ବୁର୍ଲା : ବିଦ୍ୟୁତ ବିଭାଗର ଚରମ ଅବହେଳା । ହସ୍ପିଟାଲ ପରିସରରୁ ବିଦ୍ୟୁତ କାଟ । ବିନା ପ୍ରାକ୍ ସୂଚନାରେ ଲାଇନ କାଟି ଦେବାରୁ ୩ ଘଣ୍ଟା ଧରି ହନ୍ତସନ୍ତ ହେଲେ କ୍ୟାନସର ରୋଗୀ । ଅନ୍ଧାର ଭିତରେ ମୋବାଇଲ ଟର୍ଚ୍ଚ ଲାଇଟ୍ ଜରିଆରେ ରୋଗୀଙ୍କୁ ଡ଼ିଆଗଲା କେମୋ ଥେରାପି । ଏଭଳି ସାଙ୍ଘାତିକ ଘଟଣା ଘଟିଛି ବୁର୍ଲା ଭିମସାର ମେଡିକାଲରେ । ଯାହାର ଭିଜୁଆଲ ଏବେ ଭାଇରାଲ ହୋଇଛି ।
ସୂଚନାନୁସାରେ,ବୁଧବାର ଦିନ ୧୨ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଏହି ଘଟଣା ଘଟିଥିଲା । ପ୍ରାୟତଃ କେମୋ ନେଲା ପରେ ଶରୀରରେ ପାର୍ଶ୍ବ ପ୍ରତିକ୍ରିୟା ଦେଖାଯାଏ । ଶରୀରରେ ଗରମ ଅନୁଭୂତ ହେବା ସହ ଜଳାପୋଡା ବି ହୁଏ । ହେଲେ ବିନା ଲାଇନରେ ରୋଗୀଙ୍କୁ ୩ ଘଣ୍ଟା ରଖାଯିବା ବୁଝାପଡୁନି । ଏପଟେ ଲାଇନକୁ ଜିଇଡି ବିଭାଗ କାଟିବା ପରେ ଦାୟିତ୍ବରେ ଥିବା ବ୍ୟକ୍ତି ଜେନେରେଟର ମଧ୍ୟ ଚଳାଇନଥିଲେ । ସେପଟେ ଏହି ଘଟଣାରେ ଯାହାର ଭୁଲ ରହିଛି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମେଡିକାଲ ଅଧ୍ୟକ୍ଷ କହିଛନ୍ତି ।
ଏଭଳି ମନୁଷ୍ୟକୃତ ତ୍ରୁଟି ଯୋଗୁଁ ଗୁରୁତର କ୍ୟାନ୍ସର ରୋଗୀଙ୍କ ଜୀବନ ପ୍ରତି ବିପଦ ସୃଷ୍ଟି କରିପାରେ ବୋଲି କୁହାଯାଉଛି । ତେଣୁ ଏହି ଘଟଣାରେ ରାଜ୍ୟ ସରକାର ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି ।

Comments are closed.