ରାହୁଲଙ୍କ ସମର୍ଥନରେ ଦେଶବ୍ୟାପୀ କଂଗ୍ରେସର ‘ସଂକଳ୍ପ ସତ୍ୟାଗ୍ରହ’

ନୂଆଦିଲ୍ଲୀ, ୨୬/୩ : କଂଗ୍ରେସ ନେତା ରାହୁଲ ଗାନ୍ଧିଙ୍କ ସମର୍ଥନରେ କଂଗ୍ରେସ ଆଜି ‌ଦେଶବ୍ୟାପୀ ‘ସଂକଳ୍ପ ସତ୍ୟାଗ୍ରହ’ ପାଳନ କରିଛି। ଦେଶବ୍ୟାପୀ ସମସ୍ତ ରାଜ୍ୟ ଏବଂ ଜିଲ୍ଲା ମୁଖ୍ୟାଳୟରେ ଗାନ୍ଧି ପ୍ରତିମୂର୍ତ୍ତି ନିକଟରେ ଏହି ସଂକଳ୍ପ ସତ୍ୟାଗ୍ରହ ପାଳନ ହେଉଛି। ସକାଳ ୧୦ଟାରୁ ସନ୍ଧ୍ୟା ୫ ଟା ପର୍ଯ୍ୟନ୍ତ କଂଗ୍ରେସ ରାହୁଲଙ୍କ ସମର୍ଥନରେ ସତ୍ୟାଗ୍ରହ କରିବ। ଇତି ମଧ୍ୟରେ ରାଜଘାଟରେ ଆନ୍ଦୋଳନ କରିବାପାଇଁ ଦିଲ୍ଲୀ ପୁଲିସ କଂଗ୍ରେସକୁ ଅନୁମତି ଦେଇନି। ଦିଲ୍ଲୀ ପୁଲିସ ଉକ୍ତ ଅଞ୍ଚଳରେ ଧାରା ୧୪୪ ଜାରି କରିଛି। କିନ୍ତୁ କଟକଣା ସତ୍ତ୍ବେ ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖଡ଼ଗେ, ପ୍ରିୟଙ୍କା ଗାନ୍ଧି ଭଦ୍ରା, କେସି ବେଣୁଗୋପାଳ ଏବଂ ଜୟରାମ ରମେଶ ସମେତ ଅନ୍ୟ ନେତାମାନେ ଆଜି ରାଜଘାଟରେ ସଂକଳ୍ପ ସତ୍ୟାଗ୍ରହରେ ସାମିଲ ହୋଇଛନ୍ତି। ପ୍ରିୟଙ୍କା ଆଜି ରାଜଘାଟରେ ସଂକଳ୍ପ ସତ୍ୟାଗ୍ରହ‌ରେ ଉଦ୍‌ବୋଧନ ଦେଇ ବିଜେପି ବିରୋଧରେ ଗର୍ଜିଛନ୍ତି। ପ୍ରିୟଙ୍କା କହିଛନ୍ତି. ବିଜେପି ରାହୁଲ ଗାନ୍ଧିଙ୍କୁ ଭୟ କରୁଛି। କାରଣ ରାହୁଲ ଯେଉଁ ପ୍ରଶ୍ନ କରୁଛନ୍ତି ସେମାନଙ୍କ ପାଖରେ ଏହାର ଉତ୍ତର ନାହିଁ। ଏହା ଅତ୍ୟନ୍ତ ହାସ୍ୟାସ୍ପଦ ଯେ ‌ଲୋକଙ୍କୁ ନିରବ କରିବାପାଇଁ ଏତେସବୁ କରାଯାଉଛି। ଦେଶର ପ୍ରଧାନମନ୍ତ୍ରୀ ଜ‌ଣେ ଭୀରୁ। ପ୍ରିୟଙ୍କା କହିଛନ୍ତି, ସଂସଦରେ ତାଙ୍କ ବାପାଙ୍କୁ ଅପମାନିତ କରାଯାଇଥିଲା ଏବଂ ତାଙ୍କ ଭାଇଙ୍କର ମିର ଜାଫର ପରି ନାମ ଦିଆଯାଇଛି। ବିଜେପି ମନ୍ତ୍ରୀମାନେ ସୋନିଆଙ୍କୁ ମଧ୍ୟ ଅପମାନିତ କରିଛନ୍ତି। କିନ୍ତୁ ତାଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ‌ହୋଇନି। ଏଭଳି ଲୋକଙ୍କୁ ସଂସଦରୁ ଅଯୋଗ୍ୟ କରାଯାଉନି କି ଜେଲ୍‌ ପଠାଯାଉନି। ସେମାନଙ୍କୁ ବର୍ଷେ ପାଇଁ ବି ନିର୍ବାଚନ ଲଢ଼ିବାରୁ ଅଟକାଯାଉନି। ବିଜେପି ଆମ ପରିବାରକୁ ଅନେକ ଥର ଅପମାନିତ କରିଛି କିନ୍ତୁ ଆମେ ନିରବ ରହିଛୁ। ପଂଜାବ, ହରିୟାଣା ଏବଂ ଅନ୍ୟ ରାଜ୍ୟମାନଙ୍କ‌ରେ ବି କଂଗ୍ରେସ ଏହି ସତ୍ୟାଗ୍ରହ ପାଳନ କରିଛି।