ଶାନ୍ତି ଶୃଙ୍ଖଳାର ସହ ଚାଲିଛି ଝାରସୁଗୁଡା ଉପ ନିର୍ବାଚନ,ଭୋଟ ଦେଲେ ପ୍ରାର୍ଥୀ

ଝାରସୁଗୁଡ଼ା: ଝାରସୁଗୁଡ଼ା ଉପନିର୍ବାଚନ ପାଇଁ ଚାଲିଛି ଭୋଟ ଗ୍ରହଣ I ସକାଳ ୭ଟାରୁ ଭୋଟ ଗ୍ରହଣ ଆରମ୍ଭ ହୋଇ ସଂଧ୍ୟା ୬ଟା ଯାଏ ଚାଲିବ I ୪ଟି ବ୍ଲକ ଓ ଗୋଟିଏ ପୌରପରିଷଦର ୨୫୩ ବୁଥରେ ମତଦାନ କରାଯାଉଛି। ୯ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ଝାରସୁଗୁଡ଼ାର ୨ଲକ୍ଷ ୨୧ ହଜାରରୁ ଅଧିକ ଭୋଟର ।

ଏଥିପାଇଁ ଝାରସୁଗୁଡ଼ା ମ୍ୟୁନିସପାଲିଟି ସହ ଝାରସୁଗୁଡ଼ା, କୋଲାବିରା, ଲଇକେରା ଓ କିରିମିରା ବ୍ଲକରେ ମୋଟ୍‌ ୨୫୩ଟି ବୁଥ୍‌ କରାଯାଇଛି । ୧୧୬ଟି ବୁଥ୍‌ ସମ୍ବେଦନଶୀଳ । ୧୪୪ ବୁଥ୍‌ରେ ସେଣ୍ଟ୍ରାଲ ଟିମ୍‌ ନିୟୋଜିତ ରହିଛନ୍ତି । ଶତ ପ୍ରତିଶତ ବୁଥ୍‌ରେ େଓ୍ଵବକାଷ୍ଟିଂ କରାଯାଉଛି । ୬୯ଟି ବୁଥ୍‌ରେ ନିଯୁକ୍ତ କରାଯାଇଛି ମାଇକ୍ରୋ ଅବଜର୍ଭର । ୨୬ଟି ପିଙ୍କ ବୁଥରେ ଭୋଟରଙ୍କ ପାଇଁ ପିଇବା ପାଣି ଓ ଦିବ୍ୟାଙ୍ଗଙ୍କ ପାଇଁ ହୁଇଲ ଚେୟାର ବ୍ୟବସ୍ଥା କରାଯାଇଛି । ବରିଷ୍ଠ ନାଗରିକମାନେ ଘରୁ ମତଦାନ କେନ୍ଦ୍ରକୁ କିପରି ଆସିିବେ ସେନେଇ ବ୍ୟବସ୍ଥା କରିଛି ପ୍ରଶାସନ । ମତଦାନକୁ ଅବାଧ, ମୁକ୍ତ ଓ ନିରପେକ୍ଷ କରିବାକୁ ବ୍ୟାପକ ପଦକ୍ଷେପ ନିଆଯାଇଛି ।

ପ୍ରବଳ ଖରା ଓ ଗୁଳୁଗୁଳି ସତ୍ତ୍ବେ ଝାରସୁଗୁଡାବାସୀ ନିଜର ନେତା ବାଛିବାକୁ ବହୁ ସଂଖ୍ୟାରେ ଭୋଟ ଦେବାକୁ ଆସୁଛନ୍ତି। ଖରାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ମଧ୍ୟ ଭୋଟ ଗ୍ରହଣ କେନ୍ଦ୍ର ଗୁଡିକରେ ବ୍ୟାପକ ବ୍ୟବସ୍ଥା କରାଯାଇଛି। ତେବେ ଏହାରି ମଧ୍ୟରେ ଝାରସୁଗୁଡ଼ା ପୌରପାଳିକା ଅନ୍ତର୍ଗତ ସରବାହାଲର ୩୩ ନମ୍ବର ବୁଥରେ ବିଜେଡି ପ୍ରାର୍ଥୀ ଦୀପାଳି ଦାସ ମତଦାନ କରିଥିବା ଜଣାଯାଇଛି। ବିଜେଡି ପ୍ରାର୍ଥୀ ଦୀପାଳି ଦାସ ଭାଇ ବିଶାଳ ଦାସ ଓ ମା ମୀନତି ଦାସଙ୍କ ସହ ଆସି ଭୋଟ୍ ଦେଇଛନ୍ତି। ଏହାପୂର୍ବରୁ ସେ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ। ମତଦାନ କରିବା ପରେ ସେ ଝାରସୁଗୁଡ଼ାର ଜନସାଧାରଣଙ୍କୁ ସେମାନଙ୍କର ଭୋଟ ଦାନ ମୌଳିକ ଅଧିକାର ସାବ୍ୟସ୍ତ କରିବାକୁ ନିବେଦନ କରିଛନ୍ତି।

ଏଣେ ସକାଳେ ଗୁଜୁରାଟୀ କଲୋନିର ବୁଥରେ ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀ ମତଦାନ କରିଥିବା ଜଣାଯାଇଛି। ତାଙ୍କ ସହ ପତ୍ନୀ ମଧ୍ୟ ସେଠାରେ ଭୋଟ୍ ଦାନ କରିଛନ୍ତି। ଆଜି ସକାଳ ୯ଟା ସୁଦ୍ଧା ଝାରସୁଗୁଡ଼ାରେ ୯.୭୫ ପ୍ରତିଶତ ମତଦାନ ହୋଇଛି।

ଝାରସୁଗୁଡ଼ା ବିଧାନସଭା ଉପନିର୍ବାଚନ ପାଇଁ ୩ ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ସହ ମୋଟ ୯ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି I ବିଜେଡିରୁ ଦୀପାଳି ଦାସ, ବିଜେପିରୁ ଟଙ୍କଧର ତ୍ରିପାଠୀ ଓ କଂଗ୍ରେସରୁ ତରୁଣ ପାଣ୍ଡେଙ୍କ ମଧ୍ୟରେ ମୁଖ୍ୟତଃ ଲଢ଼େଇ ହେବ ବୋଲି ଭୋଟରମାନେ ପ୍ରକାଶ କରିଛନ୍ତି। ପ୍ରତ୍ୟେକ ବୁଥରେ ଶୃଙ୍ଖଳାର ସହିତ ଭୋଟରମାନେ ମତଦାନ କରିବାରେ ଲାଗିଛନ୍ତି।