ଭୁବନେଶ୍ୱର: ଜୁନ୍ ୧୦: ଆସନ୍ତା ୧୨ ତାରିଖରେ ଆର୍ନ୍ତଜାତିକ କ୍ରିକେଟ୍ ଖେଳ ହେବାକୁ ଯାଉଛି । ଯାହାକୁ ନେଇ ସମଗ୍ର ରାଜ୍ୟରେ ଉତ୍କଣ୍ଠା ଦେଖାଯାଇଛି । ଏହା ବାରବାଟିରେ ଦ୍ୱିତୀୟ ଆନ୍ତର୍ଜାତିକ ମ୍ୟାଚ୍ ହେବ । ଏହି ପରିପ୍ରେକ୍ଷୀରେ ଭୁବନେଶ୍ୱରକୁ ଆସି ପହଞ୍ଚିଛନ୍ତି ଭାରତୀୟ ଓ ଦକ୍ଷିଣ ଆଫ୍ରିକା କ୍ରିକେଟ୍ ଦଳ । ଦୁଇ ଦଳଙ୍କୁ ଭବ୍ୟ ସ୍ୱାଗତ କରିଛନ୍ତି ହୋଟେଲ କର୍ତ୍ତୃପକ୍ଷ ।
ସୂଚନା ଅନୁସାରେ, ଭୁବନେଶ୍ୱର ବିମାନ ବନ୍ଦରରେ ସେମାନଙ୍କ ବିମାନ ଲାଗିବା ପରେ ଉଭୟ ଦଳର ଖେଳାଳିଙ୍କୁ କଡ଼ା ସୁରକ୍ଷା ଭିତରେ ହୋଟେଲକୁ ନିଆଯାଇଛି । ଦୁଇଟି ଅତ୍ୟାଧୁନିକ ବସ୍ ଯୋଗେ ହୋଟେଲ ମେଫେୟାରକୁ ଖେଳାଳିମାନଙ୍କୁ ଅଣାଯାଇଛି । ଏଥିପାଇଁ କମିଶନରେଟ୍ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ହୋଟେଲ ବାହାରେ ଖେଳାଳି ପହଞ୍ଚିବା କ୍ଷଣି ଯୋଡ଼ି ଶଙ୍ଖ, ଘୋଡ଼ା ନାଚ ଭଳି ବିଭିନ୍ନ ଓଡ଼ିଆ ପାରମ୍ପରିକ ବାଜା ବଜାଯାଇଥିଲା ।
ଏହାପରେ ସେମାନଙ୍କ ପାଇଁ ସ୍ୱତନ୍ତ୍ର ମିଠା ଓ କେକ୍ର ପ୍ଲେଟର ପ୍ରସ୍ତୁତ କରାଯାଇଛି ଖେଳାଳୀଙ୍କୁ ଦିଆଯାଇଥିଲା । ଖେଳାଳିଙ୍କ ଫଟୋକୁ ରଖି ଏହି ପ୍ଲାଟର ପ୍ରସ୍ତୁତ ହୋଇଛି । ଏହାପରେ ସ୍ୱାସ୍ଥ୍ୟକର ଡ୍ରିଙ୍କସ୍, ଜୁସ୍, ସୁପ୍ ବ୍ୟବସ୍ଥା ହୋଇଛି ।
ଖେଳାଳିଙ୍କ ସୁରକ୍ଷା ଲାଗି ହୋଟେଲରେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗଠନ କରାଯାଇଛି । ଏହାସହିତ ଭୁବନେଶ୍ୱରରେ ୨୦ ପ୍ଲାଟୁନ୍ ଫୋର୍ସ ମୁତୟନ ହୋଇଛନ୍ତି । ଖେଳାଳୀଙ୍କ ଅଭ୍ୟାସ ପାଇଁ କଟକ ଯିବାକୁ ଥିବାରୁ ସେମାନଙ୍କ ଯାତାୟତ ଲାଗି ସ୍ୱତନ୍ତ୍ର ଓ ଅତିରିକ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
ଅନ୍ୟପକ୍ଷରେ, ୧୨ କୋଟି ଟଙ୍କା ବ୍ୟୟରେ ବାରବାଟିର ସୌନ୍ଦର୍ଯ୍ୟକରଣ କରାଯାଇଛି । ଦୀର୍ଘ ୨୦ ବର୍ଷ ଧରି ଲାଗିଥିବା ଲାଇଟ୍କୁ ପରିବର୍ତ୍ତନ କରାଯାଇଛି । ଏହାସହିତ ନୂଆ ଫ୍ଲଡ୍ ଲାଇଟ୍ର ବ୍ୟବହାର କରାଯାଇଛି ।
Comments are closed.