ନୂଆଦିଲ୍ଲୀ: ଚେନ୍ନାଇର ତମ୍ବରମରେ ଏକ ସରକାରୀ ପରିଚାଳିତ ଆଶ୍ରୟସ୍ଥଳରେ ଜଣେ ୧୩ ବର୍ଷୀୟା ନାବାଳିକା ଯୌନ ନିର୍ଯାତନାର ଶିକାର ହୋଇଛନ୍ତି। ନାବାଳିକାଙ୍କ ଗୋଡ଼ ମଧ୍ୟ ଭାଙ୍ଗି ଯାଇଛି। ପୁଲିସ ଏହି ମାମଲାରେ ଆଶ୍ରୟସ୍ଥଳର ଜଣେ ସିକ୍ୟୁରିଟି ଗାର୍ଡଙ୍କୁ ଗିରଫ କରିଛି। ଅଷ୍ଟମ ଶ୍ରେଣୀରେ ପଢ଼ୁଥିବା ଏହି ନାବାଳିକା ଜଣଙ୍କ ମାତ୍ର ସପ୍ତାହକ ପୂର୍ବରୁ ଏହି ସରକାରୀ ଆଶ୍ରୟସ୍ଥଳ ଆସିଥିଲେ। ଆଶ୍ରୟସ୍ଥଳ ପରିସରରେ ରବିବାର ସେ ଯୌନ ନିର୍ଯାତନାର ଶିକାର ହୋଇଥିଲେ। ସେ ଖସିଯିବାକୁ ଚେଷ୍ଟା କରିବା ସମୟରେ ଏବଂ ସାହାଯ୍ୟ ମାଗିବା ପାଇଁ ଚିତ୍କାର କରିବା ସମୟରେ ତାଙ୍କ ଉପରେ ଆକ୍ରମଣ ହୋଇଥିଲା। ଏହା ଫଳରେ ତାଙ୍କ ଗୋଡ଼ ଭାଙ୍ଗି ଯାଇଛି। ନାବାଳିକାଙ୍କ କାନ୍ଦ ଶୁଣି ଆଶ୍ରୟସ୍ଥଳରେ ଥିବା ଅନ୍ୟ ଝିଅମାନେ ତାଙ୍କ ପାଖକୁ ଯାଇଥିଲେ। ପ୍ରଥମେ ତାଙ୍କୁ ନିକଟସ୍ଥ ଏକ ସରକାରୀ ଡାକ୍ତରଖାନାକୁ ଚିକିତ୍ସା ପାଇଁ ନିଆଯାଇଥିଲା। ସେଠାରେ ଡାକ୍ତରମାନେ ତାଙ୍କ ଗୋଡ଼ ଭାଙ୍ଗିଥିବା କହିଥିଲେ। ଏହାପରେ ତାଙ୍କୁ ପରବର୍ତ୍ତୀ ଚିକିତ୍ସା ପାଇଁ ରାଜୀବ ଗାନ୍ଧୀ ସରକାରୀ ହସ୍ପିଟାଲ୍ ନିଆଯାଇଥିଲା। ଚିତଲପକ୍କମ ପୁଲିସ ଏହି ଘଟଣାରେ ଏକ ମାମଲା ରୁଜୁ କରିଛି ଏବଂ ମାମଲାର ତଦନ୍ତ ଆରମ୍ଭ କରିଛି। ତଦନ୍ତ ପ୍ରକ୍ରିୟାରେ ପୀଡ଼ିତା ନାବାଳିକା ଅଭିଯୁକ୍ତକୁ ଚିହ୍ନଟ କଲା। ଏହାପରେ ପୀଡ଼ିତା ନାବାଳିକାଙ୍କ ବୟାନ ଆଧାରରେ ଆଶ୍ରୟସ୍ଥଳର ସିକ୍ୟୁରିଟି ଗାର୍ଡ ମାଥ୍ୟୁକୁ ପୁଲିସ ଗିରଫ କରିଥିଲା। ଏହି ମାମଲାକୁ ସମ୍ପୂର୍ଣ୍ଣ ଭାବେ ଏକ ମହିଳା ଥାନାକୁ ସ୍ଥାନାନ୍ତର କରାଯାଇଛି। ଘଟଣାରେ ବିଧିବଧ ଭାବେ ଏକ ମାମଲା ରୁଜୁ ହୋଇଛି ଏବଂ ପୁଲିସ ମାଥ୍ୟୁକୁ ହାଜତକୁ ନେଇଛି। ସାମାଜିକ କଲ୍ୟାଣ ଏବଂ ମହିଳା ସଶକ୍ତିକରଣ ମନ୍ତ୍ରୀ ଗୀତୀ ଜୀବନ ଏହି ପ୍ରସଙ୍ଗରେ କହିଛନ୍ତି, ଆଗକୁ ମହିଳା ଏବଂ ଶିଶୁମାନେ ରହୁଥିବା ସମସ୍ତ ସରକାରୀ ଆଶ୍ରୟସ୍ଥଳ ଗୁଡ଼ିକରେ ମହିଳା ଗାର୍ଡ ରହିବେ। ମନ୍ତ୍ରୀ କହିଛନ୍ତି, ଆଶ୍ରୟସ୍ଥଳର ୱାର୍ଡେନ୍ ଛୁଟିରେ ଥିବା ସମୟରେ ଏହି ଘଟଣା ଘଟିଛି।
Comments are closed.