ନୂଆଦିଲ୍ଲୀ : ମହାରାଷ୍ଟ୍ରର ବରିଷ୍ଠ ରାଜନେତା ଶରଦ ପାୱାର ଏନସିପି ସଭାପତି ପଦରୁ ଇସ୍ତଫା ଦେବାର ୨ ଦିନ ପରେ ଆଜି ଏନସିପି କମିଟି ପାୱାରଙ୍କ ଇସ୍ତଫା ପ୍ରତ୍ୟାଖ୍ୟାନ କରିଦେଇଛି। ଏନସିପିର ପରବର୍ତ୍ତୀ ସଭାପତି ଚୟନ ପାଇଁ ପାୱାର ଏକ ୧୮ ଜଣିଆ ସଦସ୍ୟ ବିଶିଷ୍ଟ କମିଟି ଗଠନ କରିଥିଲେ। ଆଜି ଏହି କମିଟି ବସିଥିବାବେଳେ କମିଟି ପାୱାରଙ୍କ ଇସ୍ତଫାକୁ ପ୍ରତ୍ୟାଖ୍ୟାନ କରିଦେଇଛି। ଏନସିପିର ମୁଖପାତ୍ରମାନେ ଦଳୀୟ ନେତା ପ୍ରଫୁଲ ପଟେଲଙ୍କ ନିକଟରେ ଏକ ସୁପାରିସ ପତ୍ର ଦାଖଲ କରି କହିଛନ୍ତି ଯେ ପାୱାର ହିଁ ଦଳର ସଭାପତି ରହିବେ। ଆମେମାନେ କାର୍ଯ୍ୟକାରୀ ସଭାପତି ବାଛିବା କିନ୍ତୁ ପାୱାର ଦଳର ସଭାପତି ରହିବେ। ଏନସିପି କମିଟି ବୈଠକ ପରେ ଏନସିପି ନେତା ପ୍ରଫୁଲ ପଟେଲ ଶରଦ ପାୱାରଙ୍କୁ କହିଛନ୍ତି, ରାଜ୍ୟ ଦଳ ଏବଂ ଦେଶ ଆପଣଙ୍କୁ ଆବଶ୍ୟକ କରେ। ଆପଣ ଏହି ଦଳର ପ୍ରତିଷ୍ଠାତା। ଦେଶରେ ଆପଣ ଜଣେ ସମ୍ମାନିତ ନେତା। ଆପଣଙ୍କ ପ୍ରଭାବ ସାରା ଦେଶରେ ଦେଖିବାକୁ ମିଳିଛି ବୋଲି ଏନସିପି ନେତା ପ୍ରଫୁଲ ପଟେଲ କହିଛନ୍ତି। ପ୍ରଫୁଲ ପଟେଲ କହିଛନ୍ତି ସର୍ବ ସମ୍ମତି କ୍ରମେ ପାୱାରଙ୍କ ଇସ୍ତଫାକୁ ପ୍ରତ୍ୟାଖ୍ୟାନ କରାଗଲା। ଦଳ ପାୱାରଙ୍କୁ ଏହାର ସଭାପତି ରହିବାକୁ ଚାହେ ବୋଲି ସେ କହିଛନ୍ତି। ଆଜି ବୈଠକର ଅବ୍ୟବହିତ ପୂର୍ବରୁ ଏନସିପି କର୍ମୀମାନେ ଶରଦ ପାୱାରଙ୍କ ସମର୍ଥନରେ ମୁମ୍ବାଇ ପାର୍ଟି ଅଫିସ ବାହାରେ ସ୍ଲୋଗାନ ଦେଇଥିଲେ। ଉଲ୍ଲେଖଯୋଗ୍ୟ ଯେ ଶରଦ ପାୱାର ଗତକାଲି ଦଳୀୟ ନେତାମାନଙ୍କୁ ଭେଟି କହିଥିଲେ ଯେ ଦଳର ଭବିଷ୍ୟତ ପାଇଁ ସେ ଏହି ନିଷ୍ପତ୍ତି ନେଇଛନ୍ତି।
Comments are closed.