ପାଟନା: ବିହାରର ଭାଗଲପୁର ଜିଲ୍ଳା ହବିବପୁର ଥାନା ଅଧୀନ ଖିଲାଫତ ନଗରର ଏକ ଆବର୍ଜନା ଗଦା ନିକଟରେ ଖେଳୁଥିବା ସମୟରେ ଏକ ଦେଶୀ ବୋମା ଫୁଟିବାରୁ ୭ ଶିଶୁ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୩ଜଣଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଛି। ଗତକାଲି ପୂର୍ବାହ୍ଣ ପ୍ରାୟ ସାଢ଼େ ୧୧ଟା ବେଳେ ଶିଶୁମାନେ ଆବର୍ଜନା ରହିଥିବା ସ୍ଥାନରେ ଖେଳୁଥିଲେ। ଏହି ସମୟରେ ଜଣେ ଶିଶୁକୁ ବଲ ଭଳି ଏକ ସାମଗ୍ରୀ ମିଳିଥିଲା। ଖେଳିବା ନିମନ୍ତେ ସେ ଏହାକୁ ଅନ୍ୟ ସାଥୀଙ୍କ ଆଡ଼କୁ ଫିଙ୍ଗିଦେଇଥିଲା । ତଳେ ପଡ଼ିବା କ୍ଷଣି ଏହା ବିସ୍ଫୋରଣ ହୋଇଥିଲା। ଖବର ପାଇ ସ୍ଥାନୀୟ ପୁଲିସ ସେଠାରେ ପହଞ୍ଚିଥିଲେ। ପରେ ଏସ୍ଏସ୍ପି ଆନନ୍ଦ କୁମାର ଓ ସିଟି ଏସ୍ପି କେ ରାମଦାସ ଘଟଣାସ୍ଥଳ ପରିଦର୍ଶନ କରି ସ୍ଥାନୀୟ ଲୋକଙ୍କୁ ପଚରାଉଚରା କରିଛନ୍ତି। ସିଟି ଏସ୍ପି ରାମଦାସ କହିଛନ୍ତି, ଏହି ଦୁର୍ଘଟଣାରେ ୭ ଶିଶୁ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ମାନ୍ନା ତାଙ୍କ ଭାଇ ଗୋଲୁ ଓ ମହମ୍ମଦ ଆରିଫଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଛି। ଫରେନ୍ସିକ୍ ଟିମ୍ ବିସ୍ଫୋରକର ନମୁନା ସଂଗ୍ରହ କରିଛନ୍ତି। ଏନେଇ ଅଧିକ ତଦନ୍ତ ଜାରି ରହିଛି।
Comments are closed.