ଭୁବନେଶ୍ୱର : ଯାଜପୁର ପରେ ରାଜ୍ୟର ବିଭିନ୍ନ ଜିଲ୍ଲାକୁ ମାଡି ଚାଲିଛି ଝାଡ଼ାବାନ୍ତି । ଢେଙ୍କାନାଳ,ପୁରୀ,ଭୁବନେଶ୍ୱର ସମେତ ୮ଟି ଜିଲ୍ଲାକୁ ବ୍ୟାପିଲାଣି ଝାଡାବାନ୍ତି । ଯେଉଁଥିରେ ୧୭୦୦ରୁ ଅଧିକ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୧ ଜଣଙ୍କ ଜୀବନ ଗଲାଣି । ସେମାନଙ୍କ ମଧ୍ୟରୁ ୧୩୦୦ ଆକ୍ରାନ୍ତ ସୁସ୍ଥ ହୋଇଥିବା ବେଳେ ବିଭିନ୍ନ ମେଡିକାଲରେ ୨୪୦ ଜଣଙ୍କ ଚିକିତ୍ସା ଚାଲିଛି । ତେବେ ଦିନକୁ ଦିନ ହଇଜାର ପ୍ରକୋପ ବଢିବାକୁ ଲାଗିଥିବା ବେଳେ ଏହା ମହାମାରୀ ନୁହେଁ ବରଂ ଏହା ସ୍ଥାନୀୟ ସଂକ୍ରମଣ ବୋଲି ରିପୋର୍ଟ ଦେଇଛି ୧୪ ଜଣିଆ କେନ୍ଦ୍ରିୟ ଦଳ । ହଇଜା ସ୍ଥିତି ସଂଗୀନ ହେଉଥିବା ଦେଖି ଆଜି ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଛି ଗୁରୁତ୍ତ୍ୱପୂର୍ଣ୍ଣ ବୈଠକ । ଏହି ବୈଠକରେ ସ୍ୱାସ୍ଥ୍ୟ ସଚିବ,ସ୍ୱାସ୍ଥ୍ୟ ନିର୍ଦେଶକଙ୍କ ସହିତ ଜଣ ସ୍ୱାସ୍ଥ୍ୟ ନିର୍ଦେଶକ ଉପସ୍ଥିତ ରହିଛନ୍ତି । ଏହା ସହିତ ସମସ୍ତ ଜିଲ୍ଲାର ଜିଲ୍ଲାପାଳ ମାନେ ମଧ୍ୟ ବୈଠକରେ ଉପସ୍ଥିତ ରହିଛନ୍ତି ।
ଅନ୍ୟପଟେ ,ଯାଜପୁର ହଇଜା ମାଡ଼ିବା ପଛରେ ଇ-କୋଲାଇ ବ୍ୟାକ୍ଟେରିଆ ବୋଲି ଜଣାପଡିଛି । ସଂକ୍ରମିତ ଅଞ୍ଚଳରୁ ସଂଗ୍ରହ ହୋଇଥିବା ନମୁନାରେ ଇ-କୋଲାଇ ବ୍ୟାକ୍ଟେରିଆ ଚିହ୍ନଟ ହୋଇଥିବା ସୂଚନା ମିଳିଛି । ଏହି ବ୍ୟାକ୍ଟେରିଆ ପାଣି ଦ୍ବାରା ବ୍ୟାପିଥାଏ । ଏଥିରେ ପେଟ ଜନିତ ସମସ୍ୟା ଦେଖାଦିଏ । ଅତ୍ୟଧିକ ଝାଡ଼ାବାନ୍ତି ସମେତ କିଡନି ଫେଲ୍ ହେବାର ବି ଆଶଙ୍କା ଥାଏ । ଏନେଇ ସରକାର ବିଧିବଦ୍ଧ ଭାବେ ସ୍ପଷ୍ଟ କରି ନାହାନ୍ତି । ସଂକ୍ରମଣ ବ୍ୟାପିଥିବା ଅଞ୍ଚଳମାନଙ୍କରେ ସ୍ୱାସ୍ଥ୍ୟ ବିଭାଗ ପକ୍ଷରୁ ବିଶୋଧନ କରାଯାଉଛି । ଏହାସହିତ ଡାକ୍ତରୀ ଟିମ୍ ମଧ୍ୟ ସଂପୃକ୍ତ ଅଞ୍ଚଳରେ ବାସ କରୁଥିବା ଲୋକମାନଙ୍କ ସ୍ୱାସ୍ଥ୍ୟ ଯାଞ୍ଚ କରୁଛନ୍ତି । ସଂକ୍ରମଣ କିପରି ନବ୍ୟାପିବ, ସେଦିଗରେ ପଦକ୍ଷେପ ମଧ୍ୟ ନିଆଯାଉଛି । ଏହିକ୍ରମରେ ରାଜ୍ୟର ଡାଇରିଆ ଓ ଝାଡ଼ାବାନ୍ତି ସ୍ଥିତିର ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ।
Comments are closed.