ବଲିଉଡ୍‌ରେ ମାତୃତ୍ୱ ଦିବସ

କୁହାଯାଏ ମାତୃତ୍ୱ ଲାଭ କରିବା ଦୁନିଆର ସବୁଠୁ ସୁନ୍ଦର ଅନୁଭୂତି । ଜଣେ ନାରୀ ଜନନୀ ହେବା ପରେ ହିଁ ଜୀବନର ପୂର୍ଣ୍ଣତା ପାଏ ବୋଲି ବିବେଚନା କରାଯାଏ । ଅନ୍ୟପକ୍ଷରେ ମହିଳାମାନେ ମଧ୍ୟ ମା’ ହେବାର ଅନୁଭବକୁ ସବୁଠୁ ନିଆରା ଏବଂ ସୁଖଦ ବୋଲି କହିଥାନ୍ତି, ଯାହାକୁ ଶବ୍ଦରେ ପ୍ରକାଶ କରି ହୁଏ ନାହିଁ । କେବଳ ସାଧାରଣ ମହିଳା ନୁହେଁ ବଡ଼ ବଡ଼ ଅଭିନେତ୍ରୀ ବି ମା’ ହେବାର ମୁହୂର୍ତ୍ତକୁ ଏକ ଅତ୍ୟନ୍ତ ମନୋରମ ଅନୁଭବ ବୋଲି ଭାବନ୍ତି । ବିଶ୍ୱ ସୁନ୍ଦରୀ ଐଶ୍ୱର୍ଯ୍ୟା ରାୟ ମଧ୍ୟ ସ୍ୱୀକାର କରିଛନ୍ତି ଯେ ମା’ ହେବା ପରେ ତାଙ୍କ ଜୀବନ ସମ୍ପୂର୍ଣ୍ଣ ବଦଳିଯାଇଛି । ଚଳିତ ବର୍ଷ ୨୦୨୨ରେ ଅନେକ ବଲିଉଡ୍‌ ଏବଂ ଟିଭି ଅଭିନେତ୍ରୀ ମାତୃତ୍ୱ ଲାଭ କରି ନିଜସ୍ୱ ଢଙ୍ଗରେ ସେମାନଙ୍କ ଅନୁଭବକୁ ବାଣ୍ଟିଛନ୍ତି ।

କାଜଲ ଅଗ୍ରୱାଲ:

ସାଉଥ୍‌ କମ୍‌ ବଲିଉଡ୍‌ ଅଭିନେତ୍ରୀ କାଜଲ ଅଗ୍ରୱାଲ ୧୯ ଏପ୍ରିଲରେ ଏକ ଶିଶୁପୁତ୍ରର ଜନନୀ ହୋଇଛନ୍ତି । ପୁଅର ନାମ ରଖିଛନ୍ତି ନିଲ୍‌ କିଚୁଲ୍‌ । ସେ ତାଙ୍କ ଅନୁଭବକୁ ପ୍ରଶଂସକଙ୍କ ସହ ସେୟାର କରି କହିଥିଲେ ଯେ ‘ପ୍ରସବ ପରବର୍ତ୍ତୀ ସମୟ ଗ୍ଲାମରସ ନହୋଇପାରେ କିନ୍ତୁ ନିଶ୍ଚିତ ଭାବେ ସୁନ୍ଦର ହୋଇପାରେ’ ।

ଭାରତୀ ସିଂହ:

ଟେଲିଭିଜନ ଜଗତର ଲୋକପ୍ରିୟ ହୋଷ୍ଟ୍‌ ତଥା କମେଡିଆନ ଭାରତୀ ସିଂହ ୩ ଏପ୍ରିଲରେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ । ସେ ପ୍ରେଗନେନ୍ସିର ଶେଷ ଦିନ ପର୍ଯ୍ୟନ୍ତ ସୁଟିଂ ସେଟ୍‌ରେ କାମ କରୁଥିଲେ, ଯାହା ଅନ୍ୟ କର୍ମଜୀବୀ ମହିଳାଙ୍କ ପାଇଁ କୌଣସି ପ୍ରେରଣାରୁ କମ୍‌ ନଥିଲା । ଏପରିକି ପୁଅ ଜନ୍ମ ହେବା ପରେ ଅଧିକ ମଜା ଲାଗୁଛି ବୋଲି ଭାରତୀ କହିଛନ୍ତି ।

ପୂଜା ବାନାର୍ଜୀ:

ଟିଭି ଅଭିନେତ୍ରୀ ପୂଜା ବାନାର୍ଜୀ ୧୨ ମାର୍ଚ୍ଚକୁ ନିଜର ପ୍ରଥମ ସନ୍ତାନ ରୂପେ ଏକ ଶିଶୁକନ୍ୟାକୁ ସ୍ୱାଗତ କରିଥିଲେ । ସୋସିଆଲ ମିଡିଆରେ ସେ ଲଗାତାର ଝିଅର ଫଟୋ ସେୟାର କରିବା ସହ ଜଣେ ସୁନ୍ଦର ମା’ ହେବାର ଅନୁଭବକୁ ବାଣ୍ଟିଛନ୍ତି ।

ଦେବୀନା ବାନାର୍ଜୀ:

ଗର୍ଭଧାରଣା ସମୟରେ ଅନେକ କିଛି ସମସ୍ୟାକୁ ସହି ପରିଶେଷରେ ୪ ଏପ୍ରିଲରେ ଦେବୀନା ଏକ ଶିଶୁକନ୍ୟାର ମା’ ହୋଇଥିଲେ । ପ୍ରଥମ ସନ୍ତାନ ଭାବେ ଝିଅକୁ ପାଇ ତାଙ୍କର ଖୁସି ଦୁଇଗୁଣ ହୋଇଛି ବୋଲି ଦେବୀନା ପ୍ରକାଶ କରିଛନ୍ତି ।

ପ୍ରିୟଙ୍କା ଚୋପ୍ରା:

ବର୍ଷର ପ୍ରାରମ୍ଭରେ ସରୋଗେସୀ ଜରିଆରେ ଶିଶୁକନ୍ୟାର ଜନନୀ ହେବାର ଖବର ଦେଇ ଗ୍ଲୋବାଲ ଆଇକନ ତଥା ବଲିଉଡ୍‌ ଅଭିନେତ୍ରୀ ପ୍ରିୟଙ୍କା ସମସ୍ତଙ୍କୁ ଆଚମ୍ବିତ କରାଇଥିଲେ । ଏହାର କିଛି ମାସ ପରେ ସେ ତାଙ୍କ ମାତୃତ୍ୱ ହେବାର ଅନୁଭୂତି ସମ୍ପର୍କରେ ପ୍ରକାଶ କରି କହିଛନ୍ତି, ‘ଝିଅ ମାଲତୀ ଉପରେ କେବେ ବି ନିଜର ସ୍ୱପ୍ନ, ଭୟ କିମ୍ବା ପ୍ରତିପୋଷଣକୁ ଲଦି ଦେବେ ନାହିଁ ।’