ମାଲକାନଗିରି : କିଛି ଦିନ ବିରତି ପରେ ବିଜେପୁର ଜିଲ୍ଲାରେ ପୁଣି ଦେଖା ଯାଇଛି ଲାଲ ହମଲା । ମାଲକାନଗିରି ସୀମାନ୍ତ ଛତିଶଗଡ଼ ବିଜେପୁର ଜିଲ୍ଲାରେ ପୁଣି ଜଣେ ଶିକ୍ଷାଦୂତଙ୍କୁ ହତ୍ୟା କରିଛନ୍ତି ମାଓବାଦୀ । ଗତକାଲି ସେ ସ୍କୁଲରୁ ଫେରିବା ବେଳେ ଶିକ୍ଷାଦୂତ କଲ୍ଲୁ ତାତିଙ୍କୁ ରାସ୍ତାରୁ ଅପହରଣ କରି ନେଇଥିଲେ ନକ୍ସଲ । ତେବେ ପରିବାର ଲୋକେ ସୂଚନା ପାଇବା ପରେ ତାଙ୍କୁ ରକ୍ଷା କରିବାକୁ ଯାଇ ବିଫଳ ହୋଇଥିଲେ । ଏହାପରେ ତାଙ୍କୁ ଅତି ନିର୍ମମ ଭାବରେ ହତ୍ୟା କରି ରାସ୍ତାରେ ଫୋପାଡ଼ି ଦେଇ ଚାଲି ଯାଇଥିଲେ । ବିଜେପୁର ଜିଲ୍ଲା ଗଙ୍ଗଲୁର ଥାନା ନେତ୍ରା ଠାରେ ବନ୍ଦ ଥିବା ସ୍କୁଲ ଖୋଲିବା ପରେ ସେଠାରେ ଶିକ୍ଷାଦୂତ ଭାବରେ କାମ କରୁଥିଲେ କଲ୍ଲୁ ତାତି । ତେବେ ବନ୍ଦ ସ୍କୁଲ ଗୁଡିକ ପୁଣି ଥରେ ଖୋଲା ଯିବାରୁ ଏଯାଏଁ ୯ ଜଣ ଶିକ୍ଷା ଦୂତଙ୍କୁ ହତ୍ୟା କରିସାରିଲେଣି ନକ୍ସଲ । କେବଳ ବିଜେପୁର ଜିଲ୍ଲାରୁ ୫ ଜଣ ଏବଂ ସୁକମା ଜିଲ୍ଲାରୁ ୪ଜଣ ଶିକ୍ଷାଦୂତଙ୍କୁ ହତ୍ୟା କରି ସାରିଛନ୍ତି ନକ୍ସଲ ।
