ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମେ ୨୮ ରବିବାର ନୂତନ ସଂସଦ ଭବନ ଉଦ୍ଘାଟନ କରିବେ। ୨୦୨୦ ଡିସେମ୍ବର ୧୦ ତାରିଖରେ ପ୍ରଧାନମନ୍ତ୍ରୀ ନୂଆ ସଂସଦ ଭବନର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଜାନୁଆରି ୨୦୨୧ରୁ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଅହମଦାବାଦର ଏଚ୍ସିପି ଏହାର ଡିଜାଇନ କରିଥିବା ବେଳେ ଆର୍କିଟେକ୍ଟ ବିମଳ ପଟେଲ ଏହାର ପ୍ଲାନିଂ ଓ ମ୍ୟାନେଜମେଣ୍ଟ କରିଥିଲେ। ଟାଟା ପ୍ରୋଜେକ୍ଟସ ଲିମିଟେଡ୍ ଦ୍ବାରା ବର୍ତ୍ତମାନର ସଂସଦ ଭବନ ପାର୍ଶ୍ବରେ ଏହା ନିର୍ମାଣ କରାଯାଇଛି। ନିର୍ମାଣ କାର୍ଯ୍ୟରେ ୬୦ ହଜାରରୁ ଅଧିକ ଶ୍ରମଜୀବୀ ନିୟୋଜିତ ହୋଇଛନ୍ତି। ଉକ୍ତ ୬୦ ହଜାରରୁ ଅଧିକ ଶ୍ରମଜୀବୀଙ୍କୁ ପ୍ରଧାନମନ୍ତ୍ରୀ ମୋଦୀ ସଂସଦ ଭବନ ଉଦଘାଟନ ଦିନ ସମ୍ମାନିତ କରିବେ।
ପୁରୁଣା ସଂସଦ ଭବନରେ ଲୋକସଭାରେ ୫୪୩ ଓ ରାଜ୍ୟସଭାରେ ୨୫୦ ଲୋକ ବସିବାର କ୍ଷମତା ଥିବା ବେଳେ ନୂଆ ସଂସଦ ଭବନରେ ଯଥାକ୍ରମେ ୮୮୮ ଓ ୩୦୦ ସାଂସଦ ବସିବାର କ୍ଷମତା ରହିଛି। ନୂତନ ସଂସଦ ଭବନ ୬୪,୫୦୦ ବର୍ଗମିଟର ଭୂମି ଉପରେ ପ୍ରତିଷ୍ଠିତ ହୋଇଥିବା ବେଳେ ପୁରାତନ ଭବନର କ୍ଷେତ୍ରଫଳ ପ୍ରାୟ ୨୪,୨୮୧ ବର୍ଗମିଟର। ନୂଆ ସଂସଦ ଭବନରେ ସେଣ୍ଟ୍ରାଲ ହଲ୍ ନାହିଁ। ଏହା ବଦଳରେ ନୂଆ ସଂସଦ ଭବନର ଲୋକସଭା ଚାମ୍ବରରେ ଯୁଗ୍ମ ଅଧିବେଶନ ଅନୁଷ୍ଠିତ ହେବ।
ପୁରୁଣା ସଂସଦ ଭବନରେ ଅଗ୍ନି ନିରାପତ୍ତା ବ୍ୟବସ୍ଥା ଖୁବ୍ ଦୁର୍ବଳ ଥିଲା। ନୂଆ ସଂସଦ ଭବନରେ ସେହି ଅଭାବକୁ ଦୂର କରାଯାଇଛି। ପୁୂରୁଣା ଭବନରେ ଅନେକ ବିଦ୍ୟୁତ୍ ତାର ପରେ ଟଣାଯାଇଥିଲା, ଯେଉଁଥିରୁ ଅଗ୍ନିଜନିତ ବିପଦର ଆଶଙ୍କା ଥିଲା। ପୁରାତନ ଭବନରେ ଫାୟାର ଫାଇଟିଂ, ପାଣି ଯୋଗାଣ ଲାଇନ, ସିସିଟିଭି, ଅଡିଓ-ଭିଡିଓ ବ୍ୟବସ୍ଥା ଆଦି ଯୋଜନାବଦ୍ଧ ଭାବେ କରାଯାଇ ନ ଥିଲା। ନୂତନ ଭବନରେ ଷ୍ଟେଟ୍-ଅଫ୍-ଆର୍ଟ ଟେକ୍ନୋଲୋଜିର ବ୍ୟବହାର କରାଯାଇଛି। ପ୍ରତ୍ୟେକ ଭୋଟିଂ ପାଇଁ ବାୟୋମେଟ୍ରିକ୍ ବ୍ୟବସ୍ଥା କରାଯାଇଛି। ଡିଜିଟାଲ ଲାଙ୍ଗୁଏଜ୍ ଇଣ୍ଟରପ୍ରିଟେସନ ବା ଟ୍ରାନ୍ସଲେସନ ବ୍ୟବସ୍ଥା କରାଯାଇଛି। ପ୍ରତିଧ୍ବନି ଶୁଣା ନ ଯିବା ପାଇଁ ମଧ୍ୟ ବ୍ୟବସ୍ଥା କରାଯାଇଛି।
ନୂଆ ସଂସଦ ଭବନରେ ସବୁ ପ୍ରକାର ଆଧୁନିକ ସୁବିଧା ରହିଛି। ଏଥିରେ ସନାତନ ପରମ୍ପରା ଓ ବାସ୍ତୁଶାସ୍ତ୍ରର ଅନୁସରଣ କରାଯାଇଛି। ଅନେକ କଳାତ୍ମକ ପେଣ୍ଟିଂ, ଡେକୋରେଟିଭ୍ ଆର୍ଟ, ୱାଲ ପ୍ୟାନେଲ, ଷ୍ଟୋନ ଷ୍ଟ୍ରକ୍ଚର ଓ ଧାତବ ବସ୍ତୁ ଦ୍ବାରା ଭବନକୁ ସଜାଯାଇଛି। ପ୍ରାୟ ୧,୨୦୦ କୋଟି ଟଙ୍କା ବ୍ୟୟରେ ନୂତନ ସଂସଦ ଭବନ ନିର୍ମାଣ ହୋଇଛି। ଅନ୍ୟପକ୍ଷେ ପୁରୁଣା ସଂସଦ ଭବନ ନିର୍ମାଣ ପାଇଁ ୬ ବର୍ଷ (୧୯୨୧-୧୯୨୭) ସମୟ ଲାଗିଥିବା ବେଳେ ଏଥିରେ ୮୩ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ଆଗାମୀ ଦିନରେ ଏହି ଭବନକୁ ଏକ ସଂଗ୍ରହାଳୟରେ ପରିଣତ କରାଯିବାକୁ ସରକାର ଲକ୍ଷ୍ୟ ରଖିଛନ୍ତି।
Comments are closed.