ନୂଆଦିଲ୍ଲୀ: ନିକଟ ଭବିଷ୍ୟତରେ ନିର୍ବାଚନ ହେବାକୁ ଥିବା ୫ଟି ରାଜ୍ୟର ଭୋଟର ତାଲିକା ସଂଶୋଧନ ପାଇଁ ନିର୍ବାଚନ କମିସନ (ଇସି) ଏସବୁ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀ (ସିଇଓ) ମାନଙ୍କୁ ନିର୍ଦ୍ଦେଶ ଦେଇଛନ୍ତି। ଗତ ୨୪ ତାରିଖରେ ୫ ରାଜ୍ୟର ସିଇଓଙ୍କୁ ନିର୍ବାଚନ କମିସନଙ୍କ କାର୍ଯ୍ୟାଳୟ ପକ୍ଷରୁ ଚିଠି ଲେଖାଯାଇଛି। ଚଳିତବର୍ଷ ଏସବୁ ରାଜ୍ୟରେ ନିର୍ବାଚନ ହେବ। ୨୦୨୩ ଅକ୍ଟୋବର ୧ କିମ୍ବା ତା’ ପୂର୍ବରୁ ଯେଉଁମାନଙ୍କୁ ୧୮ ବର୍ଷ ହୋଇଛି ସେମାନଙ୍କୁ ଭୋଟର ତାଲିକାରେ ସାମିଲ କରାଯିବ। ନିୟମରେ ପରିବର୍ତ୍ତନ ପରେ ଭୋଟର ତାଲିକାରେ ସାମିଲ ପାଇଁ ଜାନୁଆରି ପହିଲା, ଏପ୍ରିଲ ପହିଲା, ଜୁଲାଇ ପହିଲା ଏବଂ ଅକ୍ଟୋବର ପହିଲାକୁ ୪ଟି କଟ୍-ଅଫ୍ ତାରିଖ ଭାବେ ଗ୍ରହଣ କରାଯାଇଛି। ପୂର୍ବରୁ ଯେଉଁମାନଙ୍କୁ ପ୍ରତିବର୍ଷ ଜାନୁଆରି ୨ ତାରିଖ କିମ୍ବା ତା ପରେ ୧୮ ବର୍ଷ ହେଉଥିଲା ସେମାନଙ୍କୁ ଭୋଟର ତାଲିକାରେ ସାମିଲ ହେବାକୁ ବର୍ଷେ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ୁଥିଲା। କିନ୍ତୁ ଏବେ ୧୮ ବର୍ଷରେ ପହଞ୍ଚୁଥିବା ବ୍ୟକ୍ତିମାନଙ୍କ ନାମ ପ୍ରତି ୩ ମାସରେ ଥରେ ଭୋଟର ତାଲିକାରେ ଉଠିପାରିବ।
ଉଲ୍ଲେଖଯୋଗ୍ୟ, ମିଜୋରାମ ବିଧାନସଭାର କାର୍ଯ୍ୟକାଳ ଡିସେମ୍ବର ୧୭ରେ ଶେଷହେବ। ଏହାବ୍ୟତୀତ ତେଲେଙ୍ଗାନା, ରାଜସ୍ଥାନ, ଛତିଶଗଡ଼ ଏବଂ ରାଜସ୍ଥାନ ବିଧାନସଭାର ଅବଧି ଆସନ୍ତାବର୍ଷ ଜାନୁଆରିରେ ସରିବ। ଉତ୍ତରପୂର୍ବ ରାଜ୍ୟ ମିଜୋରାମରେ ମିଜୋ ନ୍ୟାସନାଲ ଫ୍ରଣ୍ଟ୍ ଶାସନ କ୍ଷମତାରେ ଥିବାବେଳେ ତେଲେଙ୍ଗାନାରେ ବିଆର୍ଏସ୍, ମଧ୍ୟପ୍ରଦେଶରେ ବିଜେପି ଶାସନ କରୁଛି। କିନ୍ତୁ ଛତିଶଗଡ଼ ଓ ରାଜସ୍ଥାନରେ କଂଗ୍ରେସ ଶାସନ ଗାଦିରେ ରହିଛି।
Comments are closed.