ବ୍ରଜରାଜନଗର: ଜୁନ ୦୩: ବ୍ରଜରାଜନଗର ଉପନିର୍ବାଚନର ଆଜି ଭୋଟ୍ ଗଣତି । ଝାରସୁଗୁଡ଼ା ସରକାରୀ ଇଞ୍ଜିନିୟରିଂ ସ୍କୁଲରେ ଏହି ଗଣତି କରାଯିବ । ଏଥିପାଇଁ ସକାଳ ୮ଟାରୁ ପ୍ରଥମେ ପୋଷ୍ଟାଲ ବାଲାଟ ଗଣତି ଆରମ୍ଭ ହୋଇ ଇଭିଏମ୍ ଗଣତି କରାଯିବ । ଏଥିପାଇଁ ୧୪ ଟି ଟେବୁଲ କରାଯାଇଛି । ମୋଟ୍ ୨୦ ରାଉଣ୍ଡ ଗଣତି ହେବାକୁ ଥିବାବେଳେ ଗଣତି କେନ୍ଦ୍ରରେ ଜଣେ ଲେଖାଏ କାଉଣ୍ଟିଂ ସୁପରଭାଇଜର, ମାଇକ୍ରୋ ଅବଜରଭର ଏବଂ କାଉଣ୍ଟିଂ ଆସିଷ୍ଟାଣ୍ଟ ରହି ପୁରା ଗଣତି ପ୍ରକ୍ରିୟାର ତଦାରଖ କରିବେ । ଗଣତି ପାଇଁ ୬୦ ଜଣଙ୍କୁ ନିଯୁକ୍ତ କରାଯାଇଛି । ପ୍ରତି ରାଉଣ୍ଡ ଗଣତି ଶେଷରେ ଫଳାଫଳ ଘୋଷଣା ହେବଛ ଭୋଟ୍ ଗଣତି ପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ଗତ ମଙ୍ଗଳବାର ଦିନ ବ୍ରଜରାଜନଗର ଉପନିର୍ବାଚନ ଶେଷ ହୋଇଥିଲା । ଶାନ୍ତିଶୃଙ୍ଖଳାର ସହ ୨୭୯ଟି ବୁଥରେ ମତଦାନ ଶେଷ ହୋଇଥିଲା । ମତଦାନ ବେଳେ କୌଣସି ସ୍ଥାନରେ ସେମିତି କିଛି ବିଶେଷ ସମସ୍ୟା କି ଅପ୍ରୀତିକର ପରିସ୍ଥିତି ହୋଇନଥିବା ଦେଖିବାକୁ ମିଳିଥିଲା । କେବଳ ୪ଟି ଇଭିଏମର୍ରେ ତ୍ରୁଟି ଦେଖା ଦେଇଥିଲା । ତେବେ ସାଙ୍ଗେ ସାଙ୍ଗେ ସେସବୁକୁ ପରିବର୍ତ୍ତନ କରାଯାଇଥିଲା । ବ୍ରଜରାଜନଗର ଉପନିର୍ବାଚନରେ ୭୧.୯୦% ମତଦାନ ହୋଇଛି । ୧୧ ଜଣ ପ୍ରାର୍ଥୀଙ୍କ ଭାଗ୍ୟ ଇଭିଏମ୍ ବକ୍ସରେ ସିଲ୍ ହୋଇଥିବା ବେଳେ ମୈଦାନରେ ୩ ପ୍ରମୁଖ ପ୍ରାର୍ଥୀ ଅଛନ୍ତି । ବିଜେଡିର ଅଳକା ମହାନ୍ତି ନିର୍ବାଚନ ଲଢିଥିବାବେଳେ ବିଜେପିର ରାଧାରାଣୀ ପଣ୍ଡା ଓ କଂଗ୍ରେସ ପକ୍ଷରୁ କିଶୋର ପଟେଲ ନିର୍ବାଚନ ଲଢିଛନ୍ତି ।
Comments are closed.