କଟକ : ପାରାଦୀପ ବନ୍ଦରରେ ଗିରଫ ହୋଇଥିବା ଜାହାଜକୁ ତୁରନ୍ତ ମୁକ୍ତ କରିବାକୁ ହାଇକୋର୍ଟଙ୍କ ନିର୍ଦେଶ । ଏକ ସାମୁଦ୍ରିକ ବିବାଦ ମାମଲାରେ ଗିରଫ ହୋଇଥିବା ଜାହାଜ ଟେଲେରି-ଏମକୁ ରିଲିଜ କରିଦେବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ପାନାମାରେ ପଞ୍ଜିକୃତ ଜାହାଜ ଏମଭି ଟେଲେରୀ ଏମକୁ ଗତ ଶନିବାର ହାଇକୋର୍ଟ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ।
ବଙ୍କର ଫୁଏଲ ବାବଦରେ ବକେୟା ଅର୍ଥ ପୈଠ ନକରିଥିବା ଅଭିଯୋଗରେ ଜିଓସର୍ଭ ଏନର୍ଜି ଟ୍ରାନ୍ସପୋର୍ଟ ନାମକ ସଂସ୍ଥାର ଆବେଦନ ଶୁଣାଣି କରି ହାଇକୋର୍ଟ ଜାହାଜକୁ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ବଙ୍କର ଇନ୍ଧନ ବାବଦ ଅର୍ଥରାଶି ଆବେଦନକାରୀ ଜିଓସର୍ଭ ଏନର୍ଜି ଟ୍ରାନ୍ସପୋର୍ଟ ନାମକ ସଂସ୍ଥାକୁ ପଇଠ କରାଯାଇସାରିଥିବା ନେଇ ସମ୍ପୃକ୍ତ ସଂସ୍ଥା ସ୍ପଷ୍ଟ କରିବା ପରେ ଜାହାଜକୁ ଛାଡିବା ପାଇଁ ଅନ୍ତରୀଣ ଆବେଦନ କରିଥିଲା। ଏହାର ଶୁଣାଣି କରି ଜଷ୍ଟିସ ଏମ.ଏସ.ରମଣ ଉକ୍ତ ଜାହାଜକୁ ଗିରଫରୁ ମୁକ୍ତ କରିବାକୁ ନିର୍ଦ୍ଦେଶ ପ୍ରଦାନ କରିଛନ୍ତି। ଏବେ ଏହି ଜାହାଜ ପାରାଦୀପ ବନ୍ଦ ଛାଡିପାରିବ ବୋଲି ଅଦାଲତ ସ୍ପଷ୍ଟ କରିଛନ୍ତି।
ସୂଚନାନୁସାରେ,ଆବେଦନକାରୀ ଟ୍ରାନ୍ସପୋର୍ଟ ସଂସ୍ଥା ଉକ୍ତ ଜାହାଜକୁ ଯୋଗାଣ କରାଯାଇଥିବା ବଙ୍କର ଇନ୍ଧନ ବାବଦ ୨୬୮୮୬୮.୨୮ଆମେରିକୀୟ ଡଲାର ଦାବି କରି ହାଇକୋର୍ଟରେ ମାମଲା ଦାୟର କରିଥିଲା। ଏହି ଜାହାଜ ପାରାଦୀପ ବନ୍ଦର ଜଳସୀମା ଛାଡି ଚାଲିଯିବାର ସମ୍ଭାବନା ଥିବାରୁ ଏହାକୁ ଗିରଫ କରିବା ପାଇଁ ବନ୍ଦର କର୍ତ୍ତୃପକ୍ଷ ଓ କଷ୍ଟମ ବିଭାଗକୁ ଗତ ୧୨ତାରିଖରେ ନିର୍ଦ୍ଦେଶ ଦେଇଥିଲେ ହାଇକୋର୍ଟ।
Comments are closed.