ନୂଆଦିଲ୍ଲୀ : ବିସିସିଆଇ (ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ)ର ନୂଆ ଅଧ୍ୟକ୍ଷ ହେବେ ରାଜୀବ ଶୁକ୍ଲା । ସେ ଆସନ୍ତା ମାସରେ ୩ ମାସ ପାଇଁ କାର୍ଯ୍ୟଭାର ସମ୍ଭାଳିବେ । ରୋଜର ବିନ୍ନିଙ୍କ କାର୍ଯ୍ୟକାଳ ଆସନ୍ତା ମାସ ଅର୍ଥାତ୍ ଜୁଲାଇ ୧୯ ତାରିଖରେ ସମାପ୍ତ ହେବ । ତେଣୁ ରାଜୀବ ଶୁକ୍ଲା ତାଙ୍କ ସ୍ଥାନରେ କାର୍ଯ୍ୟକାରୀ ଅଧ୍ୟକ୍ଷ ଭାବେ ନିଯୁକ୍ତ ହେବ । ବର୍ତ୍ତମାନ ରାଜୀବ ଶୁକ୍ଲାଙ୍କୁ ୬୫ ବର୍ଷ ବୟସ ହୋଇଥିବାବେଳେ ସେ କ୍ରିକେଟ ବୋର୍ଡର ଉପାଧ୍ୟକ୍ଷ ଭାବରେ କାର୍ଯ୍ୟ କରୁଛନ୍ତି । ସେପ୍ଟେମ୍ବରରେ ବିସିସିଆଇର ବାର୍ଷିକ ସାଧାରଣ ବୈଠକ ଅନୁଷ୍ଠିତ ହେବା ପରେ ଶୁକ୍ଳାଙ୍କୁ ପୂର୍ଣ୍ଣକାଳୀନ କରାଯିବ । ଜାତୀୟ ସମ୍ବାଦ ସରବରାହ ସଂସ୍ଥା ପିଟିଆଇ ସୂତ୍ରରୁ ଏହି ଖବର ପ୍ରକାଶ ପାଇଛି ।
୧୯୮୩ ବିଶ୍ବକପ ବିଜେତା ଟିମର ଖେଳାଳି ରୋଜର ବିନ୍ନି ଚଳିତବର୍ଷ ଜୁଲାଇ ୧୯ରେ ୭୦ ବର୍ଷର ହେବେ । ବିସିସିଆଇ ନିୟମ ଅନୁସାରେ, କୌଣସି ବ୍ୟକ୍ତି ୭୦ ବର୍ଷ ବୟସ ପରେ ଅଧ୍ୟକ୍ଷ କାର୍ଯ୍ୟଭାର ସମ୍ଭାଳିବେ ନାହିଁ । ତେଣୁ ରୋଜର ବିନ୍ନିକୁ ନିଜ ପଦ ଛାଡିବାକୁ ହେବ । ଯେ ପର୍ଯ୍ୟନ୍ତ କୌଣସି ପ୍ରତିଷ୍ଠିତ ବ୍ୟକ୍ତିଙ୍କ ଚୟନ ନ ହୋଇଛି, ସେପର୍ଯ୍ୟନ୍ତ ରାଜୀବ ଶୁକ୍ଲା ବିସିସିଆଇର ଅଧ୍ୟକ୍ଷ ଭୂମିକାର ରହିବେ ।
୨୦୨୨ରେ ବିସିସିଆଇ ଅଧ୍ୟକ୍ଷ ଭାବେ ନିଯୁକ୍ତ ହୋଇଥିଲେ ରୋଜର ବିନ୍ନି । ରୋଜର ବିନ୍ନି ସୌରଭ ଗାଙ୍ଗୁଲିଙ୍କ ସ୍ଥାନ ନେଇଥିଲେ । ସେ ନିଜ କ୍ୟାରିଅରରେ ମୋଟ ୨୭ ଟେଷ୍ଟ ମ୍ୟାଚ ଖେଳିଛନ୍ତି । ଏହି ମ୍ୟାଚରେ ୪୭ଟି ଓ୍ଵିକେଟ ନେଇଛନ୍ତି । ୭୨ ଦିନିକିଆ ମ୍ୟାଚ ଖେଳି ୭୭ ଓ୍ଵିକେଟ ନେଇଛନ୍ତି । ଟେଷ୍ଟ କ୍ରିକେଟରେ ୮୩୦ ରନ୍ ଏବଂ ଦିନିକିଆରେ ୬୨୯ ରନ୍ କରିଛନ୍ତି । ଏବେ ରାଜୀବ ଶୁକ୍ଲା ବିସିସିଆଇ ଉପାଧ୍ୟକ୍ଷ ରହିଛନ୍ତି ।
Comments are closed.