ଭୁବନେଶ୍ୱର : ଶୁକ୍ରବାର ସକାଳେ ସକାଳେ ହଠାତ ବଦଳିଗଲା ରାଜଧାନୀ ପାଣିପାଗର ମିଜାଜ । ସକାଳ ୯ ଟା ବେଳକୁ ସୁ ସୁ ଗର୍ଜନ କରି ପବନ ସାଙ୍ଗକୁ ଘୋଟି ଆସିଲା କଳାହାଣ୍ଡିଆ ମେଘ । ସକାଳଟାରେ ସୃଷ୍ଟି ହେଲା ସନ୍ଧ୍ୟା ୬ ଟା ର ଭ୍ରମ । କାଳବୈଶାଖୀ ବର୍ଷା ସହ ଘଣ୍ଟାଏ କାଳ ଝଡତୋଫାନ ହୋଇ ତାଣ୍ଡବ ରଚିଲା । ବିଭିନ୍ନ ସ୍ଥାନରେ ଗଛ ଦଳ ସବୁ ଭାଙ୍ଗି ପଡିବା ସହ ଖରାରୁ ରକ୍ଷା ପାଇଁ ଟ୍ରାଫିକ ପୋଷ୍ଟ ଗୁଡିକରେ ପଥଚାରୀଙ୍କ ପାଇଁ ହୋଇଥିବା ବାଉଁଶ ତୋରଣ ସବୁ ଓଲଟି ପଡିଥିବାର ଦେଖାଯାଇଥିଲା । ରାସ୍ତାଘାଟ ଜଳମୟ ହେବା ସାଙ୍ଗକୁ ଚାରିଆଡେ ଅନ୍ଧାର ହୋଇଯାଇଥିଲା । ପାଖାପାଖି ୪୦ ମିନିଟ ପର୍ଯ୍ୟନ୍ତ ଚାଲିଥିଲା ଏପରି ପାଗ । ପ୍ରବଳ ବର୍ଷା ଯୋଗୁଁ ବିଭିନ୍ନ ସ୍ଥାନରେ ଜମିଛି ବର୍ଷା ପାଣି । ରାସ୍ତାରେ ଯାତାୟତ ବାଧାପ୍ରାପ୍ତ ହୋଇଛି । ସେପଟେ ଆସନ୍ତା ୨୪ ଘଣ୍ଟା ପାଇଁ ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଟ୍ୱିନ୍ ସିଟିରେ ଘଣ୍ଟାଏ ପାଇଁ କାଳବୈଶାଖୀ ପାଇଁ ଆଲର୍ଟ ଜାରି କରାଯାଇଛି । ଭୁବନେଶ୍ୱର ସମେତ ଖୋର୍ଦ୍ଧା ଜିଲ୍ଲାକୁ ଆସନ୍ତା ୨ ଘଣ୍ଟା ପାଇଁ ଜାରି ହୋଇଛି ଅରେଞ୍ଜ ଆଲର୍ଟ । ସେହିଭଳି କଟକ ଜିଲ୍ଲା ଆଗାମୀ ଘଣ୍ଟାଏ ପାଇଁ କାଳବୈଶାଖୀ ସତର୍କତା ଜାରି ହୋଇଛି । ଢେଙ୍କାନାଳ, କଟକ ଓ ବାଲେଶ୍ବରରେ ମଧ୍ୟ ବିଶେଷ କାଳବୈଶାଖୀ ପ୍ରଭାବ ରହିବା ନେଇ ପାଣିପାଗ ବିଭିଗ ସତର୍କତା ଜାରି କରିଛି ।

Comments are closed.