ପୁରୀ : ଚାରମାଳ ଉପରେ ବଡ଼ ଠାକୁର ବଳଭଦ୍ର ମୁହଁ ମାଡ଼ି ପଡ଼ିଯିବା ଘଟଣାର ତଦନ୍ତ ଶେଷ ହୋଇଛି । ତିନି ଜଣିଆ କମିଟି ତଦନ୍ତ ଶେଷ କରି ଏହାର ରିପୋର୍ଟ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀଙ୍କୁ ପ୍ରଦାନ କରିଛନ୍ତି । ଶ୍ରୀମନ୍ଦିର ମୁଖ୍ୟ ପ୍ରଶାସକ ନିଜେ ସୋସିଆଲ ମିଡିଆରେ ଏହି ସୂଚନା ଦେଇଛନ୍ତି । ଏଥିରେ ସେ ଉଲ୍ଲେଖ କରିଛନ୍ତି- ଏହି ରିପୋର୍ଟକୁ ଶ୍ରୀମନ୍ଦିର ପରିଚାଳନା କମିଟି ଆଗରେ ଉପସ୍ଥାପନ କରାଯାଇ ଆଲୋଚନା କରାଯିବ । ତା’ପରେ ଯାହା କିଛି ନିଷ୍ପତ୍ତି ନିଆଯିବ । ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ମଧ୍ୟ କହିଛନ୍ତି, ପରିଚାଳନା କମିଟିର ଆସନ୍ତା ବୈଠକରେ ଏହି ରିପୋର୍ଟର ତର୍ଜମା କରାଯିବ ଓ ପରବର୍ତ୍ତୀ ନିଷ୍ପତ୍ତି ନିଆଯିବ ।
ସୂଚନାନୁସାରେ,ଗତ ଜୁଲାଇ ୯ ତାରିଖରେ ହୋଇଥିଲା ଏହି ଅଭାବନୀୟ ଘଟଣା । ବଡ଼ ଠାକୁର ବଳଭଦ୍ରଙ୍କ ଆଡ଼ପ ମଣ୍ଡପ ବିଜେ ପାଇଁ ତାଙ୍କୁ ପହଣ୍ଡି କରାଯାଇ ରଥରୁ ଅଣାଯାଉଥିଲା । ହଠାତ୍ ଚାରମାଳ ଉପରେ ମୁହଁ ମାଡ଼ି ପଡ଼ିଯାଇଥିଲେ ବଡ଼ ଠାକୁର । ସ୍ତବ୍ଧ ହୋଇ ଯାଇଥିଲେ କୋଟି କୋଟି ଭକ୍ତ । ସମସ୍ତଙ୍କୁ ଏହା ଗଭୀର ଆଘାତ ଦେଇଥିଲା । ଏଭଳି ଅଭାବନୀୟ ଘଟଣା ଆଗରୁ କେବେ ଘଟି ନଥିବାରୁ ତଦନ୍ତ ପାଇଁ ଅତିରିକ୍ତ ଜିଲ୍ଲାପାଳ, ଶ୍ରୀମନ୍ଦିର ନୀତି ପ୍ରଶାସକ,ସିଟି ଡିଏସପିଙ୍କୁ ନେଇ ଗଠିତ ହୋଇଥିଲା ୩ ଜଣିଆ କମିଟି । ଭିଡିଓ ଫୁଟେଜ ଦେଖିବା ସହିତ ବଳଭଦ୍ରଙ୍କ ବାଡ଼ଗ୍ରାହୀ, ଅନ୍ୟ ସେବାୟତ, ଶ୍ରମନ୍ଦିର ପ୍ରଶାସନର କର୍ମଚାରୀ ଓ ଜେଟିପିଙ୍କୁ ତଦନ୍ତ କମିଟି ପଚରାଉଚରା କରିଥିଲା। ରଥ ଉପରେ ଅଧିକ ସେବକ, ବିଡ଼ିଆ ମୋହଣୀ ନୀତି ବିଳମ୍ପ େହୋଇଥିବା ଯୋଗୁଁ ଏଭଳି ଏକ ଅଘଟଣ ଘଟିଯାଇଛି । ଏ ନେଇ କମିଟି ତରପରୁ ରିପୋର୍ଟ ପ୍ରଦାନ କରାଯାଇଛି । ରଥ ଉପରେ ବଡ଼ ଠାକୁର ପଡିଯିବା ଘଟଣାରେ ସ୍ପଷ୍ଟ ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ପରିଚାଳନା ବୈଠକରେ ଆଲୋଚନା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି ।
Comments are closed.