ନୂଆଦିଲ୍ଲୀ : ଆଜି ଦିଲ୍ଲୀ ବିଧାନସଭା ନିର୍ବାଚନ ପାଇଁ ଚାଲିଛି ମତଦାନ । ସମସ୍ତ ୭୦ ଆସନରେ ଭୋଟିଂ ଜାରି ରହିଛି। ତେବେ ଦିଲ୍ଲୀ ନିର୍ବାଚନ ପର୍ବରେ ସାମିଲ ହୋଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଗଣତନ୍ତ୍ରର ଏହି ମହାପର୍ବରେ ଦେଶର ପ୍ରଥମ ନାଗରିକ ତଥା ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ନିଜ ସାମ୍ବିଧାନିକ ମତାଧିକାର ସାବ୍ୟସ୍ତ କରିଛନ୍ତି । ସକାଳ ପାଖାପାଖି ୮ଟା ୩୦ ମିନିଟରେ ରାଷ୍ଟ୍ରପତି ଭବନରୁ ବାହାରି ରାଜେନ୍ଦ୍ର ପ୍ରସାଦ କେନ୍ଦ୍ରୀୟ ବିଦ୍ୟାଳୟ ଭୋଟିଂ କେନ୍ଦ୍ରରେ ପହଞ୍ଚି ସେ ତାଙ୍କର ବହୁ ମୂଲ୍ୟ ମତଦାନ ସାବ୍ୟସ୍ତ କରିଥିଲେ। ରାଷ୍ଟ୍ରପତି ଦ୍ରୌପଦୀ ମୁର୍ମୁ ହେଉଛନ୍ତି ଓଡ଼ିଆ ଝିଅ । ଯିଏକି ଦେଶର ପ୍ରଥମ ନାଗରିକ ଭାବେ ସର୍ବୋଚ୍ଚ ସାମ୍ବିଧାନିକ ପଦବୀ ଅଳଙ୍କୃତ କରି ରାଜ୍ୟକୁ ଗୌରବାନ୍ବିତ କରିଛନ୍ତି ।
କାହିଁକି ଦିଲ୍ଲୀରେ ଭୋଟ ଦେଉଛନ୍ତି ଓଡ଼ିଶା ଝିଅ ଦ୍ରୌପଦୀ ?
କେବଳ ଚଳିତ ଦିଲ୍ଲୀ ବିଧାନସଭା ନିର୍ବାଚନ ନୁହେଁ, ଗତ ଲୋକସଭା ନିର୍ବାଚନରେ ମଧ୍ୟ ରାଷ୍ଟ୍ରପତି ଦିଲ୍ଲୀରେ ନିଜ ମତ ସାବ୍ୟସ୍ତ କରିଥିଲେ । ସୂଚନାନୁସାରେ, ଓଡ଼ିଶାର ମୂଳବାସିନ୍ଦା ଦ୍ରୌପଦୀ ମୁର୍ମୁ ୨୫ ଜୁଲାଇ ୨୦୨୨ ରେ ଦେଶର ରାଷ୍ଟ୍ରପତି ପଦ ଅଳଙ୍କୃତ କରିଥିଲେ । ଏହାପରେ ତାଙ୍କର ଭୋଟ ପରିଚୟ ପତ୍ର ମଧ୍ୟ ନିର୍ବାଚନ ଆୟୋଗଙ୍କ ଦ୍ବାରା ଅପଡେଟ୍ କରାଯାଇଥିଲା । ସେ ଦିଲ୍ଲୀ ଭୋଟର ଭାବେ ପୁନଃପଞ୍ଜିକୃତ ହୋଇଥିଲେ । ପୂର୍ବରୁ ତାଙ୍କ ପରିଚୟପତ୍ରରେ ଠିକଣାରେ ଓଡ଼ିଶା ଉଲ୍ଲେଖ ରହିଥିଲା ।
କେଉଁଠି ଭୋଟ ଦିଅନ୍ତି ରାଷ୍ଟ୍ରପତି:-
ସର୍ବବୃହତ୍ତ ଗଣତାନ୍ତ୍ରିକ ରାଷ୍ଟ୍ରର ପ୍ରଥମ ନାଗରିକ ହୋଇଥିବା କାରଣରୁ ସର୍ବାଧିକ କ୍ଷମତା ଉପଭୋଗ କରନ୍ତି ରାଷ୍ଟ୍ରପତି । ତାଙ୍କୁ ଅନ୍ୟ କୌଣସି ନିର୍ବାଚିତ ଜନପ୍ରତିନିଧିଙ୍କ ପରି ପଞ୍ଜୀକୃତ ଅଞ୍ଚଳର ଭୋଟ କେନ୍ଦ୍ରକୁ ଯିବାକୁ ପଡେନାହିଁ । ରାଷ୍ଟ୍ରପତି ଭବନ ପରିସରରେ ଥିବା ଡ.ରାଜେନ୍ଦ୍ର ପ୍ରସାଦ କେନ୍ଦ୍ରୀୟ ବିଦ୍ୟାଳୟରେ ସ୍ବତନ୍ତ୍ର ପୁଲିଂ ବୁଥ ପ୍ରତିଷ୍ଠା କରନ୍ତି ନିର୍ବାଚନ ଆୟୋଗ । ସେଠାରେ ରାଷ୍ଟ୍ରପତି ଓ ରାଷ୍ଟ୍ରପତି ଭବନର ବରିଷ୍ଠ କାର୍ଯ୍ୟକର୍ତ୍ତା ମତଦାନ କରିଥାଆନ୍ତି ।
Comments are closed.