ନୂଆଦିଲ୍ଲୀ : ଇସ୍ରାଏଲ-ଇରାନ ମଧ୍ୟରେ ପ୍ରବଳ ଉତ୍ତେଜନା । ସମ୍ଭାବ୍ୟ ଯୁଦ୍ଧ ପରିସ୍ଥିତିକୁ ନେଇ ଇରାନରେ ରହୁଥିବା ଭାରତୀୟମାନଙ୍କୁ ତେହରାନ ଛାଡ଼ିବାକୁ ନିର୍ଦେଶ ଦିଆଯାଇଛି। ମଙ୍ଗଳବାର ତେହରାନସ୍ଥିତ ଭାରତୀୟ ଦୂତାବାସ ପକ୍ଷରୁ ଜରୁରିକାଳୀନ ଭିତ୍ତିରେ ଏହି ନିର୍ଦେଶ ଦିଆଯାଇଛି। ତେହରାନରୁ ଅନ୍ୟତ୍ର ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି। ଏଥିପାଇଁ ଭାରତୀୟ ବିଦେଶ ମନ୍ତ୍ରଣାଳୟ ଏକ କଣ୍ଟ୍ରୋଲ ରୁମ୍ କରିଛି । ଇରାନରୁ ବାହାରୁଥିବା ଭାରତୀୟଙ୍କୁ ନେଇ କଣ୍ଟ୍ରୋଲ ରୁମରେ ୨୪ ଘଣ୍ଟିଆ ସେବା ଦିଆଯାଉଛି । ଅନ୍ୟପଟେ ସୋମବାର ରାତିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସମସ୍ତଙ୍କୁ ତେହରାନ ଛାଡ଼ିବାକୁ ପରାମର୍ଶ ଦେଇଥିଲେ।
ସାମାଜିକ ଗଣମାଧ୍ୟମରେ ଭାରତୀୟ ଦୂତାବାସ ପକ୍ଷରୁ ପୋଷ୍ଟ କରାଯାଇଥିବା ବିବୃତିରେ ଲେଖାଯାଇଛି ଯେ, ସମସ୍ତ ଭାରତୀୟ ନାଗରିକ ଏବଂ ଭାରତୀୟ ବଂଶୋଦ୍ଭବ ତେହରାନ ଛାଡ଼ି ସହର ବାହାରେ କୌଣସି ସୁରକ୍ଷିତ ସ୍ଥାନରେ ଆଶ୍ରୟ ନିଅନ୍ତୁ। ଏହା ସହିତ ସହାୟତା ନଂ(+୯୮୯୦୧୦୧୪୪୫୫୭, +୯୮୯୧୨୮୧୦୯୧୦୯, +୯୮୯୧୨୮୧୦୯୧୧୫) ମଧ୍ୟ ଜାରି କରାଯାଇଛି। ତୁରନ୍ତ ଦୂତାବାସ ସହ ଯୋଗାଯୋଗ କରିବାକୁ ନାଗରିକମାନଙ୍କୁ କୁହାଯାଇଛି।
ସେହିପରି ଗତକାଲି ଇସ୍ରାଏଲ ସେନା ଇରାନ ରାଜଧାନୀ ତେହରାନର ବିଭିନ୍ନ ଅଞ୍ଚଳରେ ରହୁଥିବା ଲୋକଙ୍କୁ ତୁରନ୍ତ ସ୍ଥାନ ଛାଡ଼ି ସୁରକ୍ଷିତ ସ୍ଥାନକୁ ଚାଲିଯିବା ପାଇଁ ସତର୍କ ସୂଚନା ଜାରି କରିଛି । ଇସ୍ରାଏଲ କହିଛି, ଏହା ଇରାନର ରାଜଧାନୀରେ ଥିବା ବିଭିନ୍ନ ସାମରିକ ସ୍ଥଳ ଉପରେ ଆକ୍ରମଣ ଯୋଜନା କରିଛି । ଇସ୍ରାଏଲର ଏହି ଚେତାବନୀ ପରେ ତେହରାନର ବିଭିନ୍ନ ସ୍ଥାନରୁ ଲୋକମାନେ ସୁରକ୍ଷିତ ସ୍ଥାନକୁ ପଳାଇବାରେ ଲାଗିଛନ୍ତି ।
Comments are closed.