ମୁମ୍ବାଇ: ବିଜେପି ବିରୋଧୀ ମେଣ୍ଟ ଗଠନ ପାଇଁ ଜୋରଦାର ପ୍ରୟାସ ଚାଲିଛି। ଆସନ୍ତା ଜୁନ୍ ୧୨ ତାରିଖରେ ବିରୋଧୀ ଦଳ ନେତାମାନଙ୍କର ବୈଠକ ଅଛି। ବିଜେପି ବିରୋଧରେ ମେଣ୍ଟ ଗଠନ ପାଇଁ ଏହି ବୈଠକରେ କ୍ଷେତ୍ର ପ୍ରସ୍ତୁୂତ ହେବ। ଇତି ମଧ୍ୟରେ କଂଗ୍ରେସ ନେତା ପି ଚିଦମ୍ବରମ୍ କହିଛନ୍ତି, ୨୦୨୪ ସାଧାରଣ ନିର୍ବାଚନ ପୂର୍ବରୁ ଅଣବିଜେପି ଦଳଗୁଡ଼ିକୁ ଗୋଟିଏ ପତାକା ତଳକୁ ଆଣିବା ପାଇଁ ଚେଷ୍ଟା ଚାଲିଛି। ଏଥିରେ ସଫଳତା ମିଳିଲେ ସେମାନେ ୫୪୩ ଲୋକସଭା ଆସନ ମଧ୍ୟରୁ ୪୦୦-୪୫୦ଟି ଆସନରେ ଜଣେ ଲେଖାଏଁ ପ୍ରାର୍ଥୀ ଦେଇପାରିବେ। ଚିଦମ୍ବରମ୍ କହିଛନ୍ତି, ଆମ ଦଳ (କଂଗ୍ରେସ) ଯେତେଦୂର ସମ୍ଭବ ସମସ୍ତ ଅଣବିଜେପି ଦଳକୁ ଏକାଠି କରିବାକୁ ଚେଷ୍ଟା କରୁଛି। ଯଦି ସେମାନେ ଏକାଠି ହୋଇପାରନ୍ତି ତେବେ ୪୦୦-୪୫୦ ଆସନରେ ଆମେ ବିଜେପି ବିରୋଧରେ ମିଳିତ ପ୍ରାର୍ଥୀ ଦେଇପାରିବୁ। ୯ ବର୍ଷ ଶାସନରେ ଥିବା ବିଜେପି ସରକାରର ବିଫଳତାର ପ୍ରଚାର ପାଇଁ କଂଗ୍ରେସ ଅଭିଯାନର ଅଂଶସ୍ବରୂପ ମୁମ୍ବାଇ ଆସିଥିବା ଚିଦମ୍ବରମ୍ ଏହା କହିଛନ୍ତି।
ଜୁନ୍ ୧୨ ତାରିଖରେ ପାଟନାରେ ଅଣବିଜେପି ଦଳଗୁଡ଼ିକ ଏକ ବୈଠକ କରିବାକୁ ଯାଉଛନ୍ତି। ବିରୋଧୀ ଏକତା ପାଇଁ ଅଭିଯାନ ଜାରି ରହିଛି। ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ୨୦୨୪ ପୂର୍ବରୁ ଅଣବିଜେପି ଦଳଗୁଡ଼ିକୁ ଏକାଠି ହେବା ପାଇଁ ଆହ୍ବାନ ଦେଇଥିଲେ। ସେ ନିକଟରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଓ ରାହୁଲ ଗାନ୍ଧିଙ୍କ ସହ ମଧ୍ୟ ସାକ୍ଷାତ୍ କରି ଜୁନ୍ ୧୨ ବୈଠକ ବିଷୟରେ ଆଲୋଚନା କରିଥିଲେ।
Comments are closed.