ପୁରୀ : ଯୁବ ଖଜା ବ୍ୟବସାୟୀଙ୍କୁ ଛୁରୀ ଭୁସି ହତ୍ୟା ଘଟଣା । ୨ ଦିନ ପରେ ପୁରୀ ଟାଉନ ପୋଲିସ ହାତରେ ଧରା ପଡିଲେ ୪ ଅଭିଯୁକ୍ତ । ଧରାପଡିଥିବା ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ରହିଥିବା ଜଣାପଡିଛି । ସେମାନଙ୍କ ନିକଟରୁ ହତ୍ୟାକାଣ୍ଡରେ ବ୍ୟବହୃତ ଭୁଜାଲି ଏବଂ ଛୁରୀ ମଧ୍ୟ ପୁଲିସ ଜବତ କରିଛି । ଖଜା ବ୍ୟବସାୟକୁ କେନ୍ଦ୍ରକରି ଗୁରୁବାର ରାତିରେ ପୁରୀ ଟାଉନ୍ ଥାନା ଅନ୍ତର୍ଗତ ମାର୍କଣ୍ଡେଶ୍ୱର ସାହି ରାଧାଗୋବିନ୍ଦ ଗଳିରେ ଦିନେଶ ଖୁଣ୍ଟିଆଙ୍କୁ ଛୁରୀ ଭୁସି ହତ୍ୟା କରାଯାଇଥିଲା।
ସୂଚନାନୁସାରେ,ଗତ ୮ ତାରିଖ ରାତି ୧୦ ଟା ବେଳେ ଦିନେଶ ନିଜ ବାଇକରେ ଘରକୁ ଫେରୁଥିବାବେଳେ,ରାଧାଗୋବିନ୍ଦ ଲେନ ଜନଗହଳିପୂର୍ଣ୍ଣ ସ୍ଥାନରେ ତାଙ୍କୁ କିଛି ଦୁର୍ବୁତ୍ତ ସଂଘବଦ୍ଧ ଭାବରେ ଛୁରୀରେ ଆକ୍ରମଣ କରିଥିଲେ । ଏହି ସମୟରେ ଦିନେଶ ବାଇକରୁ ତଳେ ପଡିଯିବାପରେ ଅଭିଯୁକ୍ତମାନେ ତାଙ୍କୁ ଛୁରୀ,ଭୁଜାଲି ଏବଂ ଠେଙ୍ଗାରେ ଆକ୍ରମଣ କରିଥିଲେ । ଖାଲି ସେତିକି ନୁହେଁ ଦିନେଶ ତଳେ ପଡି ଚିତ୍କାର କରୁଥିବାବେଳେ ଅଭିଯୁକ୍ତମାନେ ଏହାକୁ ଫୋନ ଯୋଗେ ତାଙ୍କ ବଡ଼ ଭାଇ ରାକେଶଙ୍କୁ ଶୁଣାଇ ଥିଲେ । ଘରୁ ତତକ୍ଷଣାତ ରାକେଶ ଘଟଣାସ୍ଥଳକୁ ଆସି ଦେଖିବାରୁ ଦିନେଶ ରକ୍ତ ଜୁଡୁବୁଡୁ ଅବସ୍ଥାରେ ତଳେ ପଡ଼ିଥିଲେ ଏବଂ ଆକ୍ରମଣକାରୀ ମାନେ ସେଠାରୁ ଚମ୍ପଟ ମାରିଥିଲେ । ଦିନେଶଙ୍କୁ ତୁରନ୍ତ ପୁରୀ ଡାକ୍ତରଖାନାରେ ଦିନେଶ ଭର୍ତ୍ତି କରିଥିଲେ,ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଘଟଣାରେ ଅଭିଯୁକ୍ତ ମାନଙ୍କ ବିରୋଧରେ ପୁରୀ ଟାଉନ ଥାନାରେ ମାମଲା ରୁଜୁ କରାଯାଇଥିଲା । ଘଟଣାର ୨ ଦିନ ପରେ ପୋଲିସ ଅଭିଯୁକ୍ତ ୪ ଜଣଙ୍କୁ ଧରିଛି ଏହା ସହ ଏହି ହତ୍ୟା କାଣ୍ଡରେ ଆଉ କେଉଁ ମାନଙ୍କର ସମ୍ପୃକ୍ତି ରହିଛି ସେ ନେଇ ଖୋଳତାଡ଼ ଜାରି ରଖିଛି ।
Comments are closed.