ଭୁବନେଶ୍ୱର : ରାଉରକେଲା ସହରର ବାଲୁଘାଟ ନିକଟରୁ ବିସ୍ଫୋରକ ସାମଗ୍ରୀ ଭର୍ତ୍ତି ମିନି ଟ୍ରକ ଜବତ ଘଟଣାରେ ତନାଘନା। ୧୧୬ଟି ପେଟିରେ ଥିବା ୨୩ ହଜାର ୨୦୦ ପ୍ୟାକେଟ ଜିଲୋଟିନ ଜବତ ହେବା ପରେ ଗୋଦାମ ମାଲିକ ଶ୍ରବଣ ଅଗ୍ରୱାଲ ଓ ଗାଡି ଡ୍ରାଇଭରକୁ ଗିରଫ କରାଯାଇଛି । ମଙ୍ଗଳବାର ବଡ଼ଗାଁ ସ୍ଥିତ ଗୋଦାମର ମାଲିକଙ୍କୁ ଅଟକ ରଖି ପରାଉଚରା କରୁଛି ଏସଆଇଟି । ବିସ୍ଫୋରକ ଚାଲାଣ ବେଳେ କୌଣସି ସୁରକ୍ଷା SOP ପାଳନ କରି ନଥିଲେ ଶ୍ରବଣ ଅଗ୍ରୱାଲ । କେବେଠୁ ଏମିତି ଚାଲି ଆସିଥିଲା, କେବଳ ଏହି ଜଣେ ବିସ୍ଫୋରକ ମାଲିକ ଏଭଳି କରିଛନ୍ତି ନା ଅନ୍ୟ କୌଣସି ଗୋଦାମ ମାଲିକ ଏଭଳି କରିଛନ୍ତି, ସେନେଇ ଚାଲିଛି ଯାଞ୍ଚ । ପୁଲିସ ଷ୍ଟକ୍ ଯାଞ୍ଚ କରିବା ସହ କେତେ ବିସ୍ଫୋରକ କେଉଁ ଆଡେ ଯାଇଛି, କାହା ପାଖକୁ ଯାଇଛି ? ସୁରକ୍ଷା SOP ପାଳନ କରାଯାଉଛି କି ନାହିଁ ? ସେ ନେଇ ଚାଲିଛି ବ୍ୟାପକ ଯାଞ୍ଚ । ସୁନ୍ଦରଗଡ଼ ଓ କେଉଁଝର ଜିଲ୍ଲାରେ ଥିବା ୧୦ ଟି ଥାନା ଅଧୀନରେ ଥିବା ୨୫ ଟି ବିସ୍ଫୋରକ ଗୋଦାମ ଉପରେ ଯାଞ୍ଚ ଚାଲିଛି ।
ପଶ୍ଚିମାଞ୍ଚଳ ଡିଆଇଜି ବ୍ରିଜେଶ ରାଏଙ୍କ ନିର୍ଦ୍ଦେଶ କ୍ରମେ ଆଜି ସୁନ୍ଦରଗଡ଼ ପୁଲିସ ଜିଲ୍ଲାର ଏମ୍ସିଏଲ, ଏନଟିପିସି ଦରଲିପାଲି ପାୱାର ପ୍ଲାଣ୍ଟ, ଏନଟିପିସି ଡୁଲିଙ୍ଗା କୋଇଲା ଖଣି, ମନୋହରପୁର ଓସିପିଏଲ କୋଇଲା ଖଣି, ଜାମକାନୀ ବେଦାନ୍ତ କୋଇଲା ଖଣି , ସେହିଭଳି ଲାଞ୍ଜିବେରଣା ଚୁନାପଥର ଖଣିରେ ମାଗଜିନ ଓ ବିସ୍ଫୋରକ ଗୋଦାମ ଗୁଡ଼ିକୁ ଯାଞ୍ଚ କରୁଛି ପୁଲିସ । ଡିଆଇଜିଙ୍କ ନିର୍ଦ୍ଦେଶରେ ସୁନ୍ଦରଗଡ଼ , ରାଉରକେଲା ଓ କେନ୍ଦୁଝରରେ ଚାଲିଛି ରେଡ୍ ।
ସୂଚନା ଅନୁଯାୟୀ, ଶ୍ରବଣ ଅଗ୍ରୱାଲଙ୍କୁ ରାଉରକେଲାର ରଘୁନାଥପାଲି ପୋଲିସ ଷ୍ଟେସନରେ ଅଟକ ରଖାଯାଇଥିଲା ଏବଂଏସଆଇଟି ଦ୍ୱାରା ଜେରା ସରିବା ପରେ ତାଙ୍କୁ ଗିରଫ କରାଯାଇଛି । ମେ ୨୭ ଘଟଣା ପରେ ତାଙ୍କ ବଡ଼ଗାଁ ଗୋଦାମକୁ ଗତ ସପ୍ତାହରେ ସିଲ୍ କରାଯାଇଥିଲା ।
ଅନ୍ୟପଟେ ରାଉରକେଲାରୁ ପୁଣି ବିପୁଳ ପରିମାଣର ବିସ୍ପୋରକ ଜବତ ହୋଇଥିବାର ଖବର ମିଳିଛି। ରଘୁନାଥ ପଲ୍ଲୀ ଥାନା ଦେଓଗାଁ ସାରୁଆ ଟୋଲlରୁ ୩୦୦ ପେଟି ମେଗା ପ୍ରାଇମ ବ୍ରାଣ୍ଡ ବିସ୍ପୋରକ ଜବତ ହୋଇଛି। ଯେଉଁ ଗାଡ଼ିରୁ ଏହି ବିସ୍ଫୋରକ ଜବତ ହୋଇଛି, ତାର ମାଲିକ ଗିରଫ ଗୋଦାମ ମାଲିକ ଶ୍ରବଣ ଅଗ୍ରୱାଲ ବୋଲି ସୂଚନା ରହିଛି।
Comments are closed.