ମୁମ୍ବାଇ: ମୁମ୍ବାଇର ତାଜ୍ ହୋଟେଲ ଏବଂ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରକୁ ଆଜି ବିସ୍ଫୋରଣରେ ଉଡ଼ାଇ ଦେବାପାଇଁ ଧମକ ମିଳିଥିଲା। ସୋମବାର ଅପରାହ୍ନରେ ମୁମ୍ବାଇ ପୁଲିସ ନିକଟକୁ ଉପରୋକ୍ତ ୨ଟି ସ୍ଥାନରେ ବୋମା ବିସ୍ଫୋରଣ ନେଇ ଫୋନ୍ କଲ୍ ଆସିଥିଲା। ଏହାପରେ ମୁମ୍ବାଇ ପୁଲିସ ଟିମ୍ ଉଭୟ ତାଜ୍ ହୋଟେଲ ଏବଂ ବିମାନବନ୍ଦରରେ ସର୍ଚ୍ଚ ଅପରେସନ୍ କରିଥିଲେ। କିନ୍ତୁ ପରେ ଜଣାପଡ଼ିଥିଲା ଯେ ଏହା ଏକ ମିଥ୍ୟା କଲ୍। କଲ୍ ଆସିଥିବା ନମ୍ବରଟି ଉତ୍ତରପ୍ରଦେଶର। କଲ୍ କରିଥିବା ବ୍ୟକ୍ତିକୁ ଧରିବା ପାଇଁ ଅପରେସନ୍ ଜାରି ରହିଛି। ଉଲ୍ଲେଖଯୋଗ୍ୟ, ନିକଟରେ ଦିଲ୍ଲୀ ବିଶ୍ବବିଦ୍ୟାଳୟର ଲେଡି ଶ୍ରୀରାମ କଲେଜ୍କୁ ମଧ୍ୟ ବିସ୍ଫୋରଣରେ ଉଡ଼ାଇ ଦେବାପାଇଁ ଧମକ ମିଳିଥିଲା। ଏକ ଇମେଲ୍ ଯୋଗେ ମେ’ ୨୩ ତାରିଖରେ ଏହି ଧମକ ମିଳିଥିଲା। ଏହାପରେ ପୁଲିସ ଟିମ୍ କଲେଜ ପରିସରକୁ ଭଲଭାବେ ସର୍ଚ୍ଚ କରିଥିଲେ। କିନ୍ତୁ ସେଠାରୁ କିଛି ମିଳିନଥିଲା। ଏହା ଏକ ମିଥ୍ୟା କଲ୍ ବୋଲି ଜଣାପଡ଼ିଥିଲା। ସେହିପରି ବେଙ୍ଗାଲୁରୁରେ ୩ଟି ବିଳାସପୂର୍ଣ୍ଣ ହୋଟେଲରେ ମଧ୍ୟ ବୋମା ଥିବା ନେଇ ଗତ ୨୩ ତାରିଖରେ ଧମକ ମିଳିଥିଲା। ଏହା ପୂର୍ବରୁ ମଧ୍ୟ ଦିଲ୍ଲୀ ଏବଂ ନଏଡ଼ାରେ କେତେକ ସ୍କୁଲ୍ରେ ବି ବୋମା ଥିବା ନେଇ ଧମକ ଦିଆଯାଇଥିଲା।
Comments are closed.