କରାଚୀ ପୋଲିସ ମୁଖ୍ୟାଳୟରେ ଆତଙ୍କବାଦୀ ଆକ୍ରମଣ

କରାଚୀ : ଶୁକ୍ରବାର ଦିନ ସନ୍ଧ୍ୟା ୭ଟା ବେଳେ କରାଚୀ ପୋଲିସ ମୁଖ୍ୟାଳୟରେ ବଡ଼ ଧରଣର ଆତଙ୍କବାଦି ଆକ୍ରଣର ସୂଚନା ମିଳିଛି I ଏହି ଆକ୍ରମଣରେ ୯ ଜଣଙ୍କର ମୃତ୍ୟୁ ହୋଇଥିବାବେଳେ ପ୍ରାୟ ୨୦ ଜଣ ଆହତ ହୋଇଥିବା ଜଣାଯାଇଛି। ମୃତକଙ୍କ ମଧ୍ୟରେ ୫ ଆତଙ୍କବାଦୀ, ଜଣେ ପୁଲିସ୍‌ ଅଧିକାରୀ ଓ ୩ ଜଣ ସାଧାରଣ ନାଗରିକ ଥିବା ସ୍ପଷ୍ଟ ହୋଇଛି। ତେବେ ମୃତକଙ୍କ ସଂଖ୍ୟା ବୃଦ୍ଧି ପାଇପାରେ ବୋଲି ଆଶଙ୍କା ରହିଛି I

ଶୁକ୍ରବାର ଦିନ ସନ୍ଧ୍ୟା ବେଳେ ପାକିସ୍ତାନର ଜନବସତି ପୂର୍ଣ୍ଣ ଶରାହ-ଏ-ଫେସଲ ଅଞ୍ଚଳରେ ଏହି ଆକ୍ରମଣ କରାଯାଇଥିଲା Iପାକିସ୍ତାନୀ ଗଣମାଧ୍ୟମ ଡନ୍ ଅନୁଯାୟୀ, ପୁଲିସ ମୁଖ୍ୟାଳୟରେ ୧୦ରୁ ଅଧିକ ଆତଙ୍କବାଦୀ ଉପସ୍ଥିତ ଥାଇପାରନ୍ତି । ଏହା ସହ ଆତଙ୍କବାଦୀମାନେ ଏକ ବହୁମହଲା କୋଠା ଭିତରକୁ ମଧ୍ୟ ପ୍ରବେଶ କରିଛନ୍ତି । ତେବେ ସୁରକ୍ଷା ବାହିନୀ ଓ ପୁଲିସ ଉକ୍ତ ଅଞ୍ଚଳକୁ ଘେରାବନ୍ଦୀ କରି ରଖିଛନ୍ତି। ଉଭୟ ପକ୍ଷରୁ ଗୁଳିବିନିମୟ ଚାଲିଛି । ଆତଙ୍କବାଦୀମାନେ କରାଚି ପୁଲିସ୍‌ ମୁଖ୍ୟାଳୟ ଉପରକୁ ହଠାତ୍ ବୋମା ଫୋପାଡ଼ିବା ସହ ଅତର୍କିତ ଗୁଳି ବର୍ଷା କରିଥିଲେ । ସେଠାରେ ମୁତୟନ ହୋଇଥିବା କର୍ମଚାରୀ ଦୌଡ଼ାଦୌଡ଼ି କରିଥିବା ବେଳେ ଏହାର ସୁଯୋଗ ନେଇ ଆତଙ୍କୀ ମାନେ ପୁଲିସ୍‌ ମୁଖ୍ୟାଳୟରେ ପ୍ରବେଶ କରିଥିଲେ। ଏହାପରେ ସେମାନେ ଆଖିବୁଜା ଗୁଳି ଚାଳନା କରିଥିଲେ।

ଏ ସମ୍ପର୍କରେ ସିନ୍ଧ ସରକାରଙ୍କ ମୁଖପାତ୍ର ମୁର୍ତାଜା ୱାହାବ ୧୦: ୪୨ ରେ ଟ୍ୱିଟ କରି ସୂଚନା ଦେଇଛନ୍ତି କି “ମୁଁ ସ୍ପଷ୍ଟ କରିଛିଯେ ବର୍ତ୍ତମାନ କରାଚି ପୋଲିସ କାର୍ଯ୍ୟାଳୟ (କେପିଓ) ବିଲ୍ଡିଂକୁ ଆତଙ୍କବାଦୀଙ୍କଠାରୁ ମୁକ୍ତ କରାଯାଇଛି। ଆମର ଯବାନମାନେ ତିନି ଜଣ ଆତଙ୍କବାଦୀଙ୍କୁ ହତ୍ୟା କରିଛନ୍ତି। ଏବଂ ବର୍ତ୍ତମାନ ପୋଲିସ ମୁଖ୍ୟାଳୟ କୋଠାଟି ସମ୍ପୂର୍ଣ୍ଣ ରୂପେ ଆତଙ୍କ ବାଦୀଙ୍କ କବଳରୁ ସୁରକ୍ଷିତ ଅଛି I

ଏହି ଅପରେସନର ନେତୃତ୍ୱ ପାକିସ୍ତାନ ପୋଲିସର ଜଣେ ବରିଷ୍ଠ ଅଧିକାରୀ ଡିଜି ଇଷ୍ଟର୍ଣ୍ଣ ମୁକଦସ ହୈଦର ପାକିସ୍ତାନୀ ଗଣମାଧ୍ୟମକୁ କହିଛନ୍ତି ଯେ “ଆତଙ୍କବାଦୀମାନେ ଟୟୋଟା କରୋଲା କାରରେ କେପିଓରେ ପହଞ୍ଚିଥିଲେ। ଆତଙ୍କବାଦୀଙ୍କ ମଧ୍ୟରୁ ଜଣେ ବିଲଡିଂର ଚତୁର୍ଥ ମହଲାକୁ ଯାଇ ନିଜକୁ ବିସ୍ଫୋରଣରେ ଉଡାଇ ଦେଇଥିଲା ଏହାପରେ ଅନ୍ୟ ଦୁଇ ଆତଙ୍କବାଦୀ ଛାତ ଉପରେ ପହଁଚି ଗୁଳି ବର୍ଷଣଆରମ୍ଭ କରିଥିଲେ ଇ ଏଥିରେ ଆମର କେତେଜଣ କର୍ମଚାରୀ ଆହତ ହୋଇଥିଲେ କିନ୍ତୁ ପରବର୍ତ୍ତୀ ଅବସ୍ଥାରେ ଆତଙ୍କବାଦୀ ମାନଙ୍କୁ ମାରିବାରେ ପୋଲିସ କର୍ମଚାରୀମାନେ ସଫଳ ହୋଇଥିଲେ I ଆତଙ୍କବାଦୀଙ୍କ ହତ୍ୟାକୁ କରାଚି ପୋଲିସର ମୁଖପାତ୍ର କହିଛନ୍ତି ଯେ ଏହା ଏକ ପ୍ରମୁଖ ଅପରେସନ୍ ଥିଲା ଯେଉଁଥିରେ ଦକ୍ଷିଣ ଏବଂ ପୂର୍ବର ଡିଜିଙ୍କ ସମେତ ବରିଷ୍ଠ ପୋଲିସ ଅଧିକାରୀମାନେ କାର୍ଯ୍ୟ କରିଥିଲେ। ଏଥିରେ ରେଞ୍ଜର୍ସ ଏବଂ ସେନା ମଧ୍ୟ ସାମିଲ ଥିଲା I ରାତି ପ୍ରାୟ ୧୧ଟା ସୁଦ୍ଧା ଏହି ଅପରେସନ୍ ଶେଷ ହୋଇଥିଲା । ଆତଙ୍କବାଦୀଙ୍କ ନିକଟରୁ ବିପୁଳ ପରିମାଣର ବିସ୍ଫୋରକ ଓ ଅସ୍ତ୍ରଶସ୍ତ୍ର ଜବତ ହୋଇଛି ।

ଏହି ଆକ୍ରମଣ ପାଇଁ ପାକିସ୍ତାନରେ ଥିବା ତାଲିବାନୀ ଆତଙ୍କୀ ସଙ୍ଗଠନ ତେହରିକ୍-ଏ-ତାଲିବାନ ପାକିସ୍ତାନ (ଟିଟିପି) ନିଜକୁ ଦାୟୀ କରିଛି । ଗତବର୍ଷ ନଭେମ୍ବର ପରଠାରୁ ପାକିସ୍ତାନରେ ଆତଙ୍କୀ ଆକ୍ରମଣ ବୃଦ୍ଧି ପାଇବାରେ ଲାଗିଛି । ଗତମାସରେ ଉତ୍ତର-ପଶ୍ଚିମ ପେଶାୱରରେ ଥିବା ଏକ ମଜସିଦରେ ଏକ ଆତ୍ମଘାତୀ ବିସ୍ଫୋରକ ଘଟିଥିଲା । ଯେଉଁଥିରେ ୧୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା । ମୃତକଙ୍କ ମଧ୍ୟରେ ଅଧିକାଂଶ ପୁଲିସକର୍ମୀ ଥିଲେ ।