨ ଜଣଙ୍କ ମୃତ୍ୟୁ ଘଟିଥିବା କୁହାଯାଉଛି । ସେହିପରି କଟକ ଜିଲ୍ଲା ନରସିଂହପୁରରେ ଜଣେ ଓ ଟାଙ୍ଗୀରେ ଜଣଙ୍କର ଝାଡ଼ାବାନ୍ତିରେ ମୃତ୍ୟୁ ହୋଇଛି । ଏଥିସହ ବେସରକାରୀ ଭାବେ କେବଳ ଯାଜପୁର ଜିଲ୍ଲାରେ ଝାଡ଼ାବାନ୍ତିରେ ୧୬ କୁହାଯାଉଥିବାବେଳେ ସରକାରୀ ଭାବେ ୭ ଜଣଙ୍କର ମୃତ୍ୟୁ ଘଟିଥିବା ସୂଚନା ରହିଛି ।
Comments are closed.