ମୁମ୍ବାଇ: ବଲିଉଡ୍ ପ୍ରଯୋଜକ ୟଶ ଚୋପ୍ରାଙ୍କ ପତ୍ନୀ ତଥା କଣ୍ଠଶିଳ୍ପୀ ପାମେଲା ଚୋପ୍ରାଙ୍କ ୮୫ ବର୍ଷ ବୟସରେ ପରଲୋକ ଘଟିଛି। ଅସୁସ୍ଥତା କାରଣରୁ ପାମେଲାଙ୍କୁ ୧୫ ଦିନ ତଳେ ମୁମ୍ବାଇର ଲିଲାବତୀ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ତାଙ୍କୁ ଭେଣ୍ଟିଲେଟରରେ ରଖାଯାଇଥିଲେ ବି ଦିନକୁ ଦିନ ସ୍ବାସ୍ଥ୍ୟାବସ୍ଥା ଅଧିକ ଖରାପ ହୋଇଥିଲା। ଶେଷରେ ଗୁରୁବାର ସକାଳେ ସେ ଶେଷ ନିଶ୍ବାସ ତ୍ୟାଗ କରିଥିଲେ। ଶେଷଥର ପାଇଁ ପାମେଲାଙ୍କୁ ୟଶରାଜ ଫିଲ୍ମସର ଡକ୍ୟୁମେଣ୍ଟାରୀ ‘ଦି ରୋମାଣ୍ଟିକ୍ସ’ ରେ ଦେଖିବାକୁ ମିଳିଥିଲା। ସେଥିରେ ତାଙ୍କ ସ୍ବାମୀ ୟଶ ଚୋପ୍ରା ଓ ସେମାନଙ୍କ ଯାତ୍ରା ବିଷୟରେ ପାମେଲା କହୁଥିବା ଦେଖାଯାଇଥିଲା। ହିନ୍ଦୀ ସିନେମାକୁ ଏହି ଯୋଡ଼ିଙ୍କ ଅବଦାନକୁ ଏହି ଡକ୍ୟୁମେଣ୍ଟାରୀରେ ପ୍ରଦର୍ଶିତ କରାଯାଉଥିଲା। ପାମେଲା ଅନେକ ହିନ୍ଦୀ ସିନେମାରେ ଗୀତ ଗାଇଥିଲା ବେଳେ ଅଧିକାଂଶ ତାଙ୍କ ସ୍ବାମୀଙ୍କ ଫିଲ୍ମରେ ଗାଇଥିବା ଦେଖାଯାଇଛି। କଭି କଭି (୧୯୭୬), ମୁଝସେ ଦୋସ୍ତି କରୋଗି (୨୦୦୨) ଭଳି ସିନେମାରେ ସେ ମୁଖ୍ୟ ଗାୟକ ଥିଲେ। ସେହିପରି ୧୯୯୩ରେ ମୁକ୍ତିଲାଭ କରିଥିବା ‘ଆଇନା’କୁ ସେ ଏକାକି ପ୍ରଯୋଜନା କରିଥିଲେ। ୧୯୯୭ରେ ଆସିଥିବା ‘ଦିଲ ତୋ ପାଗଲ ହୈ’ ର ସଂଳାପକୁ ୟଶ, ଆଦିତ୍ୟ ଓ ତନୁଜା ଚନ୍ଦ୍ରଙ୍କ ସହ ମିଶି ପାମେଲା ଲେଖିଥିଲେ। ପାମେଲା ୧୯୭୦ ମସିହାରେ ୟଶଙ୍କୁ ବିବାହ କରିଥିଲେ। ସେମାନଙ୍କର ଆଦିତ୍ୟ ଓ ଉଦୟ ନାମରେ ଦୁଇ ପୁଅ ଅଛନ୍ତି। ଆଦିତ୍ୟ ଜଣେ ପ୍ରଯୋଜକ ଓ ନିର୍ଦ୍ଦେଶକ ଭାବେ ଜଣାଶୁଣା ଥିବା ସହ ରାଣୀ ମୁଖାର୍ଜୀଙ୍କୁ ବିବାହ କରିଛନ୍ତି। ସେହିପରି ଉଦୟ ଜଣେ ଅଭିନେତା ଓ ପ୍ରଯୋଜକ ଭାବେ ପରିଚିତ।
Comments are closed.