ଭୁବନେଶ୍ୱର : ଯାତ୍ରା ପାର୍ଟିରେ ଚାଲିଛି ଯାତେରା । ହେଉଛି ଆଭିଯୋଗ ପରେ ଅଭିଯୋଗ । ପଦାକୁ ଆସୁଛି ଯାତ୍ରା କଳାକାରଙ୍କ ଅନେକ ଅକୁହା କଥା । ଯାତ୍ରା ଅଭିନେତା ପିୟୁଷ ତ୍ରିପାଠୀଙ୍କ ବିବାଦ ପରେ ସାମ୍ନା କୁ ଆସୁଛି ଯାତ୍ରା ପାର୍ଟି ସଦସ୍ୟ ମାନଙ୍କ ଗୋଟିଏ ପରେ ଗୋଟିଏ ଆରୋପ । ସେହିପରି ଆଜି ପୁଣି ଏକ ଘଟଣା ସାମ୍ନାକୁ ଆସିଛି I ତୁଳସୀ ଗଣନାଟ୍ୟ ମାଲିକଙ୍କ ନାଁରେ ଆସିଛି ସାଙ୍ଘାତିକ ଅଭିଯୋଗ । ଜୋର ଜବରଦସ୍ତ ତୁଳସୀ ଗଣନାଟ୍ୟ ହିରୋଇନ ସୋନାଲି ପଣ୍ଡାଙ୍କୁ ନିଜ ପାଖରେ ରଖିଥିବା ନେଇ ଅଭିଯୋଗ କରିଛନ୍ତି ସୋନାଲୀଙ୍କ ସ୍ୱାମୀ ତଥା ପୂର୍ବତନ ତୁଳସୀ ଗଣନାଟ୍ୟର ମ୍ୟାନେଜର ଶ୍ରୀକ୍ଷେତ୍ର ପ୍ରସାଦ ସାମନ୍ତ ସିଂହାର । ମୁଁ ମୋ ପୁଅ ସହିତ ୧୨ ବର୍ଷ ହେବ ପାରିକୁଦରେ ରହୁଛି ବୋଲି କହିଛନ୍ତି ।
ତୁଳସୀ ଗଣନାଟ୍ୟର ମାଲିକ ଅନନ୍ତ ନାରାୟଣ ଧଳ ଓରଫ୍ ନାଣ୍ଡୁ ତାଙ୍କ ପତ୍ନୀ ସୋନାଲିଙ୍କୁ ଜୋର ଜବରଦସ୍ତ ପାର୍ଟିରେ ରଖିବା ସହ ସ୍ବାମୀ କିମ୍ବା ପୁଅ ସହ ଭେଟ କରେଇବାକୁ ବି ଦେଉନାହାନ୍ତି । ଦୀର୍ଘ ୧୨ ବର୍ଷ ହେବ ନାଣ୍ଡୁ ସ୍ଵାମୀ ଓ ପୁଅ ଠୁ ଜଣେ ମା’କୁ ଅଲଗା କରାଇ ଦେଇଛନ୍ତି ବୋଲି ସୋନାଲିଙ୍କ ସ୍ଵାମୀ ବିଭିନ୍ନ ଗଣମାଧ୍ୟମରେ ଅଭିଯୋଗ କରିଛନ୍ତି । ଏହା ଉପରେ ପ୍ରତିକ୍ରିୟା ରଖି ମାଲିକ ଅନନ୍ତ ନାରାୟଣ ଧଳ କହିଛନ୍ତି, ଏହି ଘଟଣା ପୁରା ମିଛ ।
ବହୁ ବର୍ଷ ପୂର୍ବରୁ ବିବାହ ପରେ ସୋନାଲି ସ୍ଵାମୀଙ୍କ ଅତ୍ୟାଚାର ସହି ନପାରି ଆତ୍ମହତ୍ୟା କରିବାକୁ ଯାଉଥିଲେ । ସେତେବେଳେ ତାଙ୍କ ବାପା ସୋନାଲିକୁ ଉଦ୍ଧାର କରି ତାଙ୍କ ଘରେ ରଖିଥିଲେ । ସେହିଦିନ ଠାରୁ ସେ ଯାତ୍ରାରେ ଅଛନ୍ତି ବୋଲି କହିଛନ୍ତି ତୁଳସୀ ଗଣନାଟ୍ୟ ମାଲିକ ।
ଅନ୍ୟ ପକ୍ଷରେ ଏହି ମାମଲାରେ ସୋନାଲି ନିଜର ପ୍ରତିକ୍ରିୟା ଦେଇ କହିଛନ୍ତି ମୁଁ ନିଜ ଇଚ୍ଛାରେ ଯାତ୍ରା ପାର୍ଟିରେ ଅଛି । ବିବାହ ପରେ ମୋ ସ୍ୱାମୀ ମୋତେ ଯାତ୍ରା ପାର୍ଟିରେ ଛାଡି ଦେଇ ଆଉ କିଛି ବୁଝି ନଥିଲେ, ବରଂ ଅନ୍ୟ ଝିଅ ମାନଙ୍କ ସହିତ ସମ୍ପର୍କରେ ଥିଲେ। ଏପରିକି ସେ ଅନ୍ୟ ଜଣକୁ ବିବାହ ମଧ୍ୟ କରିଛନ୍ତି । ମୋର ମୋ ସ୍ବାମୀଙ୍କ ସହିତ କୌଣସି ସମ୍ପର୍କ ନାହିଁ । ସେ ଦୀର୍ଘ ୧୨ ବର୍ଷ ହେଲାଣି କେଉଁଠି ଥିଲେ ବୋଲି ସୋନାଲି ପ୍ରଶ୍ନ ଉଠାଇଛନ୍ତି ।
ଅନ୍ୟପଟେ ଆଜି ଭୁବନେଶ୍ୱର ଠାରେ ମାଲିକ ଏବଂ ଲେଖକ ସଂଘ ପରେ ଏବେ ଯାତ୍ରା କଳାକାର ସଂଘର ଗୁରୁତ୍ୱପୂର୍ଣ୍ଣ ବୈଠକ ବସିଛି । ରୁଦ୍ଧ ଦ୍ଵାର ବୈଠକରେ ଏକାଧିକ ପ୍ରସଙ୍ଗରେ ଆଲୋଚନା ଜାରି ରହିଛି । ନରି ପଣ୍ଡା, ପ୍ରତାପ ମହାନ୍ତି, ପୀୟୂଷ ଏବଂ ଦୟା ଙ୍କ ବିବାଦରେ ସଂଘ କଣ ପଦକ୍ଷେପ ନେବ, ସେ ନେଇ ବିଚାର ବିମର୍ଷ ଚାଲିଛି । ସଂଘ ସଭାପତି, ସମ୍ପାଦକ, ଯୁଗ୍ମ ସମ୍ପାଦକ ଏବଂ ବରିଷ୍ଠ କଳାକାର ପ୍ରମୁଖ ବୈଠକରେ ଉପସ୍ଥିତ ରହଛନ୍ତି ।
Comments are closed.