ନୂଆଦିଲ୍ଲୀ, ୨୪/୩ : କର୍ଣ୍ଣାଟକ ବିଧାନସଭା ନିର୍ବାଚନକୁ ଆଉ ମାତ୍ର ଅଳ୍ପ କିଛିଦିନ ବାକି ଥିବାବେଳେ କେନ୍ଦ୍ର ମନ୍ତ୍ରୀ ଏବଂ ବିଜେପିର ନିର୍ବାଚନ ରଣନୀତିଜ୍ଞ ଅମିତ ଶାହ ଆଜି କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବି ଏସ୍ ୟେଦୁରପ୍ପାଙ୍କ ବାସଭବନ ଯାଇଛନ୍ତି ଏବଂ ୟେଦୁରପ୍ପାଙ୍କ ସହ ସକାଳ ଜଳଖିଆ କରିଛନ୍ତି। କର୍ଣ୍ଣାଟକ ମୁଖ୍ୟମନ୍ତ୍ରୀ ବସଭରାଜ ବୋମାଇ, ବିଜେପି ଜାତୀୟ ସଚିବ ଏବଂ ଚିକ୍କମଗାଲୁରୁ ବିଧାୟକ ସିଟି ରବି , ରାଜ୍ୟ ମନ୍ତ୍ରୀ ଗୋବିନ୍ଦ ମୁକ୍ତପ୍ପା କରଜୋଲ, ସାଂସଦ ଅରୁଣ ସିଂହ ଏବଂ ବିଧାୟକ ନଳୀନ କୁମାର କତିଲ ମଧ୍ୟ ଶାହଙ୍କ ସହ ୟେଦୁରପ୍ପାଙ୍କ ବାସଭବନ ଯାଇଥିଲେ। ସମସ୍ତେ ବସି ଏକାଠି ଜଳଖିଆ କରୁଥିବାର ଫଟୋ ଜାରି ହୋଇଛି। ତେବେ ବିଧାନସଭା ନିର୍ବାଚନ ପାଇଁ ଟିକେଟ ବଣ୍ଟନ କଥା ପଚାରିବାରୁ ସିଟି ରବି କହିଛନ୍ତି, ଟିକେଟ ବଣ୍ଟନ ପ୍ରସଙ୍ଗରେ କିଚେନ କିମ୍ବା ଡାଇନିଂ ଟେବୁଲରେ ନିଷ୍ପତ୍ତି ହୋଇପାରିବନି। ଉଲ୍ଲେଖଯୋଗ୍ୟ ଯେ ଅମିତ ଶାହ ଗତକାଲି ଏକ ଟ୍ବିଟ୍ କରି ବେଙ୍ଗାଲୁରୁ ଗସ୍ତ ସଂକ୍ରାନ୍ତରେ ସୂଚନା ଦେଇଥିଲେ। ଶାହ ଡ୍ରଗ୍ ଚୋରାଚାଲାଣ ସଂକ୍ରାନ୍ତରେ ଏକ ଆଞ୍ଚଳିକ ସମ୍ମିଳନୀରେ ଯୋଗ ଦେବାପାଇଁ ବେଙ୍ଗାଲୁରୁ ଆସିଛନ୍ତି। ୨୨୪ ଆସନ ବିଶିଷ୍ଟ କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଖୁବ୍ଶୀଘ୍ର ତାରିଖ ଘୋଷଣା ହେବ ବୋଲି ଜଣାପଡ଼ିଛି।
Comments are closed.