ନୂଆଦିଲ୍ଲୀ: ନରେନ୍ଦ୍ର ମୋଦୀ ଲଗାତାର ତୃତୀୟ ଥର ପାଇଁ ଦେଶର ପ୍ରଧାନମନ୍ତ୍ରୀ ଭାବେ ଶପଥ ନେବେ। ବିଜେପି ନେତୃତ୍ବାଧୀନ ଏନଡିଏର ସମସ୍ତ ସହଯୋଗୀ ଦଳ ନରେନ୍ଦ୍ର ମୋଦୀଙ୍କୁ ଏନଡିଏର ନେତା ନିର୍ବାଚିତ କରିବାପରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୋଦୀଙ୍କୁ ସରକାର ଗଠନ ପାଇଁ ଆମନ୍ତ୍ରଣ କରିଥିଲେ। ରାଷ୍ଟ୍ରପତିଙ୍କ ଆମନ୍ତ୍ରଣ ପରେ ମୋଦୀ ରାଷ୍ଟ୍ରପତି ଭବନ ଯାଇ ରାଷ୍ଟ୍ରପତିଙ୍କ ନିକଟରେ ସରକାର ଗଠନ ପାଇଁ ଦାବି କରିଥିଲେ। ରବିବାର ସନ୍ଧ୍ୟା ୬ଟାରେ ରେ ମୋଦୀ ଏବଂ ତାଙ୍କ ମନ୍ତ୍ରିମଣ୍ଡଳର ସଦସ୍ୟମାନେ ଶପଥ ଗ୍ରହଣ କରିବେ। ମୋଦୀ କହିଛନ୍ତି, ତୃତୀୟ ଥର ପାଇଁ ଏନଡିଏ ସରକାରକୁ ଲୋକମାନେ ସୁଯୋଗ ଦେଇଛନ୍ତି। ଆମକୁ ଏହି ସୁଯୋଗ ଦେଇଥିବାରୁ ଦେଶବାସୀଙ୍କୁ ମୁଁ ଧନ୍ୟବାଦ ଜଣାଉଛି ଏବଂ ମୁଁ ସେମାନଙ୍କୁ ଏହା ନିଶ୍ଚିତ କରାଉଛି ଯେ ଗତ ୨ଟି କାର୍ଯ୍ୟକାଳରେ ଦେଶରେ ଯେଉଁଭଳି ବିକାଶ ହେଉଥିଲା ଏବଂ ଯେଉଁ ଗତିରେ ବିକାଶମୂଳକ କାର୍ଯ୍ୟ ହେଉଥିଲା ଠିକ୍ ସେହି ସମାନ ବେଗ ଏବଂ ସମାନ ସମର୍ପଣ ମନୋଭାବ ସହ ଏନଡିଏ ସରକାର କାମ କରିବ। ଆମେ ଦେଶକୁ ଆହୁରି ଆଗକୁ ନେବୁ ଏବଂ ଦେଶବାସୀଙ୍କ ଆକାଂକ୍ଷା ପୂରଣ କରିବୁ।
Comments are closed.