ସମ୍ବଲପୁର : ଖୁବ ଶୀଘ୍ର ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି ୨ ଜିଲ୍ଲାପାଳ I ସମ୍ବଲପୁର ଜିଲ୍ଲାପାଳ ଅନନ୍ୟା ଦାସ ଓ ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣାଙ୍କ ମଧ୍ୟରେ ପଡ଼ିବାକୁ ଯାଉଛି ହାତଗଣ୍ଠି I ଏନେଇ ଗତକାଲି ଅନନ୍ୟା ଦାସଙ୍କ ସମ୍ବଲପୁର ସ୍ଥିତ ସରକାରୀ ବାସଭବନରେ ପାରମ୍ପରିକ ରୀତିନୀତି ଅନୁସାରେ ନିର୍ବନ୍ଧ କାର୍ଯ୍ୟ ଶେଷ ହୋଇ ଯାଇଛି I
ନିର୍ବନ୍ଧ ସମୟରେ ଉଭୟ ଜିଲ୍ଲାପାଳଙ୍କ କିଛି ଫଟୋ ସୋସିଆଲ ମିଡିଆରେ ଚର୍ଚ୍ଚାର ବିଷୟ ହୋଇଛି । ନିର୍ବନ୍ଧ ପରେ ଉଭୟେ ବାସଭବନ ବଗିଚାରେ ଅନନ୍ୟା ଏକ ଲାଲ୍ ରଙ୍ଗର ଶାଢ଼ି ପିନ୍ଧିଥିବା ବେଳେ ଚଞ୍ଚଳ ଏକ ଧଳା ରଙ୍ଗର ସେରୱାନି ପରିଧାନ କରିଥିବା ଦେଖିବାକୁ ମିଳିଛି । ଏଥିରେ ଉଭୟ ପରିବାରର ସଦସ୍ୟ ସାମିଲ ହୋଇଥିଲେ। ଏହାସହ କିଛି ନିକଟତର ବନ୍ଧୁ ଓ ଅଫିସର ବି କାର୍ଯ୍ୟକ୍ରମରେ ଉପସ୍ଥିତ ଥିଲେ। ଆସନ୍ତା ୩ ମାସ ମଧ୍ୟରେ ଉଭୟ ବିବାହ କରିବା ନେଇ ସୂଚନା ମିଳିଛି। ତେବେ ଏହା ହେଉଛି ଉଭୟଙ୍କ ଦ୍ୱିତୀୟ ବିବାହ। ଆସାମ ଝିଅ ଅନନ୍ୟା ଦାସ ବର୍ତ୍ତମାନର କୋରାପୁଟ ଜିଲ୍ଲାପାଳ ଅବଦୁଲ ଏମ୍. ଅଖତରଙ୍କୁ ବିବାହ କରିଥିଲେ । ମତଭେଦ କାରଣରୁ ଦୁହିଁଙ୍କର ନିକଟରେ ବିବାହ ବିଚ୍ଛେଦ ହୋଇଥିଲା । ସେହିପରି ଓଡ଼ିଶାରେ ପଢ଼ିଥିବା ଚଞ୍ଚଳ ରାଣା ବର୍ତ୍ତମାନର ରାୟଗଡ଼ା ଜିଲ୍ଲାପାଳ ସ୍ୱଧା ଦେବ ସିଂହଙ୍କୁ ବିବାହ କରିଥିଲେ । ସେମାନେ ମଧ୍ୟ ନିକଟରେ ସମାନ କାରଣରୁ ପରସ୍ପରକୁ ଛାଡ଼ପତ୍ର ଦେଇଥିଲେ । ଉଭୟଙ୍କ ମଧ୍ୟରେ ଛାଡ଼ପତ୍ର ହେବା ପରେ ପୁଣି ଥରେ ବିବାହ କରିବାକୁ ଯାଉଛନ୍ତି ଏହି ଜିଲ୍ଲାପାଳ ଦମ୍ପତି ।
ସୂଚନାନୁସାରେ ୨୦୧୩ ବ୍ୟାଚ୍ ଆଇଏଏସ୍ ଅଫିସର ଚଞ୍ଚଳ ରଣା ବର୍ତ୍ତମାନ ବଲାଙ୍ଗୀର ଜିଲ୍ଲାପାଳ ଥିବା ବେଳେ ୨୦୧୮ ବ୍ୟାଚ୍ ଆଇଏଏସ୍ ଅଫିସର ଅନନ୍ୟା ଦାସ ସମ୍ବଲପୁର ଜିଲ୍ଲାପାଳ ଅଛନ୍ତି । ଓଡ଼ିଶାର ଅନୁଗୁଳ ଜିଲ୍ଲା ନିବାସୀ ଶ୍ରୀ ରଣା ଏନ୍ଆଇଟି ସିଲଚରରୁ ବିଟେକ୍ ଡିଗ୍ରି ହାସଲ କରିବା ପରେ ୟୁପିଏସ୍ସିରେ ଟପ୍ପର ହୋଇଥିଲେ । ଶ୍ରୀ ରଣା ପୂର୍ବରୁ କୁଚିଣ୍ଡାର ଉପଜିଲ୍ଲାପାଳ ଦାୟିତ୍ୱ ମଧ୍ୟ ତୁଳାଇ ସାରିଛନ୍ତି । ବଲାଙ୍ଗୀର ଜିଲ୍ଲାର ବିକାଶରେ ବିଶେଷ କରି ଦୁଗ୍ଧ ଉତ୍ପାଦନ ବୃଦ୍ଧି ପାଇଁ ଶ୍ୱେତ ବିପ୍ଲବରେ ସଫଳତା ପାଇଁ ସେ ଜାତୀୟ ଗଣମାଧ୍ୟମରେ ବି ଚର୍ଚ୍ଚାରେ ରହି ଆସିଛନ୍ତି । ସେହିପରି ୨୦୧୮ ବ୍ୟାଚ୍ ଆଇଏଏସ୍ ଅନନ୍ୟା ଦାସ ଆସାମର ମୂଳ ବାସିନ୍ଦା । ସେ ଏହା ପୂର୍ବରୁ କଟକ ସିଏମ୍ସି କମିଶନର ଦାୟିତ୍ୱ ମଧ୍ୟ ତୁଳାଇଥିଲେ ।
Comments are closed.