ନୂଆଦିଲ୍ଳୀ: ଦୁଇ ଷ୍ଟକ୍ ମାର୍କେଟ୍ ବ୍ୟବସାୟୀଙ୍କୁ ଅପହରଣ ଓ ୧ କୋଟି ଟଙ୍କା ମୁଣ୍ଡଜାମିନ ରଖିବା ମାମଲାରେ ପୁଲିସ ଜଣେ କନେଷ୍ଟବଳ ସମେତ ୫ଜଣଙ୍କୁ ଗିରଫ କରିଛି। ଏସିପି ବରୁଣ ଦହିୟାଙ୍କ ସୂଚନାନୁସାରେ, ଷ୍ଟକ୍ ବ୍ରୋକର ଅମନ (୨୧) ଓ ତାଙ୍କ ବନ୍ଧୁ ଗଣେଶ (୨୦) ଏକ ଏସ୍ୟୁଭିରେ ଘରୁ ଗାଲେରିଆ ମାର୍କେଟ୍ ଯିବାକୁ ବାହାରିଥିଲେ। ଦୁର୍ବୃତ୍ତମାନେ ସେମାନଙ୍କୁ କାର୍ ଯୋଗେ ପିଛା କରି ଅପରାହ୍ଣ ୩ଟା ୩୦ ମିନିଟ୍ରେ ସେକ୍ଟର ୧୫ ପାର୍ଟ-୨ ଠାରେ ରାସ୍ତା ଅବରୋଧ କରିଥିଲେ। ଦିଲ୍ଲୀ ପୁଲିସ କନେଷ୍ଟବଳ ସୁନୀଲ (୩୨) ଓ ଅନ୍ୟ ଦୁର୍ବୃତ୍ତମାନେ ଉଭୟଙ୍କୁ ଅପହରଣ କରିନେଇଥିଲେ। ଏହି ସମୟରେ ସୁନୀଲ ପୁଲିସ ପୋଷାକ ପିନ୍ଧିଥିଲେ। ରାସ୍ତାରେ ଉଭୟଙ୍କୁ ମାଡ଼ ମାରିବା ସହ କାର୍ରେ ମୁହଁ ଲୁଚାଇ ବସିବାକୁ କହିଥିଲେ। ଅମନଙ୍କ ମୋବାଇଲ୍ ଯୋଗେ ଅଭିଯୁକ୍ତ କନେଷ୍ଟବଳ ସୁନୀଲ ତାଙ୍କର ଏକ ବନ୍ଧୁକୁ ଫୋନ୍ କରିଥିଲା। ଅମନ ଅପହୃତ ହୋଇଥିବା ଓ ମୁକୁଳାଇବା ନିମନ୍ତେ ୧ କୋଟି ଟଙ୍କା ନିର୍ଦ୍ଧାରିତ ଠିକଣାରେ ପହଞ୍ଚାଇବାକୁ କହିଥିଲା। ଏନେଇ ସୂଚନା ପାଇବା ପରେ ଗୁରୁଗାଓଁ ପୁଲିସ ସ୍ବତନ୍ତ୍ର ଟିମ୍ ଗଠନ କରି ଅପହରଣକାରୀଙ୍କୁ ଧରିବାକୁ ଯୋଜନା କରିଥିଲା। ୧ କୋଟି ଟଙ୍କା ମୁଣ୍ଡଜାମିନ ଟଙ୍କାକୁ ହସ୍ତାନ୍ତର କରିବା ଅଭିନୟ କରି ଶ୍ରୀରାମ ଢାବା ନିକଟରେ ସୋନୁ ଓ ଦୀପକ ନାମକ ଦୁଇ ଦୁର୍ବୃତ୍ତଙ୍କୁ ପୁଲିସ ଧରିଥିଲା। ଧରପଗଡ଼ ସମୟରେ ପାଲାମ ବିହାର କ୍ରାଇମ୍ବ୍ରାଞ୍ଚ ଏସ୍ଆଇ ସୁମିତ କୁମାର ଆହତ ହୋଇଥିଲେ। ତେବେ ଦୁଇଜଣଙ୍କୁ ନେଇ ପଚରାଉଚରା କରିବା ପରେ ପାଟାଉଡି ରୋଡ୍ ନିକଟ ଅମର କଲୋନୀର ଏକ ଘରୁ ଉଭୟ ଅମନ ଓ ଗଣେଶକୁ ଉଦ୍ଧାର କରାଯାଇଥିଲା। ସେଠାରୁ ଅଭିଯୁକ୍ତ ଦିଲ୍ଲୀ ପୁଲିସ କନେଷ୍ଟବଳ ସୁନୀଲ, କୁଳଦୀପ ଓ ଋଷିପାଲଙ୍କୁ ଗିରଫ କରାଯାଇଛି।
Comments are closed.