ନୂଆଦିଲ୍ଲୀ: ୨୦୦୮ ମସିହାରେ ମହାରାଷ୍ଟ୍ରରେ ଜଣେ ୪ ବର୍ଷର ଶିଶୁକୁ ଦୁଷ୍କର୍ମ ପରେ ଅତି ନିର୍ମମ ଭାବେ ପଥରରେ ଛେଚି ହତ୍ୟା କରିଥିବା ଜଣେ ଦୋଷୀର କ୍ଷମା ଆବେଦନକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଖାରଜ କରିଦେଇଛନ୍ତି। ବସନ୍ତ ସମ୍ପତ ଦୁପାରେ ନାମକ ଜଣେ ବ୍ୟକ୍ତି ଏହି ଜଘନ୍ୟ କାଣ୍ଡ ଘଟାଇଥିଲା। ଅପରାଧ କରିବା ସମୟରେ ତାକୁ ୫୫ ବର୍ଷ ହୋଇଥିଲା। ଏହି ମାମଲାରେ ତାକୁ ମୃତ୍ୟୁଦଣ୍ଡାଦେଶ ହୋଇଥିଲା। ୨୦୦୮ ମସିହାରେ ଦୋଷୀ ବସନ୍ତକୁ ପ୍ରଥମେ ବମ୍ବେ ହାଇକୋର୍ଟ ମୃତ୍ୟୁ ଦଣ୍ଡାଦେଶ ଦେଇଥିଲେ। ବସନ୍ତ ଏହାପରେ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲା। କିନ୍ତୁ ନଭେମ୍ବର ୨୬, ୨୦୧୪ରେ ସୁପ୍ରିମକୋର୍ଟ ବମ୍ବେ ହାଇକୋର୍ଟଙ୍କ ରାୟକୁ କାଏମ ରଖିଥିଲେ। ବସନ୍ତ ସମ୍ପତ ପୁଣିଥରେ ସୁପ୍ରିମକୋର୍ଟରେ ରିଭ୍ୟୁ ପିଟିସନ ଦାଖଲ କରିଥିଲା। କିନ୍ତୁ ସୁପ୍ରିମକୋର୍ଟ ୨୦୧୭ ମେ’ ୩ରେ ଦୋଷୀ ବସନ୍ତର ରିଭ୍ୟୁ ପିଟିସନ ଖାରଜ କରିବା ସହ ତା’ର ଫାଶୀଦଣ୍ଡାଦେଶ କାଏମ ରଖିଥିଲେ। ଚଳିତ ବର୍ଷ ମାର୍ଚ୍ଚ ୨୮ ତାରିଖରେ ରାଷ୍ଟ୍ରପତିଙ୍କ ସଚିବାଳୟକୁ ଏ ବାବଦରେ କେନ୍ଦ୍ର ଗୃହ ମନ୍ତ୍ରାଳୟର ସୁପାରିସ ମିଳିଥିଲା।। ରାଷ୍ଟ୍ରପତି ଚଳିତ ବର୍ଷ ଏପ୍ରିଲ ୧୦ ତାରିଖରେ ଦୋଷୀ ବସନ୍ତର କ୍ଷମା ଆବେଦନକୁ ଖାରଜ କରିଦେଇଛନ୍ତି।
Comments are closed.