ଫାରୁଖାବାଦ: ଫାରୁଖାବାଦରେ ଦୁଇ ଜଣ ଦଳିତ ଯୁବତୀଙ୍କ ଆତ୍ମହତ୍ୟା ମାମଲାରେ ଉତ୍ତରପ୍ରଦେଶ ପୁଲିସ ଦୁଇ ଜଣଙ୍କୁ ଗିରଫ କରିବା ସହ ସେମାନଙ୍କ ବିରୋଧରେ ଆତ୍ମହତ୍ୟା ପାଇଁ ପ୍ରୋତ୍ସାହନ ଦେବା ଅଭିଯୋଗରେ ମାମଲା ରୁଜୁ କରିଛି। ଅଗଷ୍ଟ ୨୭ ତାରିଖରେ ଗଛରେ ଝୁଲନ୍ତା ଅବସ୍ଥାରେ ମିଳିଥିବା ୧୫ ଓ ୧୮ ବର୍ଷୀୟ କିଶୋରୀଙ୍କ ପରିବାର ଲୋକଙ୍କ ଅଭିଯୋଗକ୍ରମେ ଅଭିଯୁକ୍ତ ପବନ ଓ ଦୀପକଙ୍କୁ ଅଟକ ରଖାଯାଇଥିଲା। ପଚରାଉଚରା ପରେ ସେମାନଙ୍କୁ ଗିରଫ କରାଯାଇଛି। ଏତଲା ଅନୁଯାୟୀ, ଯୁବତୀମାନେ ତାଙ୍କ ପଡ଼ୋଶୀରେ ରହୁଥିବା ପବନ ଓ ଦୀପକଙ୍କ ବନ୍ଧୁ ଥିଲେ ଓ ସେମାନଙ୍କ ସହ କଥା ହେଉଥିଲେ। ଅଗଷ୍ଟ ୨୬ ତାରିଖ ରାତି ପ୍ରାୟ ୧୦ଟାରେ ଜନ୍ମାଷ୍ଟମୀ ଅବସରରେ ସେମାନେ ନିକଟସ୍ଥ ଏକ ମନ୍ଦିରକୁ ଯିବା ପାଇଁ ଘରୁ ବାହାରିଥିଲେ ମଧ୍ୟ ଫେରି ନ ଥିଲେ। ପରେ ସେମାନଙ୍କ ମୃତଦେହ ଗଛରୁ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା। ପୁଲିସ ଯୁବତୀଙ୍କ ପୋଷାକରୁ ଏକ ସିମ୍ କାର୍ଡ ଜବତ କରିଥିବା ବେଳେ ତଦନ୍ତରୁ ଏହା ଦୀପକଙ୍କର ବୋଲି ଜଣାପଡ଼ିଥିଲା। ଯୁବତୀମାନେ ଏହି ସିମ୍ କାର୍ଡ ବ୍ୟବହାର କରି ଅଭିଯୁକ୍ତଙ୍କ ସହ ଘଣ୍ଟା ଘଣ୍ଟା ଧରି କଥା ହେଉଥିଲେ ଏବଂ କଲ୍ ପରେ ସିମ୍କୁ ହଟାଇ କଲ୍ ଲଗ୍ଗୁଡ଼ିକୁ ଫର୍ମାଟ୍ କରୁଥିଲେ। ବାପା ଅଭିଯୋଗ କରିଛନ୍ତି ଯେ ଉଭୟ ପୁଅ ତାଙ୍କ ଝିଅଙ୍କୁ ହଇରାଣ କରୁଥିଲେ। ତେବେ ଶବ ବ୍ୟବଚ୍ଛେଦ ରିପୋର୍ଟରେ ଯୁବତୀମାନେ ଆତ୍ମହତ୍ୟା କରିଥିବା ସ୍ପଷ୍ଟ ହୋଇଛି। ଉଭୟଙ୍କ ଶରୀରରେ କୌଣସି କ୍ଷତ ଚିହ୍ନ ନ ଥିବା ବରିଷ୍ଠ ପୁଲିସ ଅଧିକାରୀମାନେ ନିଶ୍ଚିତ କରିଛନ୍ତି।
Comments are closed.