ନୂଆଦିଲ୍ଲୀ: ବର୍ଷକ ପୂର୍ବରୁ କୋର୍ଟରୁମ୍ରେ ଅନେକ ଗୁରୁତ୍ବପୂର୍ଣ୍ଣ ମାମଲାରେ ରାୟ ଶୁଣାଇ ଚର୍ଚ୍ଚାରେ ରହିଥିବା ପୂର୍ବତନ ପ୍ରଧାନ ବିଚାରପତି ଡି ୱାଇ ଚନ୍ଦ୍ରଚୂଡ଼ ଏବେ ପୁଣିଥରେ ଚର୍ଚ୍ଚାରେ ରହିଛନ୍ତି। ଚନ୍ଦ୍ରଚୂଡ଼ ତୁରନ୍ତ ସରକାରୀ ବାସଭବନ ଛାଡ଼ିବାପାଇଁ ସୁପ୍ରିମକୋର୍ଟ ପ୍ରଶାସନ ପକ୍ଷରୁ କେନ୍ଦ୍ର ସରକାରଙ୍କ ପାଖକୁ ଚିଠି ଲେଖାଯିବାପରେ ଏବେ ସେ ସର୍ବତ୍ର ଚର୍ଚ୍ଚାରେ ଅଛନ୍ତି। ତେବେ ପୂର୍ବତନ ପ୍ରଧାନ ବିଚାରପତି ଚନ୍ଦ୍ରଚୂଡ଼ ଆଜି ଏକ ଗଣମାଧ୍ୟମ ସଂସ୍ଥାକୁ ସାକ୍ଷାତକାର ଦେବା ଅବସରରେ ଉକ୍ତ ପ୍ରସଙ୍ଗରେ ତାଙ୍କ ଅସହାୟତା ପ୍ରକାଶ କରିଛନ୍ତି। ଚନ୍ଦ୍ରଚୂଡ଼ ସ୍ପଷ୍ଟ ଭାବେ କହିଛନ୍ତି ଯେ ତାଙ୍କ ୨ ଝିଅ ପ୍ରିୟଙ୍କା ଏବଂ ମାହିଙ୍କ ପାଇଁ ସେ ସରକାରୀ ବାସଭବନ ଛାଡ଼ି ପାରୁନାହାନ୍ତି। ୨ ଝିଅଙ୍କର ସ୍ବାସ୍ଥ୍ୟାବସ୍ଥା ପାଇଁ ଚନ୍ଦ୍ରଚୂଡ଼ ତାଙ୍କ ବାସଭବନକୁ ସେମାନଙ୍କ ଆବଶ୍ୟକତା ଅନୁଯାୟୀ ରୂପାନ୍ତରିତ କରିଛନ୍ତି। ପ୍ରିୟଙ୍କା ଏବଂ ମାହି ଏକ ବିରଳ ଜେନେଟିକ୍ ଡିଜଅର୍ଡର (ନେମାଲାଇନ୍ ମାୟୋପାଥି) ରେ ପୀଡ଼ିତ ଯାହା କଙ୍କାଳର ମାଂସପେଶୀକୁ ପ୍ରଭାବିତ କରେ। ଏହି ବିରଳ ରୋଗର ଚିକିତ୍ସା ଏବେ କେଉଁଠାରେ ବି ଉପଲବ୍ଧ ନାହିଁ। ଏବେ ଏହା ଉପରେ ଭାରତ ଏବଂ ବିଦେଶରେ ଗବେଷଣା ଚାଲିଛି। ଚନ୍ଦ୍ରଚୂଡ଼ କହିଛନ୍ତି, ସେମାନଙ୍କୁ ୨୪ ଘଣ୍ଟା ନଜରରେ ରଖିବାକୁ ପଡ଼େ। ଏହି ବିରଳ ରୋଗ ଅତି ସାଂଘାତିକ ଭାବେ ଶ୍ବାସଜନିତ ପଦ୍ଧତିକୁ ପ୍ରଭାବିତ କରେ। ପ୍ରିୟଙ୍କା ଏବଂ ମାହିଙ୍କର ପ୍ରତିଦିନ ବିଭିନ୍ନ ବ୍ୟାୟାମ ଆବଶ୍ୟକ ହୋଇଥାଏ। । ୨ ଝିଅଙ୍କ ଆବଶ୍ୟକତା ଅନୁଯାୟୀ ଉକ୍ତ ବାସଭବନକୁ ରୂପାନ୍ତରିତ କରାଯାଇଛି। ଦୈନିକ ଏବଂ ସାପ୍ତାହିକ ଭାବେ ସେମାନଙ୍କ ପାଇଁ ଏକ ମଲ୍ଟି ଡିସିପ୍ଲିନାରି ଟିମ୍ କାମ କରୁଛନ୍ତି। ପ୍ରିୟଙ୍କା ୨୦୨୧ରୁ ରେସ୍ପିରେଟୋରି ସପୋର୍ଟରେ ଅଛନ୍ତି। ୧୩ ବର୍ଷ ବୟସରେ ସେ ୩ ଥର ଭେଣ୍ଟିଲେଟରରେ ରହିଛନ୍ତି। ପ୍ରିୟଙ୍କାଙ୍କର ଟ୍ୟୁବ୍ ଲାଗିଛି। ଏହି ଟ୍ୟୁବ୍କୁ ପ୍ରତି ସପ୍ତାହରେ ବଦଳାଇବାକୁ ପଡ଼େ। ପ୍ରିୟଙ୍କାଙ୍କ ପାଇଁ ଘରେ ଆଇସିୟୁ ସୁବିଧା କରାଯାଇଛି। ଚନ୍ଦ୍ରଚୂଡ଼ କହିଛନ୍ତି, ଆମ ଦୁନିଆ କହିଲେ କେବଳ ସେମାନଙ୍କର ମଙ୍ଗଳ ଏବଂ ଖୁସି । ପତ୍ନୀ କଳ୍ପନା ଏଥିପାଇଁ ବିଶ୍ବବ୍ୟାପୀ ସ୍ପେସାଲିଷ୍ଟ, ବୈଜ୍ଞାନିକଙ୍କ ସହ ଯୋଗାଯୋଗରେ ଅଛନ୍ତି। ବାପା ମା’ ଭାବେ ଆମେ ପିଲାମାନଙ୍କୁ ଛାଡ଼ି ଏକାଠି କୁଆଡ଼େ ଯାଉନା। ଆମେ ସେମାନଙ୍କ ଜୀବନକୁ ଅର୍ଥପୂର୍ଣ୍ଣ କରିବାପାଇଁ ଏବଂ ସେମାନଙ୍କ ଜୀବନକୁ ପରିପୂର୍ଣ୍ଣ କରିବା ଭଳି ପରିବେଶ ସୃଷ୍ଟି କରୁଛୁ। ଚନ୍ଦ୍ରଚୂଡ଼ କହିଛନ୍ତି, ପ୍ରିୟଙ୍କା ଏବଂ ମାହିଙ୍କୁ ସଂଗୀତ ଏବଂ ଆର୍ଟ ପାଇଁ ସେମାନେ ଉତ୍ସାହିତ କରାନ୍ତି। ପିଲାମାନେ ଭଲ ଚେସ୍ ଖେଳନ୍ତି। ଦିଲ୍ଲୀର ସଂସ୍କୃତ ବିଦ୍ୟାଳୟରେ ସେମାନେ ଅଧ୍ୟୟନ କରୁଥିଲେ। କିନ୍ତୁ ଦୁର୍ଭାଗ୍ୟବସତଃ ସେମାନେ ପଢ଼ା ଜାରି ରଖିପାରିଲେନି। ସେମାନେ ଘରେ ରହି ପାଠ ପଢ଼ୂଛନ୍ତି। ସେମାନଙ୍କ ପ୍ରତି କାମକୁ ଆମେ ନଜର ଦେଉ। ଚନ୍ଦ୍ରଚୂଡ଼ କହିଛନ୍ତି, ଆମେ ପିଲାମାନଙ୍କ ସହ ସମୟ ଅତିବାହିତ କରିବାକୁ ଭଲପାଉ। ଜଷ୍ଟିସ ଚନ୍ଦ୍ରଚୂଡ଼ଙ୍କର ମଧ୍ୟ ୨ ପୁଅ ଅଛନ୍ତି। ସେମାନେ ୨ ଜଣ ଆଇନଜୀବୀ। ପୂର୍ବତନ ପ୍ରଧାନ ବିଚାରପତି କହିଛନ୍ତି, ଯଥାସମ୍ଭବ ସେ ସରକାରୀ ବାସଭବନ ଛାଡ଼ି ଅନ୍ୟ ଏକ ଘରକୁ ଯିବାକୁ ଚେଷ୍ଟା କରିବେ। ଚନ୍ଦ୍ରଚୂଡ଼ କହିଛନ୍ତି, ସରକାର ତାଙ୍କୁ ଭଡ଼ାରେ ଅନ୍ୟ ଏକ ଅସ୍ଥାୟୀ ଘର ଦେଇଥିଲେ। କିନ୍ତୁ ଏହି ଘର ୨ ବର୍ଷ ହେବ ବ୍ୟବହାର ହୋଇନଥିଲା। ପିଲାମାନଙ୍କର ଆବଶ୍ୟକତାକୁ ଦୃଷ୍ଟିରେ ରଖି ଏହି ଘର କାମ ଚାଲିଛି। ଖୁବ୍ଶୀଘ୍ର ଘର ପ୍ରସ୍ତୁତ ହୋଇଗଲେ ସେ ନିଜ ପିଲାମାନଙ୍କ ସହ ଉକ୍ତ ଘରକୁ ଚାଲିଯିବେ ବୋଲି କହିଛନ୍ତି।
Comments are closed.