ନୂଆଦିଲ୍ଲୀ : ଆସନ୍ତାକାଲି ନୂଆ ସଂସଦ ଭବନ ଉଦ୍ଘାଟନ ହେବ। ସକାଳ ୭ଟାରୁ ପୂଜା ଏବଂ ଯଜ୍ଞ ସହ ଆରମ୍ଭ ହେବ ସଂସଦ ଭବନ ଉଦ୍ଘାଟନ କାର୍ଯ୍ୟକ୍ରମ। ସକାଳ ୭ଟାରୁ ୯ ଟା ପର୍ଯ୍ୟନ୍ତ ଗାନ୍ଧୀ ପ୍ରତିମୂର୍ତ୍ତି ନିକଟରେ ଯଜ୍ଞ କାମ ଚାଲିବ। ଏହାପରେ ବାଚସ୍ପତିଙ୍କ ଚେୟାର ନିକଟରେ ସେଙ୍ଗୋଲ ସ୍ଥାପନ କରାଯିବ ଏବଂ ଏକ ପ୍ରାର୍ଥନା ସଭା କରାଯିବ। ଅପରାହ୍ନରେ ନୂଆ ସଂସଦ ଭବନ ଉଦ୍ଘାଟନ କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆ ସଂସଦ ଭବନ ଉଦ୍ଘାଟନ କରିବେ।
ନୂତନ ସଂସଦ ଭବନରେ ଅନେକ ନୂତନତା ରହିଛି। ଏହାର ତିନୋଟି ପ୍ରବେଶ ଦ୍ବାର ରହିଛି ତଥା ଜ୍ଞାନଦ୍ବାର, ଶକ୍ତିଦ୍ବାର ଓ କର୍ମଦ୍ବାର। ବାହାରକୁ ଯିବା ବାଟଗୁଡ଼ିକର ମଧ୍ୟ ଅଭିନବ ନାମକରଣ କରାଯାଇଛି। ତେଣୁ ରବିବାର ଉଦ୍ଘାଟନ ହେବାକୁ ଥିବା ନୂତନ ସଂସଦ ଭବନକୁ ସଂସଦ ଭବନ ନ କହି କୌଣସି ନୂଆ ନାମ ଦିଆଯିବାର ସମ୍ଭାବନା ରହିଛି। ଦିଲ୍ଲୀର ବହୁ ଗୁରୁତ୍ବପୂର୍ଣ୍ଣ ରାସ୍ତାର ବି ନୂଆ ନାଁ ଦିଆଯାଇଛି। ଗତ ସେପ୍ଟେମ୍ବର ମାସରେ ମୋଦୀ ସରକାର ରାଜପଥର ନାଁ ଦେଇଥିଲେ କର୍ତ୍ତବ୍ୟପଥ।
ନୂଆ ସଂସଦ ଭବନରେ ମହାତ୍ମା ଗାନ୍ଧୀ, ଭୀମରାଓ ଆମ୍ବେଦକର, ସର୍ଦ୍ଦାର ପଟେଲ ଓ ଚାଣକ୍ୟଙ୍କ ସମେତ ମହାପୁରୁଷମାନଙ୍କର ଗ୍ରାନାଇଟ ପ୍ରତିମୂର୍ତ୍ତି ରଖାଯାଇପାରେ। ପ୍ରସ୍ତୁତି ଅନ୍ତିମ ପର୍ଯ୍ୟାୟରେ ପହଞ୍ଚିଥିବା ବେଳେ ଉଦ୍ଘାଟନ ଉତ୍ସବର ମକ୍ ଡ୍ରିଲ ମଧ୍ୟ କରାଯାଇଥିବା ଜଣାପଡ଼ିଛି।
ମଝି ଖୋଲାସ୍ଥାନକୁ ପ୍ରଥମ ଧାଡ଼ିଠାରୁ ଏକ ଫୁଟ ନୀଚା କରାଯାଇଛି, ଯାହାଫଳରେ ପ୍ରତିବାଦ ସମୟରେ କ୍ୟାମେରାର ଆଖି କାହାକୁ ଦେଖାଯିବ ନାହିଁ। ଅଧିବେଶନ ସମୟରେ ବିରୋଧୀ ଦଳଗୁଡ଼ିକ ମଝିକୁ ଚାଲିଆସି ପ୍ଲାକାର୍ଡ ଦେଖାଇବା ବା ସ୍ଲୋଗାନ ଦେବା ସାଧାରଣ କଥା ଥିଲା। ୧୯୯୪ ମାର୍ଗଦର୍ଶିକା ଅନୁଯାୟୀ ପାର୍ଲାମେଣ୍ଟରେ ଗଣ୍ଡଗୋଳକାରୀ ଓ କକ୍ଷତ୍ୟାଗକାରୀଙ୍କୁ କ୍ୟାମେରା ଫୋକସ କରୁ ନ ଥିଲା। କିନ୍ତୁ ୨୦୦୫ରେ ସୋମନାଥ ଚାଟାର୍ଜୀ ବାଚସ୍ପତି ଥିବା ବେଳେ ସେ ଏହି ନିୟମକୁ ବଦଳାଇ ଦେଇଥିଲେ। ବିରୋଧୀଙ୍କ ପ୍ରତିବାଦ ଆଦି ଦୃଶ୍ୟକୁ ବି ଟେଲିକାଷ୍ଟ କରାଯିବା ଉଚିତ ବୋଲି ସେ କହିଥିଲେ। ନୂଆ ସଂସଦ ଭବନ କାର୍ଯ୍ୟକ୍ଷମ ହୋଇଗଲା ପରେ ପୁରୁଣା ଭବନକୁ ଗଣତନ୍ତ୍ରର ମ୍ୟୁଜିୟମରେ ପରିଣତ କରିବାକୁ ସରକାର ନିଷ୍ପତ୍ତି ନେଇଥିବା ଜଣାପଡ଼ିଛି।
Comments are closed.