କନ୍ଧମାଳ : ମଧ୍ୟାହ୍ନ ଭୋଜନ ଖାଇ ୧୦ ରୁ ଉର୍ଧ୍ଵ ଛାତ୍ରଛାତ୍ରୀ ଅସୁସ୍ଥ ହୋଇପଡ଼ିଛନ୍ତି । କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ଉଚ୍ଚ ପ୍ରାଥମିକ ବିଦ୍ୟାଳୟରେ ଏହି ଅଭାବନୀୟ ଘଟଣା ଘଟିଛି । ସମସ୍ତ ପିଲାଙ୍କୁ ପ୍ରାଥମିକ ସ୍ଵାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିବା ଜଣାପଡ଼ିଛି ।
ଶନିବାର ସକାଳୁଆ ସ୍କୁଲ ଚାଲିଥିବାବେଳେ ସିମନବାଡ଼ି ଉଚ୍ଚ ପ୍ରାଥମିକ ବିଦ୍ୟାଳୟରେ ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯାଇଥିଲା । ମଧ୍ୟାହ୍ନଭୋଜନରେ ଭାତ, ଡାଲି ଓ ଅଣ୍ଡା ଖାଇବାକୁ ଦିଆଯାଇଥିଲା। ଖାଦ୍ୟ ଖାଇବା ସାରିବା ପରେ ଛାତ୍ରଛାତ୍ରୀମାନେ ଅସୁସ୍ଥ ଅନୁଭବ କରିଥିଲେ । ପେଟରେ ଯନ୍ତ୍ରଣା ହେବା ସହିତ କିଛି ପିଲା ବାନ୍ତି ମଧ୍ୟ କରିଥିଲେ । ପ୍ରଧାନଶିକ୍ଷକ ବିଦେଶୀ ନାୟକ ଓ ସହକାରୀ ଶିକ୍ଷୟିତ୍ରୀ, ସିଆରସିସି ଶିବଶଙ୍କର ସାହୁ, ବିଦ୍ୟାଳୟ ପରିଚାଳନା କମିଟିର ସଭାପତି ଆରକେଲ ପ୍ରଧାନ ପ୍ରମୁଖ ଗୁରୁତର ପିଲାଙ୍କୁ ସିମନବାଡ଼ି ପ୍ରାଥମିକ ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସମସ୍ତ ଅସୁସ୍ଥ ଛାତ୍ରଛାତ୍ରୀ ଚିକିସ୍ଚାଧୀନ ଅଛନ୍ତି ।
ଛାତ୍ରଛାତ୍ରୀଙ୍କ ଅଭିଯୋଗ ମୁତାବକ, ସେମାନଙ୍କୁ ଦିଆଯାଇଥିବା ଭାତ ଓ ଡାଲି ଖଟା ଲାଗୁଥିଲା । ତାକୁ ଖାଇବା ପରେ ପିଲାଙ୍କ ପେଟରେ ଯନ୍ତ୍ରଣା ହୋଇଥିଲା । ଅନ୍ୟପକ୍ଷରେ କିଛି ପିଲା ଦିଆଯାଇଥିବା ଖାଦ୍ୟକୁ ନ ଖାଇ ଫୋପାଡ଼ି ଦେଇଥିଲେ । ତେଣୁ ସେମାନଙ୍କର କିଛି ହୋଇ ନ ଥିବା କୁହାଯାଉଛି । ତେବେ ମଧ୍ୟାହ୍ନ ଭୋଜନ ରୋଷେଇ ପ୍ରସ୍ତୁତ ବେଳେ ହଳଦୀ ବଦଳରେ ସର୍ଫ ପକାଯାଇଥିବାରୁ ଏଭଳି ଅଘଟଣ ଘଟିଛି ବୋଲି ଅଭିଯୋଗ ହୋଇଛି।
Comments are closed.