ଆଜି ଶିମିଳିପାଳ ବୁଲିଯିବେ ରାଷ୍ଟ୍ରପତି

ବାରିପଦା : ତିନିଦିନିଆ ଓଡିଶା ଗସ୍ତରେ ଆସିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ I ଗତକାଲି ରାରଂଗପୁର ସ୍ଥିତ ପାହାଡ଼ପୁର ଗାଁରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇଥିଲେ I ଆଜି ଦ୍ଵିତୀୟ ଦିନରେ ରାଷ୍ଟ୍ରପତିଙ୍କର ଶିମିଳିପାଳ ଅଭୟାରଣ୍ୟ ଭ୍ରମଣ କରିବାର କାର୍ଯ୍ୟକ୍ରମ ରହିଛି I ଶିମିଳିପାଳର ପ୍ରାୟ ୮୦କିମି ବୁଲିବାକୁ ଥିବା ବେଳେ ଏଥିପାଇଁ ସ୍ୱତନ୍ତ୍ର ଗାଡ଼ିର ବ୍ୟବସ୍ଥା ହୋଇଛି। ଦିନ ୧୨ଟାରେ ଶିମିଳିପାଳରେ ପହଞ୍ଚିବା ପରେ ସେଠାରେ ଅଢେଇ ଘଣ୍ଟା ଅର୍ଥାତ୍ ଦିନ ୨ଟା ୩୦ ମିନିଟ୍ ପର୍ଯ୍ୟନ୍ତ ରହିବେ। ସୁରକ୍ଷା ଦୃଷ୍ଟିକୁ ଆଜି ସାଧାରଣ ପର୍ଯ୍ୟଟକଙ୍କ ପାଇଁ ଶିମିଳିପାଳ ଅଭୟାରଣ୍ୟ ବନ୍ଦ ରହିଛି ।

ଶିମିଳିପାଳ ଯିବା ପୂର୍ବରୁ ରାଇରଙ୍ଗପୁରସ୍ଥିତ ଜଗନ୍ନାଥ ମନ୍ଦିର ଦର୍ଶନ ପାଇଁ ଯିବେ ମହାମହିମ। ଦର୍ଶନ ପରେ ଆଜି ପଣ୍ଡିତ ରଘୁନାଥ ମୁର୍ମୁଙ୍କ ଜନ୍ମବାର୍ଷିକୀ ଅବସରରେ ତାଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବେ I

ଗତକାଲି ନିଜ ଘରେ ରହିଥିଲେ ରାଷ୍ଟ୍ରପତି। ସ୍ଥାନୀୟ ଅଂଚଳବାସୀଙ୍କ ସହ ଏକ ଆଲୋଚନା କାର୍ଯ୍ୟକ୍ରମ ପରେ ରାଇରଙ୍ଗପୁରର ମହୁଲଡିହାସ୍ଥିତ ନିଜ ବାସଭବନ ଠାରେ ରାତ୍ରି ରହଣି କରି ବିଶ୍ରାମ ନେଇଥିଲେ। ରାଷ୍ଟ୍ରପତି ହେବା ପରେ ନିଜ ଘରେ ରାତ୍ରି ରହଣି କରିଥିବା ବେଳେ ଆତ୍ମୀୟସ୍ୱଜନଙ୍କ ସହିତ ଆଲୋଚନା କରିଥିଲେ ।

ଗସ୍ତ କାର୍ଯ୍ୟକ୍ରମରେ ବାହାରିବା ପୂର୍ବରୁ ରାଷ୍ଟ୍ରପତି ସକାଳ ଜଳଖିଆ ଖାଇଛନ୍ତି। ମିଳିଥିବା ସୂଚନା ଅନୁଯାୟୀ, ସ୍ଥାନୀୟ ବ୍ରହ୍ମକୁମାରୀ କେନ୍ଦ୍ରର ଭାଇ ଭଉଣୀମାନେ ଆଣିଥିବା ଜଳଖିଆ ସେ ଖାଇଛନ୍ତି। ଏଥିରେ ତାଙ୍କୁ ମଣ୍ଡା ପିଠା, ଛେନା ଗଜା , ଚିତଉ ପିଠା ଓ ପୋଡ ପିଠା ଆଦି ପରଷା ଯାଇଥିବା ଜଣାଯାଇଛି। ଏହାଛଡ଼ା ରାଷ୍ଟ୍ରପତି ଦ୍ରୌପଦୀ ମୁର୍ମୁ ହଳଦୀମିଶା କ୍ଷୀର, ଗ୍ରୀନ୍ ଟି ଆଦି ସେବନ କରିଥିବା ଜଣାଯାଇଛି। ଏହାପରେ ରାଷ୍ଟ୍ରପତି ରାଇରଙ୍ଗପୁରସ୍ଥିତ ବାବା ପୁନେଶ୍ୱରାୟ ଶିବ ମନ୍ଦିରରେ ପୂଜାର୍ଚ୍ଚନା କରିଛନ୍ତି। ତାଙ୍କ ସହ ରାଜ୍ୟପାଳ ପ୍ରଫେସର୍ ଗଣେଶୀ ଲାଲ୍ ମଧ୍ୟ ଉପସ୍ଥିତ ଅଛନ୍ତି।