ବୁର୍ଲା : ପ୍ରଫେସର ବୁଲୁ ମହାରଣା ନିଲମ୍ବିତ । ଉଚ୍ଚ ଶିକ୍ଷାନୁଷ୍ଠାନ ଗୁଡିକୁ ଭଲ ରାଙ୍କ ଦେବାପାଇଁ ଲାଞ୍ଚ ନେବା ମାମଲାରେ କାର୍ଯ୍ୟରୁ ବିଦା ହେଲେ ପ୍ରଫେସର। ବୁଧବାର ସମ୍ବଲପୁର ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ପ୍ରଫେସର ବୁଲୁ ମହାରଣାଙ୍କୁ ନିଲମ୍ବିତ କରିଛନ୍ତି । ଗତ ୧ ତାରିଖରେ ସିବିଆଇ ସମ୍ବଲପୁର ବିଶ୍ୱବିଦ୍ୟାଳୟର ଲାଇବ୍ରେରୀ ସାଇନ୍ସ ବିଭାଗୀୟ ମୁଖ୍ୟ ପ୍ରଫେସର ବୁଲୁ ମହାରଣାଙ୍କୁ ଗିରଫ କରିଥିଲା।
ଓଡ଼ିଶା ବିଶ୍ବବିଦ୍ୟାଳୟର ଷ୍ଟାଚ୍ୟୁଟ୍ ୨୯୯ ମୁତାବକ ଏହି ନିଲମ୍ବନ କରାଯାଇଛି ବୋଲି ବିଶ୍ବବିଦ୍ୟାଳୟ କୁଳ ସଚିବ ଡଃ ନୃପରାଜ ସାହୁଙ୍କ ହସ୍ତାକ୍ଷର ଥିବା ଚିଠିରେ ଉଲ୍ଲେଖ ରହିଛି। ଅଭିଯୁକ୍ତ ପ୍ରଫେସର ମହାରଣାଙ୍କୁ କୁଳପତିଙ୍କ ନିର୍ଦ୍ଦେଶକ୍ରମେ କୁଳସଚିବ ଓଡ଼ିଶା ଚାକିରି ସେବା ନିୟମ-୧୯୬୨ର ଧାରା ୧୨ ଅନୁଯାୟୀ ନିଲମ୍ବନ ଆଦେଶ ଦେଇଛନ୍ତି । ଚିଠିସଂଖ୍ୟା ୫୬୭ରେ ଗତ ୪ ତାରିଖରେ ଏହି ନିର୍ଦ୍ଦେଶନାମା ଜାରି ହୋଇଛି । ପ୍ରଫେସର ଶ୍ରୀ ମହାରଣାଙ୍କଠାରୁ ସମସ୍ତ ପ୍ରାଶାସନିକ ଦାୟିତ୍ୱ ଅପସାରଣ କରାଯାଇ ଲାଇବ୍ରେରି ଏବଂ ସୂଚନା ବିଜ୍ଞାନ ବିଭାଗର ବିଭାଗୀୟ ମୁଖ୍ୟଙ୍କୁ ହସ୍ତାନ୍ତର କରାଯାଇଛି । କୁଳପତିଙ୍କ ବିନା ଆଦେଶରେ ସେ କାର୍ଯ୍ୟସ୍ଥଳୀ ଛାଡ଼ିପାରିବେ ନାହିଁ ବୋଲି ଏଥିରେ ଉଲ୍ଲେଖ ରହିଛି ।
ସୂଚନାନୁସାରେ, ଆନ୍ଧ୍ରପ୍ରଦେଶର ଗୁଣ୍ଟୁର ସ୍ଥିତ ୱାଦେଶ୍ୱରମ୍ ଶିକ୍ଷାନୁଷ୍ଠାନକୁ ଏ++ ରେଟିଂ ଦେବା ପାଇଁ ନାକ୍ ପିୟର କମିଟି ଦଳ ଲାଞ୍ଚ ମାଗିଥିଲେ । ଏହି ‘ନାକ୍’ କମିଟିର ୧୦ ଜଣ ସଦସ୍ୟଙ୍କ ମଧ୍ୟରେ ପ୍ରଫେସର ବୁଲୁ ମହାରଣା ଥିଲେ । ଲାଞ୍ଚ ନେବା ବେଳେ ସିବିଆଇ ସମସ୍ତ ୧୦ ଅଭିଯୁକ୍ତଙ୍କୁ ଗିରଫ କରିବା ସହ ତଦନ୍ତ ଚଳାଇଛି ।
Comments are closed.