ଶ୍ରୀନଗର: ଜୁଲାଇ ୨୬ ତାରିଖରେ ଶ୍ରୀନଗର ବିମାନବନ୍ଦରରେ ସ୍ପାଇସଜେଟ୍ର ଜଣେ କର୍ମଚାରୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗରେ ଜଣେ ବରିଷ୍ଠ ଭାରତୀୟ ସେନା ଅଫିସରଙ୍କୁ ୫ ବର୍ଷ ପାଇଁ ନୋ-ଫ୍ଲାଏ ତାଲିକାରେ ରଖାଯାଇଛି। ଜଣେ ଅଫିସର ଏନେଇ ସୂଚନା ଦେଇ କହିଛନ୍ତି ଯେ ବିମାନର କର୍ମଚାରୀଙ୍କୁ ମାଡ଼ ମାରିଥିବା ଜଣେ ଯାତ୍ରୀଙ୍କୁ ବିଶୃଙ୍ଖଳିତ ଘୋଷଣା କରାଯାଇଛି ଏବଂ ତାଙ୍କୁ ବିମାନ ସଂସ୍ଥାର ନୋ-ଫ୍ଲାଏ ତାଲିକାରେ ରଖିବାପାଇଁ ନିଷ୍ପତ୍ତି ନିଆଯାଇଛି। ତେବେ ଏହି ଯାତ୍ରୀ ଜଣଙ୍କ କୌଣସି ସାଧାରଣ ଯାତ୍ରୀ ନୁହନ୍ତି। ସେ ଜଣେ ସେନା ଅଫିସର। ତାଙ୍କର ଏଭଳି ଆଚରଣ ପାଇଁ ତାଙ୍କୁ ଆସନ୍ତା ୫ ବର୍ଷ ପର୍ଯ୍ୟନ୍ତ ନୋ ଫ୍ଲାଏ ତାଲିକାରେ ରଖାଯାଇଛି। ସେ ଉଭୟ ଘରୋଇ ଏବଂ ଅନ୍ତର୍ଜାତୀୟ କୌଣସି ବିମାନରେ ଯାତ୍ରା କରିପାରିବେ ନାହିଁ । ସିଭିଲ୍ ଏଭିଏସନ୍ ରୁଲ୍ସ (ବେସାମରିକ ବିମାନ ଚଳାଚଳ ନିୟମ) ଅଧୀନରେ ଗଠିତ ଏକ ଆଭ୍ୟନ୍ତରୀଣ କମିଟି ଦ୍ବାରା ଏହି ନିଷ୍ପତ୍ତି ନିଆଯାଇଛି ବୋଲି ଜଣେ ଅଧିକାରୀ କହିଛନ୍ତି।
