ଭୁବନେଶ୍ୱର : ଓଡିଶା କ୍ରିକେଟ ଆସୋସିଏସନ ( ଓସିଏ) କୁ ସୋ କଜ୍ ନୋଟିସ । ୧୦ ଦିନ ମଧ୍ୟରେ ଉତ୍ତର ରଖିବାକୁ ନିର୍ଦେଶ ଦେଇଛି କ୍ରୀଡା ଓ ଯୁବ ବ୍ୟାପାର ବିଭାଗ । ଗତକାଲି ବାରବାଟୀ ଷ୍ଟାଡିଅମରେ ଭାରତ – ଇଂଲଣ୍ଡ ଏକ ଦିବସୀୟ ବ୍ୟାଚ ଚାଲିଥିବା ବେଳେ ପ୍ରାୟ ୩୦ ମିନିଟ ଧରି ବନ୍ଦ ହୋଇଯାଇଥିଲା ଫ୍ଲଡ଼ ଲାଇଟ । କାହିଁକି ଲାଇଟ ବନ୍ଦ ହେଲା ଏହାର ଉତ୍ତର ୧୦ ଦିନ ମଧ୍ୟରେ ରଖିବାକୁ ନିର୍ଦେଶ ଦେଇଛି କ୍ରୀଡା ବିଭାଗ । ଏହି ସୂଚନା ଦେଇଛନ୍ତି କ୍ରୀଡ଼ା ମନ୍ତ୍ରୀ ସୂର୍ଯ୍ୟବଂଶୀ ସୂରଜ। କେଉଁମାନେ ଦାୟିତ୍ବରେ ଥିଲେ, ତାହା ବିଚାର କରିବୁ ବୋଲି କହିଛନ୍ତି।
ଦାୟିତ୍ୱ ହୀନତା ପାଇଁ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ଏହି ଘଟଣା କ୍ରୀଡା ପ୍ରେମୀଙ୍କ ମଧ୍ୟରେ ଆଘାତ ଦେଇଛି । ଲାଇଟ ଲିଭିବା ବଡ଼ କଥା ନୁହେଁ କିନ୍ତୁ ଡିଜି ଚଳାଇବାରେ କଣ ପାଇଁ ବିଳମ୍ବ ହେଲା ତାହାର ତଦନ୍ତ ହେବ ବୋଲି କହିଛନ୍ତି କ୍ରୀଡ଼ା ଏବଂ ଯୁବ ବ୍ୟାପାର ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।
ଅନ୍ୟପଟେ ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି, ଜେନେରେଟର ସମସ୍ୟା ପାଇଁ ଏପରି ହେଲା। ଯେପରି ପୁନରାବୃତ୍ତି ନହେବ ଧ୍ୟାନ ଦେବୁ। ଯାନ୍ତ୍ରିକ ତ୍ରୁଟି ଯୋଗୁଁ ଏଭଳି ହେଲା ଓ ବିକଳ୍ପ ବ୍ୟବସ୍ଥା ବିଳମ୍ବ ହେଲା। ଦ୍ବିତୀୟ ଜେନେରେଟର ଆଣିଲା ବେଳେ ବାଟରେ ଟିମ୍ ବସ୍ ଥିଲା। ଟିମ୍ ବସ୍ ଡ୍ରାଇଭରଙ୍କୁ ଖୋଜିବାରୁ ଟିକେ ବିଳମ୍ବ ହେଲା।
ସୂଚନାନୁସାରେ,ଭାରତର ବ୍ୟାଟିଂ ବେଳେ ଫ୍ଲଡ୍ ଲାଇଟରେ ସମସ୍ୟା ଯୋଗୁଁ ୨୦ରୁ ୨୫ ମିନିଟ୍ ମ୍ୟାଚ୍ ବନ୍ଦ ରହିଥିଲା । ମ୍ୟାଚର ସପ୍ତମ ଓଭର ଚାଲିଥିବା ବେଳେ ହଠାତ୍ ଗୋଟିଏ ଫ୍ଲଡ୍ ଲାଇଟ୍ ଲିଭି ଯାଇଥିଲା। ଫଳରେ ପଡ଼ିଆର କିଛି ସ୍ଥାନ ଅନ୍ଧାର ହୋଇଯାଇଥିଲା। ସେହି ସମୟରେ କ୍ରିଜରେ ଥିଲେ ଦୁଇ ଓପନର ରୋହିତ ଶର୍ମା ଓ ଶୁଭମନ୍ ଗିଲ୍। ଉଭୟେ କିଛି ସମୟ କ୍ରିଜରେ ରହିବା ପରେ ପାଭିଲିୟନ୍ ଫେରିଥିଲେ। ଏଭଳି ସମସ୍ୟାକୁ ନେଇ ବିରକ୍ତି ପ୍ରକାଶ କରିଥିଲେ ରୋହିତ ଶର୍ମା। ଦର୍ଶକ ବି ନିରାଶ ହୋଇଥିଲେ। ପାଖାପାଖି ୨୦ ରୁ ୨୫ ମିନିଟ ପରେ ଆରମ୍ଭ ହୋଇଥିଲା ମ୍ୟାଚ୍।
Comments are closed.