ସୁନ୍ଦରଗଡ଼ :ରାଜ୍ୟ ସରକାର ଓଏଏସ ସ୍ତରରରେ ଅଦଳବଦଳ କରିଛନ୍ତି I ସେହି ଅନୁଯାୟୀ କୋଇଡା ବିଡ଼ିଓ ପଲ୍ଲବୀ ରାଣୀ ରାଜଙ୍କ ବଦଳି ହୋଇଛି I ତାଙ୍କୁ ସମ୍ବଲପୁର ଆରଡିସିଙ୍କ କାର୍ଯ୍ୟାଳୟରେ ଯୋଗ ଦେବାକୁ ଆଦେଶ ହୋଇଛି। ଏ ନେଇ ଆଜି ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି।
ପଲ୍ଲବୀ ରାଣୀ ରାଜ ତିନି ବର୍ଷରୁ ଅଧିକ କୋଇଡା ବ୍ଲକରେ କାର୍ଯ୍ୟ କରିବା ସହିତ ବିଭିନ୍ନ ବିବାଦରେ ଛନ୍ଦି ହୋଇ ପଡ଼ିଥିଲେ। ତାଙ୍କ ନାମରେ ବହୁ ଅଭିଯୋଗ ରହିଥିଲା । ଏପରିକି ତାଙ୍କ ବଦଳି ପାଇଁ ସ୍ଥାନୀୟ ଅଂଚଳରେ ଆନ୍ଦୋଳନ ହେବା ସହ ବ୍ଲକ କର୍ମଚାରୀମାନେ କଲମ ଛାଡ଼ କରିଥିଲେ । ତାଙ୍କ ବଦଳି ପାଇଁ ବିଧାନସଭାରେ ବଣେଇ ବିଧାୟକ ଲକ୍ଷ୍ମଣ ମୁଣ୍ଡାଙ୍କ ସମେତ ବିରୋଧୀ ଦଳ ବିଧାୟକମାନେ ଦାବି କରିଥିଲେ । ସେହିପରି କିଛି ଦିନ ତଳେ ବିଡ଼ିଓଙ୍କୁ ତାଙ୍କ ବାପା ଓ ଭାଇ ସରକାରୀ କ୍ୱାର୍ଟର୍ସରେ ପଶି ମାଡ଼ ମାରିଥିବା ବିଡ଼ିଓ ପଲ୍ଲବୀ ରାଣୀ ରାଜ ଅଭିଯୋଗ କରିଥିଲେ। ବିଡ଼ିଓଙ୍କ ଅଭିଯୋଗ ଆଧାରରେ ତାଙ୍କୁ ବାପାଙ୍କୁ ଗିରଫ କରାଯାଇ ଜେଲ ପଠାଯାଇଥିଲା। ସେବେଠାରୁ ବିଡିଓ ପଲ୍ଲବୀ ରାଣୀ ଆହୁରି ବିବାଦ ଭିତରେ ଛନ୍ଦି ହୋଇପଡ଼ିଥିଲେ।
ସେହିଭଳି ଭୁବନେଶ୍ବର ତହସିଲଦାର ଥିବା ପ୍ରଦୀପ କୁମାର ସାହୁଙ୍କର ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗକୁ ବଦଳି ହୋଇଥିବା ବେଳେ ଭୁବନେଶ୍ବର ତହସିଲଦାର ଭାବରେ ମାନସ ରଞ୍ଜନ ସ୍ବାଇଁଙ୍କୁ ନିଯୁକ୍ତି ମିଳିଛି। ଖପ୍ରାଖୋଲ ବିଡିଓ ଭାବରେ ଅଭିଳାଷ ପୁରୋହିତଙ୍କର ବଦଳି ହୋଇଥିବା ବେଳେ ଅନିଲ କୁମାର କୁଲ୍ଲୁ ତରଭା ବିଡିଓ, କ୍ଷୀରୋଦ ଦାସ ଯାଜପୁର ଡେପୁଟି କଲେକ୍ଟର, ସମୀର ବେହେରା ପଟ୍ଟାମୁଣ୍ଡାଇ ତହସିଲଦାର, ଦିଲୀପ କୁମାର ପ୍ରଧାନ ବାମରା ତହସିଲଦାର, ମୁକୁଟମଣୀ ଜେସ୍ ଓ ଜୋବିତା ତିର୍କି ଜଳସମ୍ପଦ ବିଭାଗ, ଉତ୍ତମ କୁମାର ଜେନା ଖଇରା ବିଡିଓ, ପର୍ଶୁରାମ ପଣ୍ଡାଙ୍କର ସୁବର୍ଣ୍ଣରେଖା ଇରିଗେସନ ପ୍ରକଳ୍ପକୁ ବଦଳି ହୋଇଛି।
Comments are closed.