ମନ୍ତ୍ରୀ ନବ ଦାସ ହତ୍ୟାକାଣ୍ଡ କୁ ନେଇ ବିଜୟ ମହାପାତ୍ରଙ୍କ ବିସ୍ଫୋରକ ବୟାନ

ଭୁବନେଶ୍ୱର : ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ନେଇ ପୁଣି ପ୍ରଶ୍ନ ଉଠାଇଛନ୍ତି ବିଜେପି ନେତା ବିଜୟ ମହାପାତ୍ର I ସେ ଆରୋପ ଲଗାଇଛନ୍ତି କି ଏଥିରେ ବହୁ ବଡ଼ ବଡିଆଙ୍କ ହାତ ଥିବାରୁ ତଦନ୍ତ ବାଟବଣା ହେଉଛି I କାରଣ ମନ୍ତ୍ରୀ ନାଵ ଦାସଙ୍କ ହତ୍ୟାକାଣ୍ଡକୁ ୪୦ ଦିନ ପୁରିଥିଲେ ମଧ୍ୟ କ୍ରାଇମବ୍ରାଞ୍ଚ ଏପର୍ଯ୍ୟନ୍ତ କୌଣସି ଠୋସ ତଥ୍ୟ ଯୋଗାଡ଼ କରିପାରିନାହିଁ I କିମ୍ବା ମୃତ୍ୟୁ ପଛର ରହସ୍ୟ କ’ଣ ସେ ନେଇ କ୍ରାଇମବ୍ରାଞ୍ଚ ପାଖରେ କିଛି ବି ସୁରାଗ ନାହିଁ। ଏହା ଏକ ହାଇ ପ୍ରୋଫାଇଲ ହତ୍ୟାକାଣ୍ଡ ହୋଇଥିବା ବେଳେ ଏହାକୁ ମାମୁଲି ଭାବେ ନିଆଯାଉଛି। କ୍ରାଇମବ୍ରାଞ୍ଚ ଓ ରାଜ୍ୟ ସରକାର ଏହାକୁ ଗୁରୁତର ସହ ନେବାକୁ ଚାହୁଁ ନାହାନ୍ତି। ଏହାର ତଦନ୍ତକୁ ଜଲଦି ଶେଷ ପର୍ଯ୍ୟାୟରେ ପହଞ୍ଚାଇବାକୁ ଷଡ଼ଯନ୍ତ୍ର ଚାଲିଛି।

ଏହାବାଦ ଶ୍ରୀ ମହାପାତ୍ର କହିଛନ୍ତି କି ତଦନ୍ତକୁ ବିଳମ୍ବ କରାଇବାରେ ମୁଖ୍ୟ ନାୟକ ହେଉଛନ୍ତି ୨ ଅଣ ଓଡ଼ିଆ ଅଫିସର। ସେମାନଙ୍କ ମଧ୍ୟରୁ ଜଣେ ଆଇଏଏସ୍‌ ଓ ଜଣେ ଆଇପିଏସ୍‌ ଅଫିସର। ସେମାନେ ଏହି ଘଟଣାର ପ୍ରକୃତ ତଦନ୍ତ ଚାହୁଁ ନାହାନ୍ତି। ପରଦା ପଛରେ ଓ ବାହାରେ ସେମାନେ ହିଁ ଘଟଣାକୁ ନିଜ ନିୟନ୍ତ୍ରଣରେ ରଖିଛନ୍ତି।

ସେମାନଙ୍କୁ ସୁରକ୍ଷା ଦେବା ପାଇଁ ମାମଲାରେ ୧୨୦ (ବି) ଦଫା ଲଗାଯାଇ ନାହିଁ। ଏହି ଦଫା ଲାଗିନି ବୋଲି ଷଡ଼ଯନ୍ତ୍ର ଦିଗ ଉପରେ ତଦନ୍ତ ହେଉନାହିଁ। ଏହା ଓଡ଼ିଶାରେ ଏକ ଭୟଙ୍କର ଅଧ୍ୟାୟ ସୃଷ୍ଟି କରିବ।’ ନବ ଦାସ ହତ୍ୟାକାଣ୍ଡ ନେଇ ଏଭଳି ସାଙ୍ଘାତିକ ଅଭିଯୋଗ କରିଛନ୍ତି ବିଜେପି ନେତା ବିଜୟ ମହାପାତ୍ର।

ଆଜି ଏକ ସାମ୍ବାଦିକ ସମ୍ମିଳନୀ କରି ଶ୍ରୀ ମହାପାତ୍ର କହିଛନ୍ତି, ସରକାର କହିଲେ ବିଶ୍ୱ ସ୍ତରିୟ ତଦନ୍ତ କରିବୁ । କିନ୍ତୁ ଏଫବିଆଇ କୁଆଡେ ଗଲା କିଛି ଜଣା ପଡୁନି । ଏକଚାଟିଆ ଭାବେ ସରକାର ଏହି ତଦନ୍ତ କରୁଛନ୍ତି । ସବୁ ଦିଗକୁ ଯାଉ ନାହାଁନ୍ତି। କାହାକୁ ପ୍ରୋଟକେସନ ଦେବା ପାଇଁ ପୋଲିସ ଚାହୁଁଛି ବୁଝା ପଡୁନି । ଜଷ୍ଟିସ ଦାସ କଣ ଏହି ଘଟଣାର ସୁପର ଭାଇଜ କରିଛନ୍ତି । ତାଙ୍କୁ ବି ପ୍ରଶ୍ନ କରାଯିବା ଦରକାର । ପାଗଳାର ସ୍କ୍ରିପ୍ଟ ଲେଖି ପ୍ରଚାର କରାଯିବା ପଛରେ ଗୋପାଳକୁ ସୁରକ୍ଷା ଦେବାର ଷଡ଼ଯନ୍ତ୍ର ରହିଛି । ସେକ୍ସନ ୮୪ ଆଇପିସି କହୁଛି ଏହାକୁ ପ୍ରମାଣ କରିବା ପାଇଁ କେବଳ ଗୋପାଳ ଦରକାର । ଗୋପାଳକୁ ପାଗଳ ଆଖ୍ୟା ଦେବାକୁ କ୍ରାଇମବ୍ରାଞ୍ଚ ତଥା ରାଜ୍ୟ ସରକାର ଖୁବ୍‌ ବ୍ୟଗ୍ର। ହେଲେ ସେ କେଉଁଠି ମାନସିକ ରୋଗର ଚିକିତ୍ସା ହେଉଥିବା ନଜର ନାହିଁ। ମେଡିକାଲ ବୋର୍ଡ ରିପୋର୍ଟରେ ଗୋପାଳ ସମ୍ପୂର୍ଣ୍ଣ ସୁସ୍ଥ ଥିବା ବେଳେ କୋର୍ଟ ବି ସେଥିରେ ମୋହର ମାରିଛନ୍ତି।

ଏଥିସହ ସେ କହିଛନ୍ତି, ସତ ପଦାକୁ ନ ଆସିଲା ଯାଏ ରାଜ୍ୟ ସରକାର, ପୁଲିସ୍‌, କ୍ରାଇମବ୍ରାଞ୍ଚ ସମସ୍ତେ ସନ୍ଦେହ ଘେରରେ ରହିବେ। ସନ୍ଦେହର ନିଆଁ ଜଲଦି ଲିଭିବ ନାହିଁ ନବ ଦାସ ମର୍ଡର ପଛର କାରଣ କ’ଣ ତାହା ସାମନାକୁ ନ ଆସିଲା ଯାଏ ଲୋକେ ଏହାକୁ ସହଜେ ଭୁଲିବେ ନାହିଁ। ଉଭୟ ପୋଲିସ, ସରକାର ଓ ଶାସନ କଳ ସମସ୍ତେ ଏହି ଘଟଣାରେ ଉତ୍ତରଦାୟୀ । ରାଜ୍ୟର ପୁଲିସ୍‌ ମୁଖିଆ ହିସାବରେ ଡିଜି ଏହାର ଉତ୍ତର ରଖିବା ଉଚିତ।