ନୂଆଦିଲ୍ଲୀ : ରୁଷ୍ ଆକ୍ରମଣ ଯୋଗୁ ୟୁକ୍ରେନ୍ରୁ ପଳାଇ ଆସିଥିବା ଭାରତୀୟ ଛାତ୍ର ଭାରତରେ ସେମାନଙ୍କର ଶେଷ ମେଡିକାଲ ପରୀକ୍ଷା ଦେଇପାରିବେ। ଭାରତ ଗସ୍ତରେ ଆସିଥିବା ୟୁକ୍ରେନ୍ର ଉପବୈଦେଶିକ ମନ୍ତ୍ରୀ ଏମିନ ଝାପାରୋଭା ଏହି ସୂଚନା ଦେଇଛନ୍ତି। ଝାପାରୋଭା ଏବଂ ଭାରତର ବିଦେଶ ବ୍ୟାପାର ସଚିବ (ପଶ୍ଚିମ) ସଞ୍ଜୟ ବର୍ମାଙ୍କ ମଧ୍ୟରେ ବୁଧବାର ୟୁକ୍ରେନ୍-ଫେରନ୍ତା ଭାରତୀୟ ଛାତ୍ରଙ୍କ ଭବିଷ୍ୟତ ନେଇ ମଧ୍ୟ ଆଲୋଚନା ହୋଇଥିଲା। ଝାପାରୋଭା କହିଥିଲେ, ୟୁକ୍ରେନ୍-ଫେରନ୍ତା ଛାତ୍ରମାନଙ୍କୁ ନିଜ ଦେଶରେ ୟୁନାଇଟେଡ୍ ଷ୍ଟେଟ୍ କ୍ବାଲିଫିକେସନ ପରୀକ୍ଷା ଦେବା ପାଇଁ ୟୁକ୍ରେନ୍ ଅନୁମତି ଦେବ। ଏହି ନିଷ୍ପତ୍ତି ଦ୍ବାରା ୧୪,୦୦୦ ଭାରତୀୟ ଛାତ୍ର ଉପକୃତ ହୋଇପାରିବେ। ଏହି ଛାତ୍ରଛାତ୍ରୀମାନେ ଅନ୍ଲାଇନରେ କ୍ଲାସ୍ କରିପାରିବେ ଏବଂ ଅନ୍ତିମ ପରୀକ୍ଷା ନିଜ ଦେଶରେ ଦେବା ପାଇଁ ନିଷ୍ପତ୍ତି ନେଇପାରିବେ। ଝାପାରୋଭା କହିଛନ୍ତି, ପ୍ରାୟ ୨୦୦୦ ଭାରତୀୟ ଛାତ୍ର ପୁଣି ୟୁକ୍ରେନ୍ ପ୍ରତ୍ୟାବର୍ତ୍ତନ କରିଛନ୍ତି ଏବଂ ସେମାନେ ଦେଶର ପଶ୍ଚିମାଞ୍ଚଳରେ ଥିବା ମେଡିକାଲ ବିଶ୍ବବିଦ୍ୟାଳୟ ଗୁଡ଼ିକରେ ପଢ଼ୁଛନ୍ତି। ବୁଧବାର ଭାରତ ଗସ୍ତ ଶେଷ କରି ୟୁକ୍ରେନ୍ ପ୍ରତ୍ୟାବର୍ତ୍ତନ କରିଥିବା ଝାପାରୋଭା ୟୁକ୍ରେନ୍ର ଏଭଳି ପରିସ୍ଥିତିରେ ଭାରତ ଅଧିକ ମାନବିକ ସାହାଯ୍ୟ ପଠାଇବା ପାଇଁ ଅନୁରୋଧ କରିଥିଲେ। ଏଥି ସହ ଯୁଦ୍ଧ ବନ୍ଦ ହେବା ପରେ ଭାରତୀୟ କମ୍ପାନିମାନେ ୟୁକ୍ରେନ୍ର ପୁନଃନିର୍ମାଣରେ ସହଯୋଗ କରିବେ ବୋଲି ଆଶା ପ୍ରକାଶ କରିଥିଲେ।
Comments are closed.