ରାଜ୍ୟରେ ପ୍ରତିଷ୍ଠା ହେବ ୨୦ ଟି ସାଇବର ଥାନା,ଟ୍ରାଫିକ ସମସ୍ୟା ଦୂର କରିବ ‘ପୂର୍ଣ୍ଣକାଳୀନ ସ୍ୱତନ୍ତ୍ର ଟ୍ରାଫିକ୍ ୱିଙ୍ଗ’

ଭୁବନେଶ୍ୱର : ରାଜ୍ୟ ସରକାରଙ୍କ ବଡ଼ ନିଷ୍ପତି । ରାଜ୍ୟରେ ସୃଷ୍ଟି ହେବ ଆଉ ୨୦ ଟି ଅଧିକ ସାଇବର ଥାନା । ଏଥିରେ ଅତିରିକ୍ତ ୯୮୭ଟି ନୂଆ ପଦବୀକୁ ବୁଧବାର ରାଜ୍ୟ ସରକାର ଅନୁମତି ଦେଇଛନ୍ତି । ଫଳରେ ସାଇବର ଥାନା ସଂଖ୍ୟା ୩୪କୁ ବୃଦ୍ଧି ପାଇବ । ରାଜ୍ୟବାସୀଙ୍କ ସୁବିଧା ନିମନ୍ତେ ରାଜ୍ୟର ବିଭିନ୍ନ ଜିଲ୍ଲାରେ ଏଣିକି ସାଇବର ଥାନା ପୂର୍ଣ୍ଣକାଳୀନ କର୍ମଚାରୀ ସହ କାର୍ଯ୍ୟ କରିବ ବୋଲି ଜଣାପଡ଼ିଛି । ରାଜ୍ୟ ସରକାରଙ୍କ ଅନୁମୋଦନ ପରେ ଗୃହ ବିଭାଗ ପକ୍ଷରୁ ବୁଧବାର ଏହି ନୂଆ ପଦବୀ ସୃଷ୍ଟି ସମ୍ପର୍କରେ ବିଧିବଦ୍ଧ ଭାବେ ଆକାଉଣ୍ଟାଣ୍ଟ ଜେନେରାଲଙ୍କୁ ଅବଗତ କରାଯାଇଛି ।

ସେହିପରି ଜ୍ୟରେ ଟ୍ରାଫିକ ସମସ୍ୟା ଓ ସଡ଼କ ନିରାପତ୍ତା ବ୍ୟବସ୍ଥାରେ ସୁଧାର ପାଇଁ ଏଣିକି ‘ପୂର୍ଣ୍ଣକାଳୀନ ସ୍ୱତନ୍ତ୍ର ଟ୍ରାଫିକ୍ ୱିଙ୍ଗ’ କାର୍ଯ୍ୟ କରିବ । ଯାହାକି ସିଧାସଳଖ ପୁଲିସ ଡିଜିଙ୍କ ଅଧୀନରେ ରହିବ । ରାଜ୍ୟ ସରକାର ବୁଧବାର ମୋଟ ୧୯୯୬ଟି ନୂଆ ପଦବୀକୁ ଅନୁମୋଦନ କରିଛନ୍ତି । ଏଥିରେ ୬୬ଟି ପ୍ରଶାସନିକ ଓ ମିନିଷ୍ଟ୍ରିଆଲ ପଦବୀ ରହିଛି । ଏହି ଟ୍ରାଫିକ ୱିଙ୍ଗରେ ପୂର୍ବରୁ ମାତ୍ର ଜଣେ ଡିଏସପି ପାହ୍ୟାର ଅଫିସର ପଦବୀକୁ ଅନୁମୋଦନ ମିଳିଥିବାବେଳେ ଏବେ ଆଉ ୫ଟି ଏହି ପାହ୍ୟାର ଅଫିସର ପଦବୀ ସୃଷ୍ଟି ହୋଇଛି । ନୂତନ ଭାବେ ଅନୁମୋଦନ ପାଇଥିବା ୧୯୩୦ଟି ପଦବୀ ମଧ୍ୟରେ ୫ଟି ଡିଏସପି, ୪୧ଟି ଇନ୍ସପେକ୍ଟର, ୮୩ଟି ଏସଆଇ, ୮୩ଟି ଏଏସଆଇ, ୩୧୦ଟି ହାବିଲଦାର ଓ ୧୪୦୮ଟି କନେଷ୍ଟବଳ ସାମିଲ ଅଛନ୍ତି । ପୂର୍ବରୁ ଏହି ଟ୍ରାଫିକ ୱିଙ୍ଗ ସ୍ୱତନ୍ତ୍ର ଭାବେ କାର୍ଯ୍ୟ କରୁନଥିଲେ ମଧ୍ୟ ଏଥିରେ ମଞ୍ଜୁରୀପ୍ରାପ୍ତ ୧୭୬୫ଟି ପଦବୀ ରହିଛି । ଏହି ସ୍ୱତନ୍ତ୍ର ‘ଟ୍ରାଫିକ ୱିଙ୍ଗ’ର ବିଶେଷକରି ଭୁବନେଶ୍ୱର ଓ କଟକରେ ଅଧିକ ସଂଖ୍ୟକ କର୍ମଚାରୀ ନିଯୁକ୍ତି ପାଇବେ । ଭୁବନେଶ୍ୱରରେ ଅଧିକ ୬୮ଟି ଓ କଟକରେ ୨୮ଟି ପଦବୀକୁ ଅନୁମୋଦନ ମିଳିଛି । ଫଳରେ ଭୁବନେଶ୍ୱରରେ ଟ୍ରାଫିକ କର୍ମଚାରୀଙ୍କ ସଂଖ୍ୟା ୫୨୦ ଓ କଟକରେ ୨୪୨କୁ ବୃଦ୍ଧି ପାଇବ । ସମ୍ବଲପୁର ଓ ହୀରାକୁଦରେ ଜଣେ ଲେଖାଏଁ ଡିଏସପି ପାହ୍ୟାର ଅଫିସର ଟ୍ରାଫିକ ଦାୟିତ୍ୱରେ ମୁତୟନ ହେବେ । ୨୦୨୦ ମସିହାରୁ ସ୍ୱତନ୍ତ୍ର ଟ୍ରାଫିକ ୱିଙ୍ଗ ଗଠନ ଓ ଅଧକ କର୍ମଚାରୀ ନିଯୁକ୍ତି ପ୍ରସ୍ତାବ ପ୍ରସ୍ତାବ ସରକାରଙ୍କ ଅନୁମୋଦନ ପାଇଁ ଗୃହ ବିଭାଗରେ ପଡ଼ିରହିଥିଲା ।