ନୂଆଦିଲ୍ଲୀ: ଉତ୍ତରାଖଣ୍ଡର ବାସ୍ତବ ନିୟନ୍ତ୍ରଣ ରେଖା (ଏଲ୍ଏସି)ଠାରୁ ୧୧ କିଲୋମିଟର୍ ଦୂରରେ ଚୀନ୍ ସୀମାନ୍ତ ପ୍ରତିରକ୍ଷା ଗାଁ ନିର୍ମାଣ କରୁଥିବା କଥା ବିଶେଷସୂତ୍ରରୁ ଜଣାପଡ଼ିଛି। ଏହି ସୀମାନ୍ତ ଗାଁ ଗୁଡ଼ିକରେ ୨୫୦ ଲେଖାଏଁ ଘର ରହିଛି। ଖାଲି ସେତିକି ନୁହେଁ ଉତ୍ତରାଖଣ୍ଡଠାରୁ ପ୍ରାୟ ୩୫ କିଲୋମିଟର୍ ଦୂରରେ ମଧ୍ୟ ଚୀନ୍ ପ୍ରାୟ ୫୫/୫୬ଟି ଘର ନିର୍ମାଣ କରୁଛି। ଏହି ଘରସବୁ ‘ପିପୁଲସ୍ ଲିବରେସନ୍ ଆର୍ମି’ର ତତ୍ତ୍ବାବଧାନରେ ନିର୍ମାଣ ଚାଲିଛି। ସୀମାନ୍ତବର୍ତ୍ତୀ ଅଞ୍ଚଳରେ ୪୦୦ ଗ୍ରାମ ନିର୍ମାଣ କରିବା ପାଇଁ ଚୀନ୍ ଯୋଜନା କରିଥିବା କୁହାଯାଉଛି। ଉଲ୍ଲେଖଯୋଗ୍ୟ, ଚୀନ୍ ସହିତ ଉତ୍ତରାଖଣ୍ଡର ୩୫୦ କିଲୋମିଟର୍ ଦୀର୍ଘ ସୀମା ରହିଛି। ଜୀବିକା ଉପାର୍ଜନ ସୁବିଧା ନ ପାଇ ଉତ୍ତରାଖଣ୍ଡର ଅଧିକାଂଶ ସୀମାନ୍ତବର୍ତ୍ତୀ ଗ୍ରାମରୁ ଲୋକେ ବାହାରକୁ ଚାଲିଯାଉଛନ୍ତି।
ଭାରତର ଚେତାବନୀ ସତ୍ତ୍ବେ ଚୀନ୍ ଲଗାତାର ଭାବେ ଏହାର ବେପରୁଆ କାର୍ଯ୍ୟକଳାପ ଜାରି ରଖିଛି। ଭାରତ ମଧ୍ୟ ଚୀନ୍ ଉପରେ କଡ଼ା ନଜର ରଖିଛି।
Comments are closed.