ଟ୍ରିପଲ ମର୍ଡର ଘଟଣାର ପର୍ଦାଫାଶ

ବରଗଡ଼ : ବରଗଡ଼ ଜିଲା ଭେଡେନ ଥାନା ଆଖିଫୁଟା ଗାଁରେ ହୋଇଥିବା ଟ୍ରିପଲ ମର୍ଡର ଘଟଣାର ପର୍ଦ୍ଦାଫାସ କଲା ପୋଲିସ । ଏହି ଘଟଣାର ମୁଖ୍ୟ ଅଭିଯୁକ୍ତ ସହ ଅନ୍ୟ ଜଣେ ଗିରଫ I ଅଭିଯୁକ୍ତ ୨ଜଣ ହେଲେ ହତ୍ୟାକାଣ୍ଡ ର ଶିକାର ହୋଇଥିବା ଟଙ୍କଧର ସାହୁ ଙ୍କ ସମ୍ପର୍କୀୟ ଭଣଜା ଅନାମ ସାହୁ ଓ ତା’ସହଯୋଗୀ ଶ୍ରାବଣ ରଣା I ଅନାମ ସାହୁର ଘର ସୋନପୁର ଜିଲ୍ଲା ଡୁଙ୍ଗୁରିପାଲି ଥାନା ଅନ୍ତର୍ଗତ ଟୁନିଆମୁଣ୍ଡା ଗାଁରେ ହୋଇଥିବାବେଳେ ଓ ଶ୍ରବଣ ରଣାର ଘର ଛତିଶଗଡ଼ ରାଜ୍ୟ ମହାସମୁନ୍ଦ ଜିଲା ଵଲୋଦା ଗାଁରେ ।

ଘଟନାନୁସାରେ,ଆଖିଫୁଟା ଗାଁର ଟଙ୍କଧର ସାହୁଙ୍କର ୨ ପତ୍ନୀ ଥିଲେ I ପ୍ରଥମ ପତ୍ନୀ ଦ୍ରୌପଦୀଙ୍କର ପିଲାପିଲି ନହେବାରୁ ସେ ମାଧବୀଙ୍କୁ ୨ୟ ବିବାହ କରିଥିଲେ I ତେବେ ୨ୟ ପତ୍ନୀଙ୍କର ମଧ୍ୟ କୌଣସି ପିଲାପିଲି ହୋଇ ନଥିଲେ I ତେଣୁ ସେ ସମ୍ପର୍କୀୟ ଭଣଜା ଅନାମ ସାହୁ ଓରଫ ବାସୁଦେବଙ୍କୁ ପୌଷ୍ୟ ପୁତ୍ର ଭାବରେ ଗ୍ରହଣ କରିବାକୁ ନିଜ ଘରେ ଆଣି ରଖିଥିଲେ I କିନ୍ତୁ ଅନାମ ଅତ୍ୟଧିକ ନିଶାଖୋର ସହିତ ଚୋରି ମଧ୍ୟ କରୁଥିଲେ I ଏପରିକି ଗୋଟିଏ ସ୍କୁଟି ଓ ୩୦ ହଜାର ଟଙ୍କା ନେଇ ଫେରାର ଥିବାବେଳେ ଛତିଶଗଡ଼ ପୋଲିସ ଦ୍ବାରା ଧରା ପଡିଥିଲା । ଏହାକୁ ନେଇ ଉଭୟଙ୍କ ମଧ୍ୟରେ ଝଗଡା ହୋଇଥିଲା । ଏହି ଘଟଣାକୁ ନେଇ ଟଙ୍କଧର ଓ ଅନାମଙ୍କ ମଧ୍ୟରେ ଝଗଡ଼ା ହୋଇଥିଲା। ସେହି ଦିନ ଠାରୁ ସେମାନଙ୍କ ମଧ୍ୟରେ କଳିଝଗଡ଼ା ଲାଗି ରହୁଥିଲା। ପରବର୍ତ୍ତୀ ସମୟରେ ଅନାମଙ୍କୁ ଆଉ ପୋଷ୍ୟ ସନ୍ତାନ ଭାବେ ଗ୍ରହଣ ନ କରିବାକୁ ଟଙ୍କଧର ନିଷ୍ପତ୍ତି ନେଇଥିଲେ। ଅନାମ ଏହା ଜାଣିବା ପରେ ପ୍ରତିଶୋଧ ପରାୟଣ ହୋଇପଡ଼ିଥିଲେ।ଏହାର ପ୍ରତିଶୋଧ ନେବାକୁ ଯାଇ ଅଭିଯୁକ୍ତ ବାସୁଦେବ ଗତ ଏପ୍ରିଲ ୧୭ ତାରିଖରେ ତାମିଲନାଡୁରୁ ଟ୍ରେନରେ ବରଗଡ଼ ଆସି ରାତି ପ୍ରାୟ ୪ ଟା ସମୟରେ ଘର ପଛପଟୁ ଭିତରକୁ ପଶିଥିଲା ।

ପ୍ରଥମେ ଟଙ୍କଧରଙ୍କୁ ଶୋଇଥିବା ଅବସ୍ଥାରେ ଏକ କାଠଫାଳିଆରେ ଆକ୍ରମଣ କରିଥିବା ବେଳେ ପରେ ଏକ କୋଦାଳରେ ତାଙ୍କର ଦୁଇ ପତ୍ନୀଙ୍କୁ ଆକ୍ରମଣ କରିଥିଲା । ଅତ୍ୟଧିକ ରକ୍ତସ୍ରାବ ଯୋଗୁଁ ତିନିଜନଙ୍କର ମୃତ୍ୟୁ ହୋଇଥିବା ବେଳେ ବାକ୍ସ ଭାଙ୍ଗି ସୁନା ନେଇ ଗାଁରୁ ଫେରାର ହୋଇଥିଲା । ତେବେ ପୋଲିସ ଛତିଶଗଡ଼ରୁ ବାସୁଦେବଙ୍କୁ ଗିରଫ କରିବା ପରେ ଅଭିଯୁକ୍ତ ଠାରୁ ସୁନା କିଣିବା ଅଭିଯୋଗରେ ଶ୍ରବଣ ରଣାକୁ ମଧ୍ୟ ଗିରଫ କରି ସୁନା ଉଦ୍ଧାର କରିଛି । ପୂର୍ବରୁ ଗତ ଏପ୍ରିଲ ୧୮ରେ ଆଖିଫୁଟା ଗାଁର ଟଙ୍କଧର ସାହୁ ଏବଂ ତାଙ୍କର ଦୁଇ ସ୍ତ୍ରୀ ଦ୍ରୌପଦୀ ଓ ମାଧବୀ ସାହୁଙ୍କ ରକ୍ତାକ୍ତ ମୃତଦେହ ତାଙ୍କ ଘରୁ ଉଦ୍ଧାର ହୋଇଥିଲା ।