ଓଟିପି ସ୍କାମ,ପାକିସ୍ତାନ ଲିଙ୍କ ସନ୍ଦେହରେ ଓଡିଶାରୁ ୩ ଯୁବକ ଗିରଫ

ଭୁବନେଶ୍ୱର : ଓଟିପି ସ୍କାମ ମାମଲାରେ ଜଡିତ ୩ ଯୁବକଙ୍କୁ ଗିରଫ କରିଛି ଏସଟିଏଫ I ଓଡ଼ିଶାରୁ ଏହି ଓଟିପି ସ୍କାମ ଚେର ପାକିସ୍ତାନ ଯାଏଁ ଲମ୍ବିଥିବା ସୂଚନା ମିଳିଛି I ପାକିସ୍ତାନ ଗୁଇନ୍ଦା ଏଜେଣ୍ଟଙ୍କୁ ତଥ୍ୟ ଯୋଗାଉଥିବା ଅଭିଯୋଗରେ ଗିରଫ ହୋଇଥିବା ଯୁବକମାନେ ନୟାଗଡ଼ର ପଠାଣି ସାମନ୍ତ ଲେଙ୍କା, ଦଶପଲ୍ଲାର ସରୋଜ କୁମାର ନାୟକ ଓ ଯାଜପୁରର ସୌମ୍ୟ ପଟନାୟକ। ସେମାନଙ୍କ ନିକଟରୁ ୧୯ଟି ମୋବାଇଲ,୪୭ଟି ସିମକାର୍ଡ, ୬୧ଟି ATM କାର୍ଡ ଓ ୨୩ଟି ସିମ କଭର ଜବତ କରିଛି ଏସଟିଏଫ I

ଓଟିପି ସେୟାରିଙ୍ଗ ସ୍କାମ କରି କିଛି ପାକିସ୍ଥାନୀ ଇଣ୍ଟେଲିଜେନ୍ସ ଅଧିକାରୀ ଓ ISI ଏଜେଣ୍ଟମାନଙ୍କୁ ଲିଙ୍କ ଜେନେରେଟ କରି ତଥ୍ୟ ଦେଉଥିଲେ ଅଭିଯୁକ୍ତ । ଏଥିପାଇଁ ଭାରତରେ ଥିବା ପାକିସ୍ତାନୀ ଏଜେଣ୍ଟ ମୋଟା ଅଙ୍କର ଅର୍ଥ ଦେଉଥିଲେ ।

ଏମାନଙ୍କ ମଧ୍ୟରୁ ନୟାଗଡ଼ର ପଠାଣି ସାମନ୍ତ ଲେଙ୍କା ନୟାଗଡ଼ ଆଇଟିଆଇ ଶିକ୍ଷକ ରହିଛନ୍ତି I ସେହିପରି ଦଶପଲ୍ଲାର ସରୋଜ କୁମାର ନାୟକ ଆଇଟିଆଇ ନିକଟରେ ଘର ଭଡା ନେଇ ରହୁଥିଲେ I ଏମାନେ ପାଖାପାଖି ଏକ ବର୍ଷରୁ ଉର୍ଧ୍ଵ ହେବ ଭାରତରେ ଲୁଚିଥିବା ପାକିସ୍ତାନୀ ଗୁଇନ୍ଦା ଏଜେଣ୍ଟଙ୍କ ସମ୍ପର୍କରେ ଆସିଥିଲେ। ଏହାପରେ ସୋସିଆଲ ମିଡ଼ିଆ ପ୍ଳାଟଫର୍ମ, ହ୍ୱାଟ୍ସଆପ, ଟେଲିଗ୍ରାମ, ଇନଷ୍ଟାଗ୍ରାମରେ ବିଭିନ୍ନ ଆକାଉଣ୍ଟ କରି ପାକିସ୍ଥାନୀ ଏଜେଣ୍ଟଙ୍କୁ ଲିଙ୍କ ସେୟାର କରୁଥିଲେ ଅଭିଯୁକ୍ତମାନେ । ଏହି ଲିଙ୍କ ମାଧ୍ୟମରେ ପାକିସ୍ତାନୀ ଏଜେଂଟମାନେ ଆତଙ୍କବାଦୀଙ୍କ ସହ ଯୋଗାଯୋଗ କରୁଥିଲେ ।